អូស្ត្រាលី និងប្រទេសដែនកោះសូឡូម៉ុន កំពុងពង្រឹងទំនាក់ទំនងទ្វេភាគី មួយថ្ងៃបន្ទាប់ពីចិនបានធ្វើតេស្តបាញ់មីស៊ីលបាលិស្ទីគ
ស៊ីដនី៖ បើតាមការចេញផ្សាយដោយទីភ្នាក់ងារសារព័ត៌មាន Reuters អូស្ត្រាលី និងប្រទេសដែនកោះសូឡូម៉ុន នៅថ្ងៃអង្គារ ទី៧ ខែកក្កដា ឆ្នាំ២០២៦ បាននិយាយថាប្រទេសទាំង២បាន និងកំពុងពង្រឹងទំនាក់ទំនងទ្វេភាគី មួយថ្ងៃបន្ទាប់ពីចិនបានធ្វើតេស្តបាញ់ មីស៊ីលបាលិស្ទីគអន្តរទ្វីបមួយគ្រាប់ចូលក្នុងមហាសមុទ្រប៉ាស៊ីហ្វិក ជាការធ្វើតេស្តមួយដែលក្រុមអ្នកវិភាគយល់ថាអាចនឹងបង្កើនការប្រកួតប្រជែងខាងយុទ្ធសាស្ត្រក្នុងតំបន់។
នាយករដ្ឋមន្ត្រីអូស្ត្រាលី លោក Anthony Albanese ដែលបានធ្វើដំណើរទៅដល់រដ្ឋធានី Honiara ប្រទេសដែនកោះសូឡូម៉ុន និងត្រូវបានទទួលបានស្វាគមន៍ដោយនាយករដ្ឋមន្ត្រីថ្មីរបស់សូឡូម៉ុន លោក Matthew Wale បាននិយាយថាប្រទេសទាំង២បានឯកភាពគ្នាថានឹងបន្តកិច្ចចរចាស្ដីពីកិច្ចព្រមព្រៀងគ្រប់ជ្រុងជ្រោយថ្មីមួយ។
«អូស្ត្រាលី និងសូឡូម៉ុនបាន និងកំពុងពង្រឹងភាពជាដៃគូរបស់ យើង ហើយក៏ព្រោះតែសន្តិសុខរបស់អូស្ត្រាលីផ្សារភ្ជាប់ជាមួយសន្តិភាព និងស្ថិរភាពក្នុងតំបន់ប៉ាស៊ីហ្វិក យើងនឹងតែងតែឈរនៅជាមួយបណ្ដាប្រទេសជិតខាងរបស់យើងជានិច្ច»។ នេះជាការគូសបញ្ជាក់ របស់លោក Anthony Albanese នៅក្នុងការបង្ហោះមួយលើបណ្ដាញទំនាក់ទំនងសង្គម X។
គួរបញ្ជាក់ថា ចិនកាលពីថ្ងៃចន្ទ បានធ្វើតេស្ដបាញ់មីស៊ីលបាលិស្ទីគអន្តរទ្វីបមួយគ្រាប់ចេញពីនាវាមុជទឹកដើរដោយថាមពលនុយក្លេអ៊ែរ ក្នុងតំបន់ប៉ាស៊ីហ្វិក។ នេះជាការធ្វើតេស្ដលើកដំបូងបំផុត ចាប់តាំងពីឆ្នាំ២០២៤មក៕
