សម្តេចធិបតី៖ កាលមុនគេតែងនិយាយថា ខេត្តស្វាយរៀង និងខេត្តព្រៃវែង ដីមិនសូវមានជីវជាតិដាំដំណាំមិនសូវល្អ ប៉ុន្ដែបច្ចុប្បន្ននេះ គឺដាំរោងចក្រតែម្ដង

ភ្នំពេញ៖ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ដ្រីនៃកម្ពុជា បានថ្លែងថា កាលមុនគេតែងនិយាយថា ខេត្តស្វាយរៀង និងខេត្តព្រៃវែង ដីមិនសូវមានជីវជាតិដាំដំណាំមិនសូវល្អ ប៉ុន្ដែនៅពេលបច្ចុប្បន្ននេះ គឺដាំរោងចក្រតែម្ដង។

សម្ដេចធិបតីលើកឡើងបែបនេះក្នុងឱកាសអញ្ជើញជាអធិបតីភាពក្នុងពិធីសម្ពោធដាក់ឲ្យប្រើប្រាស់រោងចក្រប្រព្រឹត្តកម្មទឹកស្អាត ក្រុងស្វាយរៀង និងបើកការដ្ឋានសាងសង់គម្រោងពង្រីកហេដ្ឋារចនាសម្ព័ន្ធទឹកស្អាត ក្នុងខេត្តចំនួន៥ រួមមាន ខេត្តស្វាយរៀង ពោធិ៍សាត់ កំពង់ធំ កំពត និងខេត្តមណ្ឌលគិរី ក្រោមជំនួយហិរញ្ញប្បទានឥតសំណងរបស់រដ្ឋាភិបាលជប៉ុន តាមរយៈទីភ្នាក់ងារសហប្រតិបត្តិការអន្តរជាតិជប៉ុន (JICA) នៅព្រឹកថ្ងៃទី២៦ ខែមីនា ឆ្នាំ២០២៦នេះ។

សម្ដេចធិបតីបន្តថា ប្រសិនបើឧស្សាហ៍កម្មរីកនៅខេត្តស្វាយរៀង មិនយូរមិនឆាប់ នឹងរីកចម្រើនដល់ខេត្តព្រៃវែង ប្រៀបដូចទិសខាងលិច នៃប្រទេសកម្ពុជា ដូចជារាជធានីភ្នំពេញ និងខេត្តព្រះសីហនុ ជាដើម។

សម្ដេចនាយករដ្ឋមន្ត្រីបញ្ជាក់ថា ការពង្រីកពង្រឹងហេដ្ឋារចនាសម្ព័ន្ធ គឺជាចាំបាច់ដើម្បីបំពេញនូវតម្រូវការឧស្សាហ៍កម្ម បើមានសក្ដានុពល ហើយគ្មានហេដ្ឋារចនាសម្ព័ន្ធ ក៏មិនអាចទៅរួចនោះដែរ៕