អភិបាលរងខេត្តរតនគិរី ដឹកនាំក្រុមការងារចុះពិនិត្យស្ថានភាពការគំរាមកំហែងពីការខ្វះទឹកប្រើប្រាស់នៅតាមមូលដ្ឋាន និងជួសជុលអណ្ដូងស្នប់ នៅឃុំវេីនសៃ ស្រុកវេីនសៃ
ភ្នំពេញ៖ នាថ្ងៃទី១៦ ខែឧសភា ឆ្នាំ២០២៤ លោក ម៉ា វិចិត្រ អភិបាលរងខេត្តរតនគិរី និងជាប្រធានលេខាធិការដ្ឋាន នៃគណៈកម្មាធិការគ្រប់គ្រងគ្រោះមហន្តរាយខេត្ត បានអញ្ជើញចុះពិនិត្យស្ថានភាពការគំរាមកំហែងពីការខ្វះទឹកប្រើប្រាស់នៅតាមមូលដ្ឋាន ដោយមានការអញ្ជើញចូលរួមពីសំណាក់លោក លោកស្រី កងរាជអាវុធហត្ថ តំបន់ប្រតិបត្តិការសឹករង ថ្នាក់ខេត្ត មន្ទីរអភិវឌ្ឍន៍ជនបទខេត្ត មន្ទីរធនធានទឹកនិងឧតុនិយមខេត្ត មន្ទីរឧស្សាហកម្មវិទ្យាសាស្ត្របច្ចេកវិទ្យានិងនវានុវត្តន៍ខេត្ត មន្ទីរកសិកម្មរុក្ខាប្រមាញ់និងនេសាទខេត្ត មន្ទីរអប់រំយុវជននិងកីឡាខេត្ត មន្ទីរសុខាភិបាលនៃរដ្ឋបាលខេត្ត មន្ត្រីនៃលេខាធិការដ្ឋានខេត្ត អភិបាលរង ការិយាល័យជំនាញស្រុក កងកម្លាំងថ្នាក់ស្រុក មេឃុំ មន្ត្រីឃុំវេីនសៃ មេភូមិ និងប្រជាពលរដ្ឋ នៅភូមិអ៉ីទូប និងភូមិបាក់កែ ឃុំវេីនសៃ ស្រុកវេីនសៃ។
ជាលទ្ធផល៖ បានពិនិត្យស្ថានភាពការគំរាមកំហែងពីការខ្វះទឹកប្រើប្រាស់នៅទីតាំងជាក់ស្ដែង ចំណុចអណ្ដូងស្នប់ដែលកំពុងមានបញ្ហាសរុបចំនួន ០២ភូមិ ស្មើនឹង ០៥ទីតាំង(រីង ០១ទីតាំង មានទឹកគ្រប់គ្រាន់)។
សកម្មភាពចុះពិនិត្យនេះ មានគោលបំណងដើម្បីពិនិត្យស្ថានភាពជាក់ស្ដែងដែលប្រជាពលរដ្ឋនៅមូលដ្ឋានកំពុងជួបប្រទះ និងណែនាំដល់អាជ្ញាធរស្រុក ឃុំ និងភូមិ ឱ្យយកចិត្តទុកដាក់ខ្ពស់ដោះស្រាយទឹកប្រើប្រាស់ជូនប្រជាពលរដ្ឋឱ្យបានទាន់ពេលវេលា ចៀសវាងបណ្ដោយឱ្យប្រជាពលរដ្ឋណាម្នាក់រងគ្រោះធ្ងន់ធ្ងរពីការខ្វះទឹកប្រើប្រាស់នៅក្នុងមូលដ្ឋាន។
នាថ្ងៃដដែលនេះផងដែរ លោកអភិបាលរងខេត្ត បានដឹកនាំក្រុមការងារថ្នាក់ខេត្ត ជាពិសេសជំនាញអភិវឌ្ឍន៍ជនបទ ចុះជួសជុលបន្ទាន់អណ្ដូងស្នប់ចំនួន ០១អណ្ដូង (ដោយជោគជ័យ) ស្ថិតនៅភូមិបាក់កែ និងជួយដោះស្រាយបញ្ហាអណ្ដូងស្នប់ដែលមានបញ្ហា សរុបចំនួន ០៤ទីតាំង នៅភូមិអ៉ីទូបនិងភូមិបាក់កែ ឃុំវេីនសៃ ស្រុកវេីនសៃ ដើម្បីជួយសម្រាលទុក្ខលំបាកនិងសេចក្ដីត្រូវការទឹកប្រចាំថ្ងៃរបស់ប្រជាពលរដ្ឋសរុបចំនួន ០២ភូមិ ស្មើនឹង ៩៧គ្រួសារ។
ព្រមជាមួយគ្នានេះ លោកអភិបាលរងខេត្ត បានប្រគល់វិទ្យុ សរុបចំនួន ១០គ្រឿង ជាអំណោយរបស់សាខាកាកបាទក្រហមកម្ពុជាខេត្តរតនគិរី ជូនមេឃុំវេីនសៃ ដេីម្បីចែកជូនប្រជាពលរដ្ឋនិយមស្ដាប់វិទ្យុក្នុងភូមិអ៉ីទូប និងភូមិបាក់កែ ៕
