បរទេស៖ សមាគមបាល់ទាត់ប៉ូឡូញ (PZPN) បានប្រកាសផ្តល់មូលនិធិជាង ៤៥០,០០០ដុល្លារដើម្បីជួយក្លឹបដែលរងផលប៉ះពាល់ដោយទឹកជំនន់ធ្ងន់ធ្ងរនៅអឺរ៉ុបកណ្តាល ដែលជាទឹកជំនន់ដ៏អាក្រក់បំផុតដែលបានវាយប្រហារក្នុងតំបន់ក្នុងរយៈពេលពីរទសវត្សរ៍។
មនុស្សយ៉ាងហោចណាស់ ២៤នាក់បានស្លាប់ដោយសារទឹកជំនន់ រួមទាំង ៧នាក់នៅក្នុងប្រទេសប៉ូឡូញ ជាមួយនឹងទីក្រុង Wroclaw ដែលជាទីក្រុងធំទី៣ របស់ប្រទេសប៉ូឡូញ កំពុងប្រឈមនឹងការខូចខាតយ៉ាងទូលំទូលាយ។
ប្រធានសមាគម PZPN លោក Cezary Kulesza បានសរសេរនៅលើ X កាលពីថ្ងៃសុក្រថា រួមគ្នាជាមួយប្រធានសមាគមខេត្ត យើងបានសម្រេចចិត្តបរិច្ចាគ ១.៧៥លាន zloty ប៉ូឡូញ ដើម្បីជួយក្លឹបដែលរងផលប៉ះពាល់ដោយទឹកជំនន់។
ក្លឹបបាល់ទាត់កំពូល Slask Wroclaw បានពន្យារពេលការប្រកួតក្នុងផ្ទះនៅថ្ងៃច័ន្ទជាមួយ Stal Mielec ហើយបានប្រែក្លាយកីឡដ្ឋានរបស់ពួកគេទៅជាកន្លែងសម្រាប់ប្រមូលអំណោយសម្រាប់អ្នកដែលរងផលប៉ះពាល់ដោយទឹកជំនន់។
ក្លឹបក៏បានបើកការរៃអង្គាសថវិកាសម្រាប់ការសង្គ្រោះទឹកជំនន់ ខណៈដែលកីឡាករ និងគ្រូបង្វឹកបានទៅលេងតំបន់រងគ្រោះដោយទឹកជំនន់ ដើម្បីចែកចាយរបស់របរសំខាន់ៗ។
សហភាពអឺរ៉ុបបានសន្យាថានឹងផ្តល់ប្រាក់រាប់ពាន់លានអឺរ៉ូដើម្បីជួយដល់តំបន់នេះ ដោយនាយករដ្ឋមន្ត្រីប៉ូឡូញ លោក Donald Tusk បាននិយាយថា ប្រទេសនេះអាចទទួលបាន ៥ពាន់លានអឺរ៉ូ (៥.៥៩ពាន់លានដុល្លារ)។
