លោក ដូណាល់ ត្រាំ ចង់ជួបមេដឹកនាំកូរ៉េខាងជើងសាជាថ្មីនៅក្នុងឆ្នាំ២០២៥នេះ និងបើកចំហកិច្ចចរចាពាណិជ្ជកម្មបន្ថែមជាមួយកូរ៉េខាងត្បូង
វ៉ាស៊ីនតោន៖ បើតាមការចេញផ្សាយដោយទីភ្នាក់ងារសារព័ត៌មាន Reuters លោក ដូណាល់ ត្រាំ ប្រធានាធិបតីអាមេរិក នៅថ្ងៃចន្ទ ទី២៥ ខែសីហា (ម៉ោងនៅវ៉ាស៊ីនតោន) បាននិយាយថារូបលោកចង់ជួបមេដឹកនាំកូរ៉េខាងជើង លោក គីម ជុងអ៊ុនសាជាថ្មីនៅក្នុងឆ្នាំ២០២៥នេះ និងបើកចំហកិច្ចចរចាពាណិជ្ជកម្មបន្ថែមជាមួយកូរ៉េខាងត្បូង។
ថ្លែងទៅកាន់ក្រុមអ្នកសារព័ត៌មាននៅឯការិយាល័យពងក្រពើ នាឱកាសទទួលស្វាគមន៍ប្រធានាធិបតីកូរ៉េខាងត្បូង លោក Lee Jae Myung ដែលបំពេញទស្សនកិច្ច ទៅកាន់សេតវិមានជាលើកដំបូងរបស់លោក លោក ត្រាំ បានលើកឡើងថា «ខ្ញុំចង់ជួបគាត់ (លោក គីម ជុងអ៊ុន) នៅក្នុងឆ្នាំនេះ។ ខ្ញុំរក ឱកាសជួបលោក គីម ជុងអ៊ុន នៅពេលស័ក្តិសមនាពេលអនាគត»។ លោក ត្រាំបន្ថែមថាលោកផ្ទាល់ជឿជាក់ថារូបលោកមានគោលជំហរដូចគ្នាទៅនឹងលោក Lee ពាក់ព័ន្ធនឹងកូរ៉េខាងជើង នោះគឺ គាំទ្រដំណោះស្រាយការទូតជាជាងការប្រឈមមុខដាក់គ្នា។
គួរបញ្ជាក់ថា លោក ដូណាល់ ត្រាំ កាលពីអាណត្តិទី១ជាប្រធានាធិបតីអាមេរិកធ្លាប់បានជួបលោក គីម ជុងអ៊ុន ៣លើក។ ប៉ុន្តែក្រុមអ្នកវិភាគបាននិយាយថាលោក គីម បច្ចុប្បន្នហាក់ខ្មើតបន្តិចដោយសារតែទទួលបានការគាំទ្រយ៉ាងខ្លាំងពីរុស្ស៉ី ចាប់តាំងពីរូបលោកសម្រេចចិត្តបញ្ជូនទាហានកូរ៉េខាងជើងទៅជួយជាកម្លាំងដល់កងទ័ពរុស្ស៉ី ក្នុងសង្រ្គាមប្រឆាំងអ៊ុយក្រែន៕
