តៃវ៉ាន់ដាក់ដំណើរការវែបសាយមួយ ដើម្បីលើកទឹកចិត្តឱ្យពលរដ្ឋចិននាំគ្នារាយការណ៍ព័ត៌មានសម្ងាត់ផ្សេងៗ
តៃប៉ិ៖ បើតាមការចេញផ្សាយដោយ ទីភ្នាក់ងារព័ត៌មាន Reuters កាលពីថ្ងៃអាទិត្យ ទី១៤ ខែមិថុនា ឆ្នាំ២០២៦ រដ្ឋាភិបាលកោះតៃវ៉ាន់ បានដាក់ដំណើរការវែបសាយមួយ ដើម្បីលើកទឹកចិត្តឱ្យពលរដ្ឋចិន នាំគ្នារាយការណ៍ព័ត៌មានសម្ងាត់ផ្សេងៗ ដោយអះអាងថា មានប្រជាជនចិនកាន់តែច្រើនឡើង ដែលលែងពេញចិត្តប្រព័ន្ធដឹកនាំរបស់ប្រទេសចិន ហើយចង់បានការផ្លាស់ប្តូរ។
ការិយាល័យសន្តិសុខជាតិតៃវ៉ាន់ បាននិយាយថា ប៉ុន្មានឆ្នាំចុងក្រោយនេះ សេដ្ឋកិច្ចប្រទេសចិន បានប្រឈមជាមួយបញ្ហាលំបាកជាបន្តបន្ទាប់ ខណៈការគ្រប់គ្រងរបស់រដ្ឋាភិបាល នៅតែមានភាពរឹតបន្តឹងខ្លាំង ហើយបូករួមជាមួយបញ្ហាកាន់តែច្រើនពាក់ព័ន្ធសង្គមនិងជីវភាពរស់នៅថែមទៀត លក្ខខណ្ឌទាំងនេះ បានធ្វើឱ្យមានការមិនពេញចិត្តរីកកាន់តែធំ ក្នុងចំណោមសាធារណជន។ដូច្នេះហើយ មានបុគ្គលកាន់តែច្រើនពីមួយថ្ងៃទៅមួយថ្ងៃ ដែលបានទាក់ទងមកកាន់ទីភ្នាក់ងារពាក់ព័ន្ធនៅតៃវ៉ាន់ ក្នុងបំណងផ្តល់ព័ត៌មានចម្រុះប្រភេទ។
តាមរយៈការដាក់ដំណើរការវែបសាយខាងលើ ការិយាល័យសន្តិសុខជាតិតៃវ៉ាន់ បានអំពាវនាវឱ្យជនជាតិចិនទាំងនៅក្នុងនិងនៅក្រៅប្រទេស ចូលរួមឱ្យសកម្មក្នុងការផ្តល់ព័ត៌មាន ហើយបង្កើតការផ្លាស់ប្តូរ ប្រកបដោយភាពក្លាហាន។
ការិយាល័យសន្តិសុខជាតិតៃវ៉ាន់ បានប្រាប់ថា យុទ្ធសាស្រ្តប្រមូលព័ត៌មាននេះ គឺផ្អែកលើវិធីសាស្រ្តដែលត្រូវបានប្រើប្រាស់ដោយ បណ្តាទីភ្នាក់ងារចារកម្មអន្តរជាតិ ដូចជានៅសហរដ្ឋអាមេរិក ចក្រភពអង់គ្លេស និងអ៉ីស្រាអែល ជាដើម។
គួរបញ្ជាក់ថា តៃវ៉ាន់និងចិន បានលួចស៉ើបការណ៍ពីគ្នាទៅវិញទៅមកជាយូរមកហើយ ខណៈតៃវ៉ាន់ជាពិសេស បានរាយការណ៍ពីការកើនឡើងនៃចំនួន ករណីឈ្លបយកការណ៍របស់ចិន។ ទីក្រុងប៉េកាំងខ្លួនឯង ក៏ធ្លាប់ប្រើយុទ្ធសាស្រ្តស្រដៀងគ្នាខាងលើផងដែរ៕
