ឯកឧត្តមបណ្ឌិត ជ្រុន ថេរ៉ាវ៉ាត ជំរុញឱ្យមន្ទីរអភិវឌ្ឍន៍ជនបទខេត្តកំពត ពង្រឹងគុណភាព និងថែទាំផ្លូវជនបទឱ្យមានភាពធន់ ដើម្បីជំរុញការតភ្ជាប់សេដ្ឋកិច្ចមូលដ្ឋាន
កំពត៖ ក្នុងកិច្ចប្រជុំបូកសរុបលទ្ធផលការងារឆមាសទី១ និងដាក់ចេញទិសដៅការងារឆមាសទី២ ឆ្នាំ២០២៦ កាលពីថ្ងៃទី២៩ ខែមិថុនា ឯកឧត្តមបណ្ឌិត ជ្រុន ថេរ៉ាវ៉ាត រដ្ឋលេខាធិការក្រសួងអភិវឌ្ឍន៍ជនបទ បានណែនាំ និងជំរុញយ៉ាងខ្លាំងដល់មន្ទីរអភិវឌ្ឍន៍ជនបទខេត្តកំពត ឱ្យបន្តយកចិត្តទុកដាក់ខ្ពស់លើការលើកកម្រិតគុណភាព និងការថែទាំហេដ្ឋារចនាសម្ព័ន្ធផ្លូវជនបទ។
ឯកឧត្តមបណ្ឌិត ជ្រុន ថេរ៉ាវ៉ាតទីប្រឹក្សាផ្ទាល់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានគូសបញ្ជាក់ថា ផ្លូវជនបទគឺជាសរសៃឈាមសេដ្ឋកិច្ចដ៏សំខាន់ដែលមិនអាចខ្វះបាន។ ដូច្នេះ មន្ទីរត្រូវធានាឱ្យបាននូវការអនុវត្តការងារសាងសង់ និងថែទាំផ្លូវដែលមាន “ភាពធន់” ទៅនឹងការប្រែប្រួលអាកាសធាតុ និងការប្រើប្រាស់ជាក់ស្តែង ដើម្បីធានាបាននូវនិរន្តរភាពក្នុងការតភ្ជាប់។
ជាមួយគ្នានេះ ឯកឧត្តមបានណែនាំដល់មន្ត្រីមន្ទីរអភិវឌ្ឍន៍ជនបទខេត្តកំពត ឱ្យពង្រឹងការងារផ្គត់ផ្គង់ទឹកស្អាត និងអនាម័យ, ជំរុញចលនាអភិវឌ្ឍន៍សហគមន៍, បង្កើនការបណ្តុះបណ្តាលជំនាញដើម្បីបង្កើតការងារនៅមូលដ្ឋាន, ព្រមទាំងលើកកម្ពស់តម្លាភាព និងប្រសិទ្ធភាពការងារតាមប្រព័ន្ធឌីជីថល ដើម្បីបម្រើប្រជាពលរដ្ឋឱ្យកាន់តែប្រសើរ។
ក្នុងឱកាសនោះ ឯកឧត្តមបណ្ឌិតក៏បានកោតសរសើរចំពោះកិច្ចខិតខំប្រឹងប្រែងរបស់ថ្នាក់ដឹកនាំ និងមន្ត្រីនៃមន្ទីរអភិវឌ្ឍន៍ជនបទខេត្តកំពត ដែលបានបំពេញភារកិច្ចយ៉ាងសកម្មកន្លងមក ហើយបានសំណូមពរឱ្យបន្តរក្សាស្មារតីទទួលខុសត្រូវខ្ពស់ ដើម្បីសម្រេចឱ្យបានតាមគោលដៅនៃផែនការយុទ្ធសាស្ត្ររបស់ក្រសួង ក៏ដូចជាកម្មវិធីនយោបាយរបស់រាជរដ្ឋាភិបាលក្នុងនីតិកាលទី៧
