កុំភ្លេចយប់នេះ! ក្លិបព្រះខ័នរាជស្វាយរៀង របស់កម្ពុជា នឹងត្រូវជួបក្លិប FK Arkadag របស់តួកម៉េនីស្ថាន វគ្គផ្ដាច់ព្រ័ត្រ AFC Challenge League នៅពហុកីឡដ្ឋានជាតិមរតកតេជោ
កីឡា៖ នៅវេលាម៉ោង ៧យប់ថ្ងៃទី១០ ខែឧសភា ឆ្នាំ២០២៥ នេះ ក្លិបព្រះខ័នរាជស្វាយរៀង របស់កម្ពុជា នឹងត្រូវជួបក្លិប FK Arkadag របស់ប្រទេសតួកម៉េនីស្ថាន វគ្គផ្ដាច់ព្រ័ត្រ AFC Challenge League 2024/25 នៅពហុកីឡដ្ឋានជាតិមរតកតេជោ រាជធានីភ្នំពេញ។
ជុំវិញព្រឹត្តិការណ៍នេះ គ្រូបង្វឹកក្រុមទាំងពីរ បានបង្ហាញពីការត្រៀមខ្លួនរួចរាល់ ដើម្បីប្រជែងពាន ស្របពេលអ្នកគាំទ្រភ្លូកទឹកភ្លូកដី កំពុងទន្ទឹងរង់ចាំការប្រកួតនេះ ពិសេសអ្នកគាំទ្របាល់ទាត់កម្ពុជា ដែលត្រៀមចូលរួមទស្សនាផ្ទាល់ជាង ៥ម៉ឺននាក់ ក៏ដូចជាការទស្សនាតាមស្លាយ (LED) នៅតាមរាជធានី-ខេត្តជាច្រើន ដែលបានប្រកាសរៀបចំការផ្សាយបន្ដផ្ទាល់ពីការប្រកួតវគ្គផ្ដាច់ព្រ័ត្រនេះ។
គួរដឹងថា សំបុត្រចូលទស្សនាការប្រកួតវគ្គផ្ដាច់ព្រ័ត្រ AFC Challenge League 2024/25 រវាងព្រះខ័នរាជស្វាយរៀង និង FK Arkdaga យប់នេះ ចំនួន ៥៣,០០០សំបុត្រ ត្រូវបានប្រកាសលក់អស់តាំងពីថ្ងៃទី៧ ខែឧសភា។ នេះជាលើកដំបូងហើយ ដែលវគ្គផ្ដាច់ព្រ័ត្រពានកម្រិតទ្វីបអាស៊ី បានរៀបចំការប្រកួតនៅកម្ពុជា៕
