លោកស្រី កាម៉ាឡា ហារីស និងលោក ដូណាល់ ត្រាំ បង្ហាញទស្សនៈខុសគ្នាស្រឡះ ខណៈការបោះឆ្នោតប្រធានាធិបតីកាន់តែកៀក
វ៉ាស៊ីនតោន៖ ដោយនិយាយអំពីនយោបាយ និងបុគ្គលិកលក្ខណៈ លោកស្រី កាម៉ាឡា ហារីស និងលោក ដូណាល់ ត្រាំ បានបង្ហាញទស្សនៈខុសគ្នាស្រឡះរបស់ពួកគេសម្រាប់ប្រទេស ខណៈការជួបគ្នាលើកដំបូង កាលពីថ្ងៃអង្គារទី១០ ខែកញ្ញា អាចជាការជជែកដេញដោលតែមួយគត់របស់ពួកគេ មុនការបោះឆ្នោតប្រធានាធិបតីខែវិច្ឆិកាមកដល់។
អនុប្រធានាធិបតីគណបក្សប្រជាធិបតេយ្យ និងអតីតប្រធានាធិបតីមកពីគណបក្សសាធារណរដ្ឋ បានចូលទៅកន្លែងក្នុងមជ្ឈមណ្ឌលរដ្ឋធម្មនុញ្ញជាតិ ក្នុងទីក្រុងហ្វីឡាឌែលហ្វ្យ៉ា Philadelphia។ បន្ទាប់មកពួកគេបានចាប់ដៃគ្នា ធ្វើឱ្យមនុស្សជាច្រើនភ្ញាក់ផ្អើល មុនពេលធ្វើដំណើរទៅកាន់វេទិកាជជែកដេញដោលពីគោលនយោបាយរៀងខ្លួន។ សង្គ្រាមពាក្យសម្តីដែលត្រូវបានផ្សាយផ្ទាល់នៅលើកញ្ចក់ទូរទស្សន៍ ABC News មានអ្នកតាមដានរាប់សិបលាននាក់ មានរយៈពេលប្រហែល៩០នាទី។ ដូចដែលបានព្រមព្រៀងគ្នា មិនមានទស្សនិកជនចូលទស្សនាទេ ហើយមីក្រូហ្វូនរបស់បេក្ខជនត្រូវបានបិទ នៅពេលដែលវាមិនមែនជាវេនរបស់ខ្លួននិយាយ។
ការជជែកដេញដោលនេះ បានផ្តល់ឱ្យជនជាតិអាម៉េរិកនូវទិដ្ឋភាពលម្អិតបំផុតរបស់ពួកគេចំពោះយុទ្ធនាការមួយ ដែលត្រូវបានផ្លាស់ប្ដូរយ៉ាងខ្លាំងចាប់តាំងពីការជជែកដេញដោលចុងក្រោយនៅក្នុងខែមិថុនា និងបានបង្ខំឱ្យលោកប្រធានាធិបតី ចូ បៃឌិន ដកខ្លួនចេញពីការប្រជែងតំណែងប្រធានាធិបតី។ នៅសល់តែ៥៦ថ្ងៃទៀតប៉ុណ្ណោះ ការបោះឆ្នោតនៅថ្ងៃទី៥ ខែវិច្ឆិកា ចូលមកដល់។ លោក ត្រាំ និងលោកស្រី ហារីស បានប៉ះទង្គិចគ្នាជុំវិញការរំលូតកូន សេដ្ឋកិច្ច អន្តោប្រវេសន៍ និងបញ្ហាផ្លូវច្បាប់របស់លោក ត្រាំ។
ជុំវិញបញ្ហាសេដ្ឋកិច្ច លោកស្រី ហារីស បានវាយប្រហារលើចេតនារបស់លោក ត្រាំ ក្នុងការដាក់ពន្ធខ្ពស់លើទំនិញបរទេស ជាសំណើដែលលោកស្រីបានប្រដូចទៅនឹងពន្ធលើការលក់របស់មនុស្សថ្នាក់កណ្តាល ខណៈដែលលោកស្រីបានលម្អិតអំពីផែនការរបស់ខ្លួនក្នុងការផ្ដល់អត្ថប្រយោជន៍ពន្ធដល់គ្រួសារ និងអាជីវកម្មខ្នាតតូច។ ចំណែក លោក ត្រាំ ដែលមានវ័យ៧៨ឆ្នាំ បានរិះគន់លោកស្រី ហារីស ចំពោះអតិផរណាដែលជាប់លាប់ក្នុងអំឡុងពេលនៃការគ្រប់គ្រងរបស់លោក បៃឌិន។ គួរជម្រាបថា សម្ពាធដ៏ខ្លាំងជាងគេរបស់ លោកស្រី ហារីស នោះគឺ លោកស្រី ជាស្ត្រីទីមួយរបស់អាម៉េរិក និងជាជនជាតិស្បែកខ្មៅមានតួនាទីជាអនុប្រធានាធិបតី៕
