ឧបនាយករដ្ឋមន្ត្រី ហង់ជួន ណារ៉ុន៖ កម្ពុជាមានតម្រូវការក្នុងការពង្រឹងអង្គអធិការ ព្រោះអធិការកិច្ចសាលារៀន ជាគន្លឹះសម្រាប់សម្រេចបានគោលដៅអប់រំរបស់កម្ពុជា

ភ្នំពេញ៖ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា អមដំណើរដោយមន្ត្រីពាក់ព័ន្ធក្រោមឱវាទ នាថ្ងៃទី១១ ខែកុម្ភៈ ឆ្នាំ២០២៥ បានទទួលជួបសម្តែងការគួរសម និងពិភាក្សាការងារ ជាមួយ លោក Olivier BRANDOUY អគ្គនាយកនៃ France Éducation International នៅស្ថានទូតកម្ពុជាប្រចាំទីក្រុងប៉ារីស ប្រទេសបារាំង។

ក្នុងឱកាសនេះ លោកអគ្គនាយក បានបង្ហាញពីបេសកកម្ម និងចក្ខុវិស័យរបស់ France Education Internationale ដែលជាអង្គភាពមួយស្ថិតក្នុងរចនាសម្ព័ន្ធរបស់ក្រសួងអប់រំជាតិបារាំង មានបេសកកម្មជាបណ្តាញនៃការពង្រាយអ្នកឯកទេសអប់រំនៅក្នុងវិស័យអប់រំ និងធ្វើកិច្ចអន្តរាគមន៍ចាប់ពីថ្នាក់មត្តេយ្យរហូតដល់ឧត្តមសិក្សា ដោយផ្តោតលើជំនួយផ្នែកបច្ចេកទេសនៃកិច្ចសហប្រតិបត្តិការ ផ្នែកអភិបាលកិច្ច ផ្នែកគ្រប់គ្រងហិរញ្ញវត្ថុ និងលើខ្លឹមសារនៃប្រព័ន្ធអប់រំដូចជា កម្មវិធីសិក្សា សៀវភៅសិក្សាគោលជាដើម។ លោកអគ្គនាយក បានបង្ហាញពីចំណាប់អារម្មណ៍ក្នុងការភ្ជាប់ទំនាក់ទំនងកិច្ចសហប្រតិបត្តិការជាមួយកម្ពុជា ដោយផ្តោតលើការបញ្ជូនអ្នកឯកទេស និងការលើកកម្ពស់គុណភាពនៃការរៀន និងបង្រៀនភាសាបារាំងនៅកម្ពុជា និងលទ្ធភាពផ្សេងទៀតដែលស្ថិតក្រោមសមត្ថកិច្ចរបស់រចនាសម្ព័ន្ធនេះ។

ក្នុងឱកាសនេះដែរ ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានលើកឡើងពីលទ្ធភាពក្នុងការផ្សារភ្ជាប់កិច្ចសហប្រតិបត្តិការរវាងកម្ពុជាជាមួយនឹង France Education Internationale លើផ្នែក ១) កិច្ចសហប្រតិបត្តិការនៅឧត្តមសិក្សា ជាពិសេសជាមួយនឹងសាកលវិទ្យាល័យសាធារណៈដែលជាសមាជិករបស់ទីភ្នាក់ងារសាកលវិទ្យាល័យប្រើប្រាស់ភាសាបារាំង ២) ការបណ្តុះបណ្តាលគ្រូទាំងកម្រិតបណ្តុះបណ្តាលដំបូង និងបន្តដើម្បីធ្វើឱ្យមានឧត្តមភាព។ ក្នុងន័យនេះ ក្រសួងអប់រំ យុវជន និងកីឡា អាចសម្របសម្រួលដើម្បីឱ្យមានទម្រង់កិច្ចសហប្រតិបត្តិការរវាងគ្រឹះស្ថានសិក្សានៅកម្ពុជា និង France Education Internationale ក្នុងការកែលម្អគុណភាពនៃការបង្រៀន និងរៀនភាសាបារាំង នៅកម្ពុជានៅតាមគ្រឹះស្ថានឧត្តមសិក្សា និងមួយវិញទៀត ផ្តោតទៅលើកម្មវិធីសិក្សាសញ្ញាបត្រ Double Diplôme ដែលមានការទទួលស្គាល់ពីប្រទេសបារាំង និងកម្ពុជានៅកម្រិតឧត្តមសិក្សា។

ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានស្នើឱ្យក្រុមការងារទាំងពីរភាគីសិក្សាបន្ថែមពីទម្រង់នៃកិច្ចសហប្រតិបត្តិការដែលអាចធ្វើឡើងរវាងរចនាសម្ព័ន្ធ France Education Internationale និងក្រសួងអប់រំ យុវជន និងកីឡា ដើម្បីពង្រឹងកិច្ចសហប្រតិបត្តិការរវាងកម្ពុជានិងបារាំង ជាពិសេសក្នុងពេលដែលកម្ពុជាកំពុងរៀបចំខ្លួនដើម្បីទទួលកិច្ចប្រជុំកំពូលហ្វ្រង់កូហ្វូនីនៅឆ្នាំ២០២៦ ខាងមុននេះ។

ជាមួយគ្នានោះ ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានលើកឡើងអំពីការអប់រំឌីជីថល ក្នុងកំណែទម្រង់វិស័យអប់រំ ដែលអាចទទួលបានកិច្ចសហប្រតិបត្តិការជាមួយនឹង Expertise France និង France Education Internationale ព្រមទាំងបានស្នើឱ្យក្រុមការងារទាំងពីរភាគីសិក្សាលើកម្មវិធីបណ្តុះបណ្តាលនៅឧត្តមសិក្សាក្នុងវិស័យបញ្ញាសិប្បនិម្មិត ដើម្បីបង្កើតនូវកម្មវិធីកិច្ចសហប្រតិបត្តិការពហុភាគីក្នុងការជំរុញ និងលើកកម្ពស់វិស័យនេះឱ្យកាន់តែមានប្រសិទ្ធភាព។

ជាការឆ្លើយតប អគ្គនាយកនៃ France Education Internationale បានគូសបញ្ជាក់ពី ការយកចិត្តទុកដាក់លើផ្នែកវិទ្យាសាស្ត្រ និងបច្ចេកវិទ្យា ក្នុងន័យនេះ ការពង្រឹងកិច្ចសហប្រតិបត្តិការផ្នែកបញ្ញាសិប្បនិម្មិត គឺជាចំណុចអាទិភាពមួយដែលនឹងត្រូវពិចារណាសម្រាប់កិច្ចសហប្រតិបត្តិការរវាងកម្ពុជា និងបារាំង , ការផ្តោតលើឧត្តមសិក្សា អភិបាលកិច្ចសាកលវិទ្យាល័យ ការផ្លាស់ប្តូរជំនាញការរវាងគ្នានឹងគ្នា ការពង្រឹងការសិក្សាភាសាបារាំង និងជាភាសាបារាំង ដោយ France Education Interntionale នឹងស្វែងរកដៃគូរវាងសាកលវិទ្យាល័យ និងសាកលវិទ្យាល័យបារាំង-កម្ពុជា ដើម្បីពង្រឹងការបណ្តុះបណ្តាលបច្ចេកទេស និងវិជ្ជាជីវៈដល់និស្សិតកម្ពុជា។ ចំពោះកិច្ចប្រជុំកំពូលហ្វ្រង់កូហ្វូនីវិញ France Education Internationale នឹងសហការជិតស្និទ្ធជាមួយនឹងកម្ពុជាដើម្បីឱ្យកិច្ចប្រជុំនេះប្រព្រឹត្តទៅដោយរលូន។

បន្ថែមពីនេះ ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានលើកឡើងថា កម្ពុជាមានតម្រូវការក្នុងការពង្រឹងអង្គអធិការ ព្រោះអធិការកិច្ចសាលារៀនគឺជាគន្លឹះសម្រាប់សម្រេចបានគោលដៅអប់រំរបស់កម្ពុជា។ ការបណ្តុះបណ្តាលអធិការអប់រំ ការប្រើប្រាស់បញ្ញាសិប្បនិម្មិតក្នុងជួរគ្រូបង្រៀន ការបណ្តុះបណ្តាលគ្រូបង្រៀនឱ្យប្រើប្រាស់បញ្ញាសិប្បនិម្មិត គឺជាកិច្ចការបន្ទាន់ដែលត្រូវធ្វើក្នុងដំណាក់កាលនេះ ដើម្បីធានាបាននូវគុណភាពនៃការរៀន និងបង្រៀនឆ្លើយតបទៅនឹងការអភិវឌ្ឍសង្គម សេដ្ឋកិច្ច។សាជាថ្មីម្តងទៀត ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានកោតសរសើរ និងថ្លែងអំណរគុណយ៉ាងជ្រាលជ្រៅដល់ France Éducation International ចំពោះការបន្តជួយគាំទ្រដល់វិស័យអប់រំនៅកម្ពុជានាពេលកន្លងមក ដោយគូសបញ្ជាក់នូវការរំពឹងថានឹងមានកិច្ចសហប្រតិបត្តិការកាន់តែច្រើនបន្ថែមទៀតលេចចេញជារូបរាងជាបន្តបន្ទាប់ ឆ្លើយតបនឹងចក្ខុវិស័យអភិវឌ្ឍធនធានមនុស្សរបស់រាជរដ្ឋាភិបាលកម្ពុជា ក៏ដូចជាចក្ខុវិស័យអប់រំរបស់ France Éducation International។

គួរបញ្ជាក់ដែរថា France Education Internationale ជារចនាសម្ព័ន្ធមួយរបស់ក្រសួងអប់រំជាតិបារាំង ដែលមានបេសកកម្ម ៖ (១). ផ្តល់ការបណ្តុះបណ្តាល៖ ផ្តោតជាសំខាន់លើការបណ្តុះបណ្តាលផ្នែករង្វាយតម្លៃ និងវិញ្ញាបនបត្រ ការបណ្តុះបណ្តាលជាភាសាបារាំង ការបណ្តុះបណ្តាលមុខវិជ្ជាឯកទេសផ្នែកភាសាបារាំងក្នុងពិភពលោក ការដាក់ឱ្យប្រើប្រាស់គេហទំព័រ FEI+ ដែលជាគេហទំព័រសម្រាប់ការបណ្តុះបណ្តាលពីចម្ងាយ និងវគ្គសិក្ខាសាលាបណ្តុះបណ្តាលគ្រូបង្រៀនផ្នែកអន្តរជាតិ (២). ការផ្តល់សញ្ញាបត្រ និងការធ្វើតេស្តផ្នែកភាសា (៣). ការសិក្សាដើម្បីទទួលបានសញ្ញាបត្រ ដោយផ្តោតលើម៉ូឌុលបណ្តុះបណ្តាលផ្ទាល់ ឬពីចម្ងាយដែលត្រូវបានទទួលស្គាល់ដោយរចនាសម្ព័ន្ធនេះ ដូចជាផ្នែកគរុកោសល្យបង្រៀនភាសាបារាំងជាដើម។ល។ (៤). ការទទួលស្គាល់សញ្ញាបត្រ ដែលផ្តោតលើការទទួលស្គាល់សញ្ញាបត្រមកពីបរទេស (៥). ការចេញទៅធ្វើការនៅបរទេសរបស់អ្នកឯកទេសជនជាតិបារាំង (៦). ការមកសិក្សានៅប្រទេសបារាំង និង(៧). ការរៀបចំសិក្ខាសាលាផ្សេងផ្តោតលើវិស័យអប់រំ៕