អគ្គនាយកដ្ឋានអត្តសញ្ញាណកម្ម ជំរុញការផ្ដល់ឯកសារអត្តសញ្ញាណផ្សេងទៀត ជូនប្រជាពលរដ្ឋខ្មែរទូទៅ និងប្រជាពលរដ្ឋខ្មែរ ទើបវិលត្រលប់មកពីថៃ

ភ្នំពេញ៖ ឧត្តមសេនីយ៍ឯក បណ្ឌិត តុប នេត អគ្គនាយក នៃអគ្គនាយកដ្ឋានអត្តសញ្ញាណកម្ម បានធ្វើបទអន្តរាគមន៍ ស្ដីពីការងារជំរុញការផ្ដល់អត្តសញ្ញាណបណ្ណសញ្ជាតិខ្មែរ និងឯកសារអត្តសញ្ញាណផ្សេងទៀត ជូនប្រជាពលរដ្ឋខ្មែរទូទៅ និងប្រជាពលរដ្ឋខ្មែរ ទើបវិលត្រលប់មកពីប្រទេសថៃ ដើម្បីត្រៀមលក្ខណៈក្នុងការចុះឈ្មោះបោះឆ្នោត និងការបោះឆ្នោត នៅឆ្នាំ២០២៧ និងឆ្នាំ២០២៨។

ការធ្វើបទអន្តរាគមន៍របស់ ឯកឧត្តមបណ្ឌិត តុប នេត នាឱកាសអញ្ជើញចូលរួមក្នុងអង្គសន្និបាតត្រួតពិនិត្យលទ្ធផលការងារឆ្នាំ២០២៥ និងលើកទិសដៅការងារឆ្នាំ២០២៦ របស់ក្រសួងមហាផ្ទៃ ក្រោមអធិបតីភាព ឯកឧត្តម សន្តិបណ្ឌិត ម៉ៅ ច័ន្ទតារា រដ្ឋលេខាធិការប្រចាំការ តំណាងដ៏ខ្ពង់ខ្ពស់ ឯកឧត្តមអភិសន្ដិបណ្ឌិត ស សុខា ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ នាថ្ងៃទី៤ ខែកុម្ភៈ ឆ្នាំ២០២៦ នៅទីស្ដីការក្រសួងមហាផ្ទៃ។

ឯកឧត្តម ឧត្តមសេនីយ៍ឯក អគ្គនាយក ក៏បានបង្ហាញអំពីបែបបទ និងនីតិវិធីក្នុងការផ្តល់សំបុត្រកំណើតករណីមានឯកសារគ្រប់គ្រាន់ មេឃុំ-ចៅសង្កាត់ ត្រូវយកចិត្តទុកដាក់ ចុះបញ្ជីកំណើត ស្របតាមនីតិវិធី ករណីបាត់បង់ ឬខូចខាត នាយកដ្ឋានអត្រានុកូលដ្ឋាន ឬរដ្ឋបាល ក្រុង-ស្រុក-ខណ្ឌ ឬរដ្ឋបាលឃុំ-សង្កាត់ ត្រូវយកចិត្តទុកដាក់ចេញសេចក្តីចម្លងជូន។ ករណីពុំមានឯកសារគ្រប់គ្រាន់ ត្រូវសម្រេចដោយ ក្រុមការងារកំណត់ អត្តសញ្ញាណឃុំ-សង្កាត់ (សមាសភាព៤រូប) បែបបទ និងនីតិវិធីនៃការផ្តល់សំបុត្រ កំណើតដោយក្រុមការងារកំណត់ អត្តសញ្ញាណឃុំ-សង្កាត់ ត្រូវអនុវត្តតាមសេចក្តីណែនាំលេខ០៥០ ។

បែបបទនិងនីតិវិធីក្នុងការផ្តល់ សៀវភៅស្នាក់នៅករណីមានឯកសារគ្រប់គ្រាន់ នាយប៉ុស្តិ៍នគរបាលឃុំ-សង្កាត់ ត្រូវយកចិត្តទុកដាក់ចុះបញ្ជីស្នាក់នៅ និងផ្តល់សៀវភៅស្នាក់នៅស្របតាមនីតិវិធីករណីបាត់បង់ ឬខូចខាត នាយប៉ុស្តិ៍ នគរបាលរដ្ឋបាលឃុំ-សង្កាត់ ត្រូវយកចិត្តទុកដាក់ចេញទុតិយតាឱ្យបានឆាប់រហ័ស ករណីពុំមានឯកសារគ្រប់គ្រាន់ ត្រូវមានសាក្សី១រូប ក្រុមការងារកំណត់អត្តសញ្ញាណ ឃុំ-សង្កាត់ត្រូវពិនិត្យ និងសម្រេចឱ្យប៉ុស្តិ៍ នគរបាលឃុំ-សង្កាត់ ចុះឈ្មោះក្នុងបញ្ជី ស្នាក់នៅស្របតាម សេចក្តីណែនាំ លេខ០៥០៕