សម្តេចធិបតី៖ ការកែទម្រង់វិមជ្ឈការ និងវិសហមជ្ឈការរាជរដ្ឋាភិបាលបានចាប់ផ្តើមសិក្សា ដោយមានការពិគ្រោះយោបល់យ៉ាងទូលំទូលាយ និងល្អិតល្អន់អំពីជម្រើសនានាសម្រាប់ ការរៀបចំនិងការអនុវត្តគោលនយោបាយវិមជ្ឈការនាឆ្នាំ១៩៩៩

ភ្នំពេញ៖ ក្នុងឱកាសអញ្ជើញជាអធិបតីក្នុងវេទិការវាងរាជរដ្ឋាភិបាល និងរដ្ឋបាលថ្នាក់ក្រោមជាតិ លើកទី១ (២០២៤-២០២៥) ស្តីពី “កំណែទម្រង់វិមជ្ឈការ និងវិសហមជ្ឈការ ដើម្បីចូលរួមសម្រេចបានចក្ខុវិស័យកម្ពុជាឆ្នាំ២០៥០” នៅសណ្ឋាគារសុខាភ្នំពេញ នាថ្ងៃទី១៨ ខែមីនា ឆ្នាំ២០២៥នេះ សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានថ្លែងថា ចំពោះការកែទម្រង់វិមជ្ឈការ និងវិសហមជ្ឈការ, រាជរដ្ឋាភិបាលបានចាប់ផ្តើមសិក្សា ដោយមានការពិគ្រោះយោបល់យ៉ាងទូលំទូលាយ និងល្អិតល្អន់អំពីជម្រើសនានាសម្រាប់ ការរៀបចំ និងការអនុវត្តគោលនយោបាយវិមជ្ឈការនាឆ្នាំ១៩៩៩។

សម្តេចធិបតី បន្តថា រាជរដ្ឋាភិបាលបានចាត់ទុកការកែទម្រង់នេះ ជាការកែទម្រង់ស្នូលមានលក្ខណៈជាប្រព័ន្ធដ៏ មានសារសំខាន់មួយក្នុងចំណោមការដ្ឋានកែទម្រង់ស្នូលនានា ដើម្បីកសាងមូលធនសង្គម (social capital) និង មូលធននយោបាយ (political capital) ដែលជាបុរេលក្ខខណ្ឌសម្រាប់ ការស្តារ និងការអភិវឌ្ឍប្រទេសជាតិឡើងវិញលើគ្រប់វិស័យ។

សម្តេចធិបតី បន្ថែមថា បន្ទាប់ពីកម្ពុជាទទួលបានសុខសន្តិភាព, ការឯកភាពជាតិ និងការឯកភាពទឹកដី ពេញលេញតាមរយៈ «នយោបាយឈ្នះ-ឈ្នះ» ផ្តួចផ្តើម និងដឹកនាំអនុវត្តដោយ សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភារាជរដ្ឋាភិបាលបានចាប់ផ្ដើម កែទម្រង់លើគ្រប់វិស័យ ដើម្បីធានារក្សាឱ្យបាននូវសុខសន្តិភាព, សន្តិសុខ សណ្តាប់ធ្នាប់ សាធារណៈ និងសុវត្ថិភាពសង្គម ក្នុងគោលដៅអភិវឌ្ឍសង្គម-សេដ្ឋកិច្ចតាមបែបប្រជាធិបតេយ្យ៕