និស្សិតឥណ្ឌូណេស៊ី ប្រមូលផ្តុំគ្នាធ្វើការតវ៉ានៅរដ្ឋធានីហ្សាការតា ប្រឆាំងគោលនយោបាយរដ្ឋាភិបាល ទាមទារឱ្យបញ្ចប់យុទ្ធនាការផ្តល់អាហារដោយឥតគិតថ្លៃនៅតាមសាលា

ហ្សាការតា៖ នៅថ្ងៃទី២០ តុលា ឆ្នាំ២០២៥ ខួបមួយឆ្នាំដែលលោក ប្រាបូវ៉ូ ស៊ូប៊ីយ៉ានតូ ឡើងកាន់តំណែងជាប្រធានាធិបតីឥណ្ឌូណេស៊ី ខណៈដែលនិស្សិតឥណ្ឌូណេស៊ីបានប្រមូលផ្តុំគ្នាធ្វើការតវ៉ានៅរដ្ឋធានីហ្សាការតា ប្រឆាំងគោលនយោបាយរដ្ឋាភិបាល។ ការតវ៉ានេះកើតឡើង២ ខែបន្ទាប់ពីបាតុកម្មហិង្សាកក្រើកផ្ទៃប្រទេស។

សិស្សប្រហែល៣០០នាក់ពាក់អាវពណ៌លឿង និងពណ៌ខៀវ បានប្រមូលផ្តុំគ្នានៅជិតវិមានប្រធានាធិបតី ខណៈពេលដែលគណៈរដ្ឋមន្ត្រីរបស់លោក ប្រាបូវ៉ូ ជួបប្រជុំគ្នា។ តួលេខនេះគឺតិចជាងចំនួនអ្នកតវ៉ា ដែលដឹកនាំដោយនិស្សិតកាលពីខែសីហា ប្រឆាំងនឹងគោលនយោបាយរបស់រដ្ឋាភិបាល និងអត្ថប្រយោជន៍សមាជិកសភា ដែលរីករាលដាលទូទាំងប្រទេស។

អ្នកតវ៉ាបានកាន់បដាទាមទារឱ្យបញ្ចប់យុទ្ធនាការផ្តល់អាហារដោយឥតគិតថ្លៃនៅតាមសាលារបស់លោក ប្រាបូវ៉ូ សម្រាប់សិស្សរាប់លាននាក់ និងស្ត្រីមានផ្ទៃពោះ ដោយសរសេរថា «កម្មវិធីអាហារឥតគិតថ្លៃ ស្មើនឹងថ្នាំពុល» ក្រោយសិស្សសាលារាប់ពាន់នាក់ពុលអាហារក្នុងសាលារៀន។

និស្សិតវ័យ២៥ឆ្នាំម្នាក់ ឈ្មោះ ម៉ាឡាណា សៃ (Maulana Sai) បានអំពាវនាវឱ្យមានកំណែទម្រង់គោលនយោបាយរបស់រដ្ឋាភិបាល រួមទាំងកម្មវិធីអាហារផងដែរ។ លើសពីនេះ សម្ព័ន្ធនៃក្រុមនិស្សិតដែលនិយមហៅថា BEM SI បានបង្ហោះពីការតវ៉ានៅលើកម្មវិធីអ៊ីនស្តាក្រាម Instagram អមដោយ hashtags «មួយឆ្នាំគឺគ្រប់គ្រាន់ហើយ» និង «មួយឆ្នាំនៃបញ្ហាមិនចេះចប់»។

ដោយឡែក នៅក្នុងសុន្ទរកទៅកាន់គណៈរដ្ឋមន្ត្រី លោក ប្រាបូវ៉ូ បានការពារកម្មវិធីអាហារឥតគិតថ្លៃរបស់ខ្លួន ខណៈសន្យាថានឹងផ្តល់ការអប់រំ និងការថែទាំសុខភាពកាន់តែប្រសើរឡើង។ ដើម្បីផ្តល់មូលនិធិដល់កម្មវិធី ដែលរួមបញ្ចូលផងដែរនូវការពិនិត្យសុខភាពដោយឥតគិតថ្លៃ និងសាលារៀនសម្រាប់ប្រជាជនឥណ្ឌូណេស៊ីក្រីក្រ លោក ប្រាបូវ៉ូ បានកាត់បន្ថយការចំណាយរបស់រដ្ឋាភិបាល ឬបង្វែរប្រាក់ពីវិស័យផ្សេងទៀត ដូចជាការអប់រំជាដើម៕