បទវិភាគ៖ “និមិត្តសញ្ញាថ្មី”នៃទំនាក់ទំនងចិន-កូរ៉េខាងជើងនឹងណែនាំប្រទេសទាំងពីរបើកទំព័រថ្មីនៃការអភិវឌ្ឍ
ថ្នាក់ដឹកនាំកំពូលនៃបក្សនិងរដ្ឋទាំងពីរចិននិងកូរ៉េខាងជើងបានពិភាក្សាគ្នាអំពីផែនការអភិវឌ្ឍន៍នៃទំនាក់ទំនងចិន-កូរ៉េខាងជើង អញ្ជើញចូលរួមសកម្មភាពជាច្រើនលើកជាមួយគ្នានិងរួមគ្នាដាំដើមឈើFirដែលជានិមិត្តរូបនៃការបន្តវេនចំណងមិត្តភាពទៅគ្រប់ជំនាន់ ។ល។ តបតាមការអញ្ជើញរបស់លោក Kim Jong-un អគ្គលេខាធិការនៃគណកម្មាធិការមជ្ឈិមបក្សពលករកូរ៉េខាងជើងនិងជាប្រធានក្រុមប្រឹក្សារដ្ឋកូរ៉េខាងជើង លោក Xi Jinping អគ្គលេខាធិការនៃគណៈកម្មាធិការមជ្ឈិមបក្សកុម្មុយនីស្តចិននិងជាប្រធានរដ្ឋចិនបានអញ្ជើញបំពេញទស្សនកិច្ចផ្លូវរដ្ឋនៅកូរ៉េខាងជើងពីថ្ងៃទី៨ដល់ថ្ងៃទី៩ខែមិថុនា ។ ក្នុងអំឡុងពេលដំណើរទស្សនកិច្ច ថ្នាក់ដឹកនាំកំពូលនៃបក្សនិងរដ្ឋទាំងពីរបានធ្វើការរចនាកំពូលនិងណែនាំជាយុទ្ធសាស្ត្រសម្រាប់ទំនាក់ទំនងចិន-កូរ៉េខាងជើងក្នុងយុគសម័យថ្មី ហើយបានឯកភាពគ្នាថា ត្រូវឈរលើមុំនៃយុទ្ធសាស្ត្រស្តីពីអនាគតនិងជោគវាសនានៃសង្គមនិយម ដើម្បីក្តាប់ជាប់និន្នាការយុគសម័យ និងជំរុញឱ្យទំនាក់ទំនងចិន-កូរ៉េខាងជើងទទួលការអភិវឌ្ឍប្រកបដោយកម្រិតខ្ពស់ ។ កាសែត«Rodong Sinmun»របស់កូរ៉េខាងជើងបានចុះផ្សាយវិចារណកថាថា ”ដំណើរទស្សនកិច្ចរបស់លោកXi Jinping លើកនេះមានអត្ថន័យយ៉ាងស៊ីជម្រៅនិងវែងឆ្ងាយ” ”ទំនាក់ទំនងដ៏មេត្រីភាពកូរ៉េខាងជើង-ចិនដែលកំពុងទទួលការអភិវឌ្ឍយ៉ាងស៊ីជម្រៅជាបន្តបន្ទាប់មានកម្លាំងជីវិតដ៏ខ្លាំងក្លា” ។
បច្ចុប្បន្ននេះ បម្រែបម្រួលនិម្មាបនកម្មសកល១០០ឆ្នាំកំពុងវិវត្តន៍យ៉ាងឆាប់រហ័ស ។ ទាំងចិននិងកូរ៉េខាងជើងសុទ្ធតែប្រកាន់ខ្ជាប់ការប្រមូលផ្តុំកម្លាំងកាយចិត្ត ដើម្បីធ្វើកិច្ចការរបស់ខ្លួនឱ្យបានល្អ ហើយបន្តព្យាយាមឆ្ពោះទៅមុខតាមផ្លូវសង្គមនិយម ។ ចិនបានសម្រេចការចាប់ផ្តើមដ៏ល្អប្រសើរក្នុងការអនុវត្ត“ផែនការអភិវឌ្ឍន៍ជាតិ៥ឆ្នាំទី១៥” ហើយកំពុងខិតខំប្រឹងប្រែងត្រួសត្រាយស្ថានការណ៍ថ្មីនៃការកសាងទំនើបកម្មតាមបែបផែនចិន ។ សមាជលើកទី៩នៃបក្សពលករកូរ៉េខាងជើងបានប្រារព្ធធ្វើឡើងដោយជោគជ័យ ដែលបានគ្រោងផែនការជាយុទ្ធសាស្ត្រនិងធ្វើការរៀបចំចាត់តាំងដ៏សំខាន់ចំពោះការអភិវឌ្ឍរយៈពេលវែងនៃកិច្ចការបក្សនិងរដ្ឋកូរ៉េខាងជើង ហើយចាប់ដំណើរការនូវដំណាក់កាលថ្មីនៃការអភិវឌ្ឍសង្គមនិយមដោយគ្រប់ជ្រុងជ្រោយរបស់កូរ៉េខាងជើង ។
មិត្តភាពប្រពៃណីចិន-កូរ៉េខាងជើងបានបន្តវេនទៅគ្រប់ជំនាន់ក្នុងការពិសោធន៍នៃបម្រែបម្រួលស្ថានការណ៍អន្តរជាតិ បញ្ហាគន្លឹះគឺដោយមកពីការចង្អុលបង្ហាញទិសដៅរបស់ថ្នាក់ដឹកនាំកំពូល ។ លោក Xi Jinping អគ្គលេខាធិការនៃគណៈកម្មាធិការមជ្ឈិមបក្សកុម្មុយនីស្តចិនបានថ្លែងថា ភាគីចិនរីករាយរក្សាការប្រាស្រ័យទាក់ទងខាងយុទ្ធសាស្ត្រយ៉ាងជិតស្និទ្ធជាមួយលោក Kim Jong-un អគ្គលេខាធិការនៃគណៈកម្មាធិការមជ្ឈិមបក្សពលករកូរ៉េខាងជើង ដើម្បីដឹកនាំទំនាក់ទំនងចិន-កូរ៉េខាងជើងឱ្យឆ្ពោះទៅរកកម្ពស់ថ្មីជាបន្តបន្ទាប់ ។ ភាគីចិនក៏បានលើកឡើងថា នឹងចាត់ទុកខួបទី៦៥ឆ្នាំនៃការចុះហត្ថលេខាលើ«សន្ធិសញ្ញាមិត្តភាពសហប្រតិបត្តិការនិងទំនុកបម្រុងគ្នារវាងចិននិងកូរ៉េខាងជើង»ជាកាលានុវត្តភាពមួយ ដើម្បីរៀបចំសកម្មភាពរំលឹកឱ្យបានឱឡារិក ។ ត្រូវពង្រីកនិងជំរុញការប្រាស្រ័យទាក់ទងដ៏មេត្រីភាពក្នុងគ្រប់ស្រទាប់ថ្នាក់និងគ្រប់វិស័យរវាងបក្សទាំងពីរ ដើម្បីធ្វើឱ្យស៊ីជម្រៅនូវការផ្លាស់ប្តូរនិងរៀនសូត្រពីគ្នាទៅវិញទៅមកនូវបទពិសោធក្នុងការគ្រប់គ្រងបក្សនិងអភិបាលកិច្ច ។ ត្រូវបង្កើនការផ្លាស់ប្តូរផ្នែកការទូត ការអនុវត្តច្បាប់និងកងទ័ព ។ល។ថ្នាក់ដឹកនាំជាន់ខ្ពស់នៃភាគីទាំងពីរមានទំនាក់ទំនងជាញឹកញាប់ នឹងពង្រឹងយ៉ាងខ្លាំងនូវការកសាងទំនុកចិត្តខាងនយោបាយចិន-កូរ៉េខាងជើង ដើម្បីបំពេញបន្ថែមកម្លាំងចលករដ៏ខ្លាំងក្លាសម្រាប់ការអភិវឌ្ឍទំនាក់ទំនងរវាងបក្សនិងរដ្ឋទាំងពីរ ។
ក្នុងនាមជាប្រទេសជិតខាងសង្គមនិយមដ៏មេត្រីភាព ចិននិងកូរ៉េខាងជើងមានការស្វែងរកដូចគ្នាក្នុងការជំរុញសន្តិសុខយូរអង្វែងក្នុងតំបន់ និងសន្តិភាពនិងស្ថិរភាពពិភពលោក ។ ប្រឈមមុខនឹងស្ថានការណ៍អន្តរជាតិដែលមានភាពប្រែប្រួលនិងរង្គោះរង្គើខ្លាំង ភាគីទាំងពីរត្រូវបង្កើនការសម្របសម្រួលនិងការសហការគ្នាខាងយុទ្ធសាស្ត្រ ដើម្បីគាំពារយ៉ាងមុតមាំនូវអធិបតេយ្យភាព សន្តិសុខនិងផលប្រយោជន៍អភិវឌ្ឍន៍រៀងៗខ្លួន ក៏ដូចជារួមគ្នាគាំពារសន្តិភាពនិងការអភិវឌ្ឍក្នុងតំបន់ ។
មានតែវាយោបក់បោកខ្លាំងទើបអាចដឹងពីភាពស៊ូទ្រាំនៃស្មៅ មានតែក្នុងកាលៈទេសៈនៃការលំបាកទើបស្គាល់ពីមិត្តភក្តិពិតប្រាកដ។ ឈរនៅទីចាប់ផ្តើមថ្មី ចិននិងកូរ៉េខាងជើងកំពុងអនុវត្តជាក់ស្តែងនូវគំនិតឯកភាពរួមដ៏សំខាន់របស់ថ្នាក់ដឹកនាំកំពូលនៃប្រទេសទាំងពីរ នាវាយក្សនៃទំនាក់ទំនងចិន-កូរ៉េខាងជើងប្រាកដជានឹងព្យាយាមបោះជំហានទៅមុខយ៉ាងក្លាហាន ដើម្បីរួមចំណែកកាន់តែធំដល់ការជំរុញសន្តិភាព ស្ថិរភាព ការអភិវឌ្ឍនិងវិបុលភាពក្នុងតំបន់រហូតដល់ពិភពលោក ៕
