បើកវគ្គបណ្ដុះបណ្ដាលស្ដីពីផែនការគ្រប់គ្រងដំណេីរការប្រើប្រាស់ និងការថែទាំជួសជុលនៃគម្រោងអភិវឌ្ឍន៍អាងទឹករក្សា ដេីម្បីឲ្យទទួលបានចំណេះដឹងក្នុងការអនុវត្តប្រកបដោយប្រសិទ្ធភាពខ្ពស់
ភ្នំពេញ៖ នៅថ្ងៃទី១៥-១៦ ខែធ្នូ ឆ្នាំ២០២២ នៅទំនប់អាងស្តុកទឹករក្សាខេត្តព្រះវិហារ ស្ថិតនៅលើដងស្ទឹងសែន ក្នុងព្រំប្រទល់ឃុំពុទ្រា និងឃុំរក្សា ស្រុកជ័យសែន និងស្រុករវៀង ខេត្តព្រះវិហារ បានបើកវគ្គបណ្ដុះបណ្ដាលស្ដីពីផែនការគ្រប់គ្រងដំណេីរការប្រើប្រាស់ និងការថែទាំជួសជុលនៃគម្រោងអភិវឌ្ឍន៍អាងទឹករក្សា ដេីម្បីឲ្យទទួលបានចំណេះដឹងក្នុងការអនុវត្តប្រកបដោយប្រសិទ្ធភាពខ្ពស់។
សូមបញ្ជាក់ជូនផងដែរថា ទំនប់អាងស្តុកទឹកនេះ ត្រូវបានសាងសង់ឡេីងចាប់តាំងពីដេីមខែវិច្ឆិកា ឆ្នាំ២០១៩ និងត្រូវបានបញ្ចប់ជាស្ថាពរ (១០០ភាគរយ) ក្រោមគម្រោងឥណទានសាធារណរដ្ឋប្រជាមានិតចិន ។
វគ្គបណ្ដុះបណ្ដាលនេះ មានសមាសភាពចូលរួម: ប្រធាននាយកដ្ឋានវិស្វកម្ម អនុប្រធាននាយកដ្ឋានធារាសាស្ត្រកសិកម្ម សហគមន៍កសិករប្រើប្រាស់ទឹក និងប្រធានមន្ទីរធនធានទឹក និងឧតុនិយមខេត្តព្រះវិហារ រួមទាំងមន្ត្រីនាយកដ្ឋានពាក់ព័ន្ធ និងមន្ទីរផងដែរ។
វគ្គបណ្ដុះបណ្ដាលនេះ បានបង្ហាញ និងអនុវត្តផ្ទាល់នូវការគ្រប់គ្រងកិច្ចដំណើរការប្រើប្រាស់ទ្វារទឹក (បញ្ជាបិទ-បេីក) ឲ្យបានត្រឹមត្រូវទៅតាមបទដ្ឋានបច្ចេកទេស ដេីម្បីធានាឲ្យបាននូវការថែរក្សា និងធានាសុវត្ថិភាពបានគ្រប់ជ្រុងជ្រោយ និងគង់វង្សយូរអង្វែងរបស់សំណង់ ក្នុងគោលបំណងចម្បងគឺបម្រេីដល់ការផ្គត់ផ្គង់ទឹកសម្រាប់ស្រោចស្រពដំណាំស្រូវ និងដំណាំរួមផ្សំដើម្បីបង្កើនផលិតផលស្បៀង និងការប្រេីប្រាស់ប្រចាំថ្ងៃផ្នែកខាងក្រោមរបស់ប្រជាពលរដ្ឋ ជាពិសេសជួយសម្រួលដល់ការបែងចែកបរិមាណទឹកប្រើប្រាស់នៅក្នុងរដូវវស្សានិងរដូវប្រាំង ប្រកបដោយសមធម៌។
បន្ថែមពីលេីនេះទៀត សមត្ថភាពអាងទឹករក្សា អាចស្តុកទឹកបានចំនួនប្រមាណ ២៥៧លានម៉ែត្រគូប និងអាចស្រោចស្រពផ្ទៃដីផ្នែកខាងក្រោមបានប្រមាណចំនួន ១៣១.៣២៣ហិកតា ព្រមទាំងជាប្រភពដ៏សំខាន់សម្រាប់ផ្គត់ផ្គង់ទឹកស្អាត និងជួយកាត់បន្ថយទឹកជំនន់និងគ្រោះរាំងស្ងួតតាមរយ:យន្តការបច្ចេកទេសច្បាស់លាស់នៃការគ្រប់គ្រងធនធានទឹកចម្រុះរបស់ស្ទឹងសែនដែលគ្របដណ្តប់ភាគច្រើនលើទឹកដីនៃខេត្តព្រះវិហារ និងខេត្តកំពង់ធំ។
ឆ្លៀតក្នុងឱកាសនេះផងដែរ ក្រុមការងារក្រសួងទាំងអស់ បានថ្លែងអំណរគុណយ៉ាងជ្រាលជ្រៅចំពោះការរៀបចំនូវវគ្គបណ្តុះបណ្តាលដ៏មានសារ:សំខាន់នេះ ព្រមទាំងកោតសរសេីរ និងវាយតម្លៃខ្ពស់ចំពោះក្រុមហ៊ុនអនុវត្ត និងត្រួតពិនិត្យគម្រោងរបស់ភាគីចិន ដែលបានបញ្ចប់ការងារសាងសង់តាមកាលកំណត់ដែលបានគ្រោងទុក។ ជាមួយគ្នានេះផងដែរ ក្រុមការងារក្រសួង ក៏បានស្នេីដល់ភាគីចិនឲ្យបន្តជួយគាំទ្រនូវផ្នែកបច្ចេកទេស ក៏ដូចជាការយកចិត្តទុកដាក់បង្ហាត់បង្រៀនថែទាំបន្ថែមទៀតដល់មន្ត្រីឆ្មាំមន្ទីរ ក៏ដូចជាមន្ត្រីមូលដ្ឋានយ៉ាងហោចណាស់ឲ្យបានរយ:ពេល ០១ឆ្នាំ បន្ទាប់ពីបញ្ចប់សុពលភាពនេះផងដែរ៕
