ភ្នំពេញ៖ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានអះអាងថា សម្ដេចអង្គុយស្មើមុខស្មើមាត់ ជាមួយថ្នាក់ដឹកនាំតូចធំទាំងអស់ នៅក្នុងកិច្ចប្រជុំកម្រិតអន្តរជាតិ ខុសពីមជ្ឈដ្ឋានមួយចំនួនថា រាជរដ្ឋាភិបាលកម្ពុជាខុសច្បាប់ អត់មានគេទទួលស្គាល់ទេ មិនអាចនៅក្បែរថ្នាក់ដឹកនាំនានាបានឡើយ។
ក្នុងពិធីជួបសំណេះសំណាលជាមួយកម្មករ និយោជិត នៅតាមរោងចក្រ សហគ្រាសចំនួន ១៨ ២៦៥នាក់ នៅស្រុកសំរោងទង ខេត្តកំពង់ស្ពឺ នាព្រឹកថ្ងៃទី៩ខែកញ្ញានេះ សម្ដេចធិបតី បានថ្លែងថា គេបានហៅប្រមុខរាជរដ្ឋាភិបាលកម្ពុជាពេញមាត់ថា ជានាយករដ្ឋមន្ត្រី។
សម្ដេចធិបតី ហ៊ុន ម៉ាណែត បញ្ជាក់ថា «ខ្ញុំអង្គុយនៅក្នុងកៅអីដែលតំណាងហៅថា នាយករដ្ឋមន្ត្រីកម្ពុជា អ៊ីចឹងការងារ ការទូតគឺស្មើមុខស្មើមាត់ ក្នុងនាមជាប្រទេសអធិបតេយ្យមួយ មិនថាប្រទេសធំប្រទេសតូច ការងារទំនាក់ទំនងការទូតនេះ គឺយើងធ្វើកិច្ចការងារនេះ ពហុភាគីនិយម ទទួលស្គាល់កម្ពុជាស្មើមុខស្មើមាត់ អត់មានរៀបចំកៅអីឱ្យកម្ពុជាអង្គុយនៅកន្ទុយគេអីទេគឺតុមូល ថា តុជ្រុងចុះតែស្មើមុខគ្នា នេះហើយជាការទូតដែលយើងត្រូវបញ្ជាក់ថា កម្ពុជា បើទោះបីជាមានរាជរដ្ឋាភិបាលផ្លាស់ប្តូរក៏ដោយ ប៉ុន្តែកម្រិតការទូតរបស់កម្ពុជាគឺនៅដដែលគឺនៅស្មើភាពគេទាំងអស់» ៕
