អាជ្ញាធរខណ្ឌពោធិ៍សែនជ័យ ចុះចែកវិញ្ញាបនបត្រសម្គាល់អចលវត្ថុ ១៤៨៤ប័ណ្ណ ជូនប្រជាពលរដ្ឋនៅភូមិត្រពាំងអណ្តូង សង្កាត់ត្រពាំងក្រសាំង
ភ្នំពេញ៖ ការិយាល័យរៀបចំដែនដី នគរូបនីយកម្ម សំណង់ និងភូមិបាល ខណ្ឌពោធិ៍សែនជ័យ នៅព្រឹកទី២៣ ខែសីហា ឆ្នាំ២០២២ បានរៀបចំពិធីចែកវិញ្ញាបនបត្រសម្គាល់អចលវត្ថុ (ប្លង់រឹង) ជូនប្រជាពលរដ្ឋរបស់ភូមិត្រពាំង អណ្តូង សង្កាត់ត្រពាំងក្រសាំង ខណ្ឌពោធិ៍សែន ជ័យចំនួន១ ៤៨៤ប័ណ្ណ ក្រោមវត្តមាន លោក សក់ ច័ន្ទកញ្ញារិទ្ធ អភិបាលខណ្ឌពោធិ៍សែនជ័យ លោក ប៊ិន សូឈី អនុប្រធានមន្ទីរទទួលបន្ទុកការងារចុះបញ្ជីដីធ្លីមាន លក្ខណៈជាប្រព័ន្ធ និង លោក យស់ វណ្ណា អនុប្រធានមន្ទីរទទួលបន្ទុកការងារសុរិយោដី។
លោក ប៊ិន សូឈី អនុប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដី រាជធានីភ្នំពេញ បានឱ្យដឹងថា ចាប់តាំងពីឆ្នាំ២០១៨មក ក្រុមការងារកម្មវិធីអនុវិស័យ រដ្ឋបាលដីធ្លី រាជធានីភ្នំពេញ បានដំណើរការ ចុះបញ្ជីដីធ្លី (ជាលក្ខណៈប្រព័ន្ធ) បានចំនួន ៣៥៤.៣២៥ក្បាលដី, បិទផ្សាយជាសាធារណៈជូនប្រជាពលរដ្ឋបានចំនួន ៣១៤ ៨៣១ ក្បាលដី និងចែកប័ណ្ណកម្មសិទ្ធិសម្គាល់ម្ចាស់អចលនវត្ថុបានចំនួន ២០ ១៤៦ប័ណ្ណ លើ ៨៥សង្កាត់ ក្នុងចំណោម១០៥សង្កាត់ ទូទាំងរាជធានីភ្នំពេញ។
ដោយឡែកសម្រាប់ថ្ងៃនេះ ក្រុមការងារ ធ្វើការចែកប័ណ្ណសម្គាល់ម្ចាស់អចលនវត្ថុ ជូនប្រជាពលរដ្ឋនៅភូមិត្រពាំង អណ្តូងមានចំនួន១៤៨៤ក្បាលដី បន្ទាប់ពីយើង បានធ្វើការបិទផ្សាយជាសាធារណៈនាពេលកន្លងមក ។
ក្នុងឱកាសនោះលោក សក់ ច័ន្ទកញ្ញារិទ្ធ អភិបាលខណ្ឌពោធិ៍សែនជ័យ បានថ្លែងថា នេះជាការយកចិត្តទុកដាក់ របស់រាជរដ្ឋាភិបាល ក្នុងការកាត់បន្ថយភាពក្រីក្រជូនប្រជាពលរដ្ឋ តាមរយៈការបែងចែក និងទទួលស្គាល់សិទ្ធិ ស្របច្បាប់ ចំពោះការគ្រប់គ្រង ប្រើប្រាស់ដីធ្លី ផ្ទះសម្បែង ជាកម្មសិទ្ធិនៃបុគ្គលនីមួយៗ គឺគ្មាននរណាអាចមក រំលោភបំពានបានឡើយ។ ជាមួយនេះ រាជរដ្ឋាភិបាល ក៏ទទួលបានភាពងាយស្រួលក្នុងការគ្រប់គ្រង និងការប្រមូល ពន្ធលើដីភោគៈ ដោយស្របច្បាប់ ដែលជាចំណែកមួយ នៃការបង្កើនចំណូលថវិការជាតិ កាន់តែកើនឡើង មួយកម្រិតថែមទៀត ។
លោកបន្តថា ការផ្តល់ប័ណ្ណសម្គាល់ ម្ចាស់អចលនវត្ថុចុងក្រោយនេះ ក៏បានផ្តល់ ភាពងាយស្រួល តាមតម្រូវការ ជាក់ស្តែង របស់ប្រជាពលរដ្ឋ ក្នុងការលក់ដូរ ដាក់បញ្ចាំ ផ្ទេរសិទ្ធិទៅអ្នកដទៃ ឬធ្វើជាអំណោយដល់ កូន ចៅ ស្របតាមផ្លូវច្បាប់។ តែត្រង់ចំណុចនេះ លោក អភិបាល ខណ្ឌ មិនលើកទឹកចិត្តឱ្យបងប្អូន យកប័ណ្ណនេះទៅដាក់ បញ្ចាំនោះឡើយ។ សូមរក្សាទុកដាក់ឱ្យផុតពីដៃក្មេង កុំទុកក្នុងទីកន្លែងសើម នាំឱ្យមានការខូច ខាត ព្រោះប័ណ្ណមួយសន្លឹងនេះ គឺជាទ្រព្យសម្បត្តិប្រចាំគ្រួសារ មានតម្លៃស្មើនឹង អាយុជីវិតរបស់ខ្លួន៕
