ឧត្ដមសេនីយ៍ត្រី សឿម សារិទ្ធ ចាត់តំណាងជួបសំណេះសំណាល និងប្រគល់ទទួលកម្មសិក្សាការីជាសិស្សនាយនគរបាល នាយនគរបាលរង វគ្គបណ្ដុះបណ្ដាលកម្រិតបឋមវិជ្ជាជីវៈនគរបាលជំនាន់ទី២០ លេីកទី១ ចុះមកកម្មសិក្សានៅស្នងការដ្ឋាននគរបាលខេត្តបន្ទាយមានជ័យ
បន្ទាយមានជ័យ៖ អនុវត្តតាមអនុសាសន៍ណែនាំដ៏ខ្ពង់ខ្ពស់របស់ ឯកឧត្ដម នាយឧត្ដមសេនីយ៍ ស ថេតអគ្គស្នងការនគរបាលជាតិ នៅថ្ងៃទី១៥ ខែមិថុនា ឆ្នាំ២០២៦លោកឧត្ដមសេនីយ៍ត្រី សឿម សារិទ្ធ ស្នងការ នៃស្នងការដ្ឋាននគរបាលខេត្តបន្ទាយមានជ័យបានចាត់តាំងលោកឧត្ដមសេនីយ៍ត្រី វង្ស វិត ស្នងការរងផែនការងារធនធានមនុស្ស អញ្ជើញជួបសំណេះសំណាលកម្មសិក្សាការីជាសិស្សនាយនគរបាល នាយនគរបាលរង វគ្គបណ្ដុះបណ្ដាលកម្រិតបឋមវិជ្ជាជីវៈនគរបាលជំនាន់ទី២០ លេីកទី១ ចុះមកកម្មសិក្សានៅស្នងការដ្ឋាននគរបាលខេត្តបន្ទាយមានជ័យ។
កម្មសិក្សាការីជាសិស្សនាយនគរបាល នាយនគរបាលរងមានចំនួន ៨៣នាក់ស្រី១១នាក់ ជានគរបាលដែលបានប្រលងជាប់ក្របខ័ណ្ឌនគរបាលជាតិសម្រាប់ឆ្នាំ២០២៥មកពីសាលានគរបាលជាតិភូមិភាគ៥ខេត្តបាត់ដំបង។
ក្នុងឱកាសនោះផងដែរលោកវរសេនីយ៍ទោ ទេព មនោវ័ន្ត នាយករងសាលានគរបាលជាតិភូមិភាគ៥បានចាត់ទុកថាការចុះកម្មសិក្សារបស់ក្មួយៗ ប្អូនៗនាពេលនេះ គឺដើម្បីផ្សារភ្ជាប់ការសិក្សា ជាមួយការអនុវត្តជាក់ស្ដែង និងអនុវត្តតាមកម្មវិធីអប់រំរបស់សាលាបណ្ឌិត្យសភានគរបាលជាតិកម្ពុជាអោយបានត្រឹមត្រូវ។
លោកឧត្ដមសេនីយ៍ត្រី វង្ស វិត ស្នងការរងផែនការងារធនធានមនុស្សបានជម្រុញឲ្យសិក្ខាកាមទាំងអស់ ត្រូវខិតខំរៀនសូត្រ និងស្វែងយល់បន្ថែម នូវមុខងារក៏ដូចជាការងារផ្សេងៗរបស់ការិយាល័យជំនាញ តាមបណ្តាអធិការដ្ឋាន និងប៉ុស្តិ៍នគរបាលរដ្ឋបាលដាក់ជូន និងធ្វើដោយជោគជ័យ និងបន្តយកចំណេះដឹងទៅបម្រើអង្គភាព និងបម្រើប្រជាជន ជាពិសេសប្អូនៗ ត្រូវមានភាពស្មោះត្រង់ គ្នានិងគ្នាក្នុងការចុះកម្មសិក្សាជាក្រុម ឬ ឯកជន សូមជូនពរប្អូនៗជោគជ័យក្នុងបេសកម្មនេះ៕
