វ៉ាស៊ីនតោន៖ លោក ម៉ាកូ រ៉ូប៊ីអូ រដ្ឋមន្ត្រីការបរទេសអាម៉េរិក បានអះអាងថា សហរដ្ឋអាម៉េរិកបានចូលរួមសាជាថ្មីក្នុងកិច្ចព្រមព្រៀងអន្តរជាតិប្រឆាំងការរលូតកូន ខណៈក្រុមអ្នករិះគន់ចោទថា ការចូលរួមសាជាថ្មីនេះមានគោលបំណងរឹតត្បិតការរំលូតកូនសម្រាប់ស្ត្រី និងក្មេងស្រីរាប់លាននាក់ជុំវិញពិភពលោក។
លោក រ៉ូប៊ីអូ បានអះអាងនៅក្នុងសេចក្តីថ្លែងការណ៍មួយកាលពីល្ងាចថ្ងៃសុក្រទី២៤ ខែមករាថា ៖«ថ្ងៃនេះ សហរដ្ឋអាម៉េរិកបានជូនដំណឹងដល់ប្រទេសហត្ថលេខីនៃសេចក្តីថ្លែងការណ៍រួមក្រុងហ្សឺណែវ អំពីចេតនារបស់យើងក្នុងការចូលរួមឡើងវិញភ្លាមៗ»។
សេចក្តីថ្លែងការណ៍រួមក្រុងហ្សឺណែវ(GCD) ត្រូវបានគាំទ្រដោយសហរដ្ឋអាម៉េរិក ប្រេស៊ីល អ៊ូហ្គង់ដា អេហ្ស៊ីប ហុងគ្រី និងឥណ្ឌូណេស៊ី ក្នុងឆ្នាំ២០២០ នៅពេលដែលលោក ត្រាំ ចូលកាន់តំណែងក្នុងអាណត្តិដំបូងរបស់លោក។
គ្រានោះ រដ្ឋបាលរបស់លោក ត្រាំ បានបញ្ជាក់ថាសេចក្តីថ្លែងការណ៍រួមក្រុងហ្សឺណែវស្វែងរកការថែទាំសុខភាពកាន់តែប្រសើរឡើងសម្រាប់ស្ត្រី និងការរក្សាជីវិតមនុស្ស ទន្ទឹមនឹងការពង្រឹងក្រុមគ្រួសារ ព្រោះគ្រួសារជាមូលដ្ឋានគ្រឹះនៃសង្គម និងការពារអធិបតេយ្យភាពរបស់ប្រទេសនីមួយៗ។
សូមជម្រាបថា ឥឡូវនេះ កិច្ច ព្រមព្រៀងអន្តរជាតិ ប្រឆាំង ការ រំលូត កូនមានប្រទេសហត្ថលេខីច្រើនជាង៣៥ ហើយ។ ជាចុងក្រោយ ក្រសួងការបរទេសអាម៉េរិកបានលម្អិតថា គោលបំណងមួយក្នុងចំណោមគោលបំណងទាំងបួននៃកតិកាសញ្ញានេះគឺដើម្បីការពារជីវិតនៅគ្រប់ដំណាក់កាលទាំងអស់។ ការរំលូតកូនគឺជាបញ្ហាប្រេះស្រាំនៅក្នុងនយោបាយសហរដ្ឋអាម៉េរិក។ កាលពីឆ្នាំ២០២២ តុលាការកំពូលរបស់សហរដ្ឋអាម៉េរិកបានសម្រេចលុបចោលសិទ្ធិទូទាំងប្រទេសក្នុងការរំលូតកូន៕
