អ្នកនាំពាក្យរងមហាផ្ទៃ សរសើរពលរដ្ឋនៅកំពង់ឆ្នាំងចំៗ ក្នុងករណីបង្ក្រាបបទល្មើសឆបោកតាមប្រព័ន្ធអនឡាញ

ភ្នំពេញ៖ លោកបណ្ឌិត ទូច សុឃៈ អ្នកនាំពាក្យរងក្រសួងមហាផ្ទៃ បានទាញការកត់សម្គាល់ចំពោះករណីជាក់ស្ដែងមួយដែលប្រជាពលរដ្ឋរស់នៅខេត្តកំពង់ឆ្នាំបង្ហាញភាពជាគំរូនៅក្នុងការអនុវត្តគោលនយោបាយភូមិ-ឃុំ-សង្កាត់មានសុវត្ថភាពតាមរយៈការរាយការណ៍ករណីសង្ស័យនៅមូលដ្ឋានរបស់ខ្លួនទៅកាន់សមត្ថកិច្ចរហូតឈានទៅដល់ការបង្ក្រាប ករណីជនបរទេសលួចលាក់ប្រព្រឹត្តិអំពើឆបោកតាមប្រព័ន្ធអនឡាញ។

ការសរសើរចំៗរបស់អ្នកនាំពាក្យ ធ្វើឡើងបន្ទាប់ពីសមត្ថកិច្ចនគរបាលខេត្តកំពង់ឆ្នាំង បានចុះបង្ក្រាបអំពើឆបោកតាមប្រព័ន្ធអនឡាញ និងបានចាប់ខ្លួនឧក្រិដ្ឋជនសរុប២៤នាក់ ក្នុងនោះមានជនជាតិខ្មែរ១នាក់ វៀតណាម២១ និងចិន២នាក់ ដោយបានរឹបអូសទូរស័ព្ទ និងកុំព្យូទ័រ នាថ្ងៃទី២៣ខែ ឧសភា ឆ្នាំ២០២៥។ បើតាមសមត្ថកិច្ច ក្រុមឧក្រិដ្ឋជនទាំងនោះ បានប្រើប្រាស់ទីតាំងផ្ទះវីឡាមួយកន្លែង ស្ថិតនៅភូមិ ក្រឡាញ់ សង្កាត់ក្រុង កំពង់ឆ្នាំ ដើម្បីឆបោកប្រាក់ និងជំរិតទារប្រាក់ពីអ្នកខ្ចីប្រាក់តាមអនឡាញនៅប្រទេសវៀតណាម។

យោងតាមរបាយការណ៍ តម្រុយដែលឈានរហូតដល់សមត្ថកិច្ចចុះទៅបង្ក្រាបការធ្វើប្រតិបត្តិការនោះ គឺដោយតែមានប្រជាពលរដ្ឋនៅតំបន់នោះចូលរួមរាយការណ៍ ដ្បិតពីដំបូងឡើយ ជនបរទេសទាំងនោះប្រាប់ម្ចាស់ទីតាំងថាគ្រាន់តែជួលស្នាក់២ទៅ៣នាក់ប៉ុណ្ណោះ ក្រោយមកអ្នករស់នៅក្បែរខាងក៏សង្ស័យ ដោយពួកគេឃើញមានជនបរទេសចេញចូលច្រើនទៅៗ ជាហេតុធ្វើឱ្យប្រជាពលរដ្ឋរាយការណ៍ទៅកាន់សមត្ថកិច្ចដើម្បីចុះមកត្រួតពិនិត្យទីតាំង និងឈានដល់ការបង្ក្រាបតែម្ដង។

អ្នកនាំពាក្យដដែល បានលើកទឹកចិត្តឱ្យប្រជាពលរដ្ឋគ្រប់មូលដ្ឋានទាំងអស់មានស្មារតី មនសិការចូលរួមជាមួយអាជ្ញាធរមានសមត្ថកិច្ច ដើម្បីការពារសន្តិសុខ សណ្ដាប់ធ្នាប់សាធារណៈក្នុងមូលដ្ឋានរបស់ខ្លួនតាមរយៈសកម្មភាពដូចដែលពលរដ្ឋនៅខេត្តកំពង់ឆ្នាំងបានធ្វើ គឺត្រូវរាយការណ៍រាល់សកម្មភាពសង្ស័យណាមួយពាក់ព័ន្ធនឹងបទល្មើសគ្រឿងញៀនក្ដី អំពើហិង្សាក្ដី និងអំពើឆបោកនានាដែលនាំឱ្យប៉ះពាល់សន្តិសុខ សណ្ដាប់ធ្នាប់សាធារណៈ ដោយសមត្ថកិច្ចទាំងនគរបាល និងកងរាជអាវុធហត្ថ នឹងធ្វើការតាមជំនាញ មិនឱ្យប៉ះពាល់សុវត្ថិភាពប្រជាពលរដ្ឋឡើយ៊

សូមបញ្ជាក់ថា កន្លងមកសម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា និងឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ក៏បានណែនាំជារឿយៗឱ្យសមត្ថកិច្ចមូលដ្ឋានយកចិត្តទុកដាក់អនុវត្តគោលនយោបាយភូមិ-ឃុំ-សង្កាត់មានសុវត្ថិភាព ប៉ុន្តែបានទទូចថា គោលនយោបាយនេះ អាចជោគជ័យទៅបាន លុះត្រាតែមានការចូលរួមពីសំណាក់បងប្អូនប្រជាពលរដ្ឋផងដែរ៕