ក្រសួងមុខងារសាធារណៈ រៀបចំវេទិកាជូនមន្ត្រីរាជការក្នុងវិស័យសុខាភិបាលទូទាំងប្រទេសចែករំលែកបទពិសោធជុំវិញការគ្រប់គ្រង និងការផ្តល់សេវាសាធារណៈ ជូនគ្នាទៅវិញទៅមក

ភ្នំពេញ៖ ដើម្បីចែករំលែកព័ត៌មាន និងបទពិសោធល្អៗ ពាក់ព័ន្ធទៅនឹងការប្រឡងប្រជែងអង្គភាពផ្តល់សេវាសាធារណៈគំរូ ក្នុងវិស័យសុខាភិបាល ក្រសួងមុខងារសាធារណៈ បានរៀបចំសិក្ខាសាលាចែករំលែកបទពិសោធនៃការគ្រប់គ្រង និងការផ្តល់សេវាសាធារណៈរបស់ជ័យលាភីអង្គភាពផ្តល់សេវាសាធារណៈគំរូ ក្នុងវិស័យសុខាភិបាល ឆ្នាំ២០២៣ សម្រាប់កម្រិតមណ្ឌលសុខភាព។ សិក្ខាសាលានេះ ទទួលបានការអញ្ជើញចូលរួមបើក ក្រោមអធិបតីភាព ឯកឧត្តម យក់ ប៊ុនណា រដ្ឋលេខាធិការប្រចាំការ តំណាងដ៏ខ្ពង់ខ្ពស់ ឯកឧត្តម ហ៊ុន ម៉ានី ឧបនាយករដ្ឋមន្រ្តី រដ្ឋមន្រ្តីក្រសួងមុខងារសាធារណៈ នៅមជ្ឈមណ្ឌលសិរីមង្គល ស្ថិតក្នុងទីរួមខេត្តពោធិ៍សាត់ នាព្រឹកថ្ងៃទី៣ ខែកញ្ញា ឆ្នាំ២០២៤។ សិក្ខាសាលារយៈពេលពីថ្ងៃ មានការអញ្ជើញចូលរួមពី តំណាងរដ្ឋបាលរាជធានី-ខេត្ត តំណាងមន្ទីរមុខងារសាធារណៈ តំណាងមន្ទីរសុខាភិបាល តំណាងការិយាល័យសុខាភិបាលស្រុកប្រតិបត្តិ ក្រុង ស្រុក ខណ្ឌ តំណាងមណ្ឌលសុខភាព មកពីទូទាំងប្រទេស មានចំនួនសរុប ៦៧៨នាក់ ដើម្បីចែករំលែកបទពិសោធពីអង្គភាពជ័យលាភីក្នុងការផ្តល់សេវាសាធារណៈគំរូ និងទទួលព័ត៌មាននានាឆ្ពោះទៅកាន់ការប្រកួតប្រជែងនាឆ្នាំបន្ទាប់។

ថ្លែងក្នុងពិធីបើកសិក្ខាសាលា ឯកឧត្តមរដ្ឋលេខាធិការប្រចាំការ បានមានប្រសាសន៍ពីគោលបំណងនៃសិក្ខាសាលានេះ នោះគឺដើម្បីជំរុញមណ្ឌលសុខភាពទាំងអស់ទូទាំងប្រទេស ឱ្យចូលរួមក្នុងចលនាប្រឡងប្រជែង ចែករំលែកបទពិសោធល្អៗប្រកបដោយនវានុវត្តន៍ និងជំរុញកៀរគរលើទឹកចិត្តដល់សហគមន៍ អាជ្ញាធរដែនដី ដៃគូរអភិវឌ្ឍនានា និងគ្រប់ភាគីពាក់ព័ន្ធទាំងអស់ ដើម្បីចូលរួមអភិវឌ្ឍមណ្ឌលសុខភាព និងធានាដល់ដំណើរការនៃការផ្តល់សេវានៅតាមណ្ឌលសុខភាពប្របដោយគុណភាព និងប្រសិទ្ធភាពជូនប្រជាពលរដ្ឋ។

ឯកឧត្តមបានបន្ថែមថា «សិក្ខាសាលានេះ គឺវេទិកាដ៏មានសារៈសំខាន់សម្រាប់ការរៀនសូត្រ និងទទួលបទពិសោធពីគ្នាទៅវិញទៅមក ដើម្បីធ្វើជាមូលដ្ឋានក្នុងការពង្រឹងការគ្រប់គ្រង និងកែលម្អគុណភាពសេវានៅក្នុងអង្គភាពរបស់ខ្លួនឱ្យកាន់តែប្រសើរឡើង ហើយមិនត្រឹមតែផ្តល់ទស្សនាទានថ្មីៗប៉ុណ្ណោះទេ ប៉ុន្តែនឹងផ្តល់ចំណេះដឹង ការបង្កើតទំនាក់ទំនង បទពិសោធល្អៗដែលត្រូវនឹងបរិបទនិងស្ថានភាពជាក់ស្តែងថែមទៀតផង»។

បន្ទាប់ពីពិធីប្រកាសបើកអង្គសិក្ខាសាលារួចមក ឯកឧត្តមរដ្ឋលេខាធិការប្រចាំការ បានចុះទស្សនកិច្ចតាមស្តង់ពិព័រណ៍នានា របស់អង្គភាពជ័យលាភីផ្តល់សេវាសាធារណៈគំរូចំណាត់ថ្នាក់ ក្នុងវិស័យសុខាភិបាល (កម្រិតមណ្ឌលសុខភាព) មកពីបណ្តាខេត្តផ្សេងៗដែលបានដាក់តាំងបង្ហាញពីសមិទ្ធផលសំខាន់ៗរបស់ខ្លួន នៅក្នុងបរិវេណទីធ្លាអង្គសិក្ខាសាលាផងដែរ។

សូមជម្រាបជូនថា សិក្ខាសាលាចែករំលែកបទពិសោធនៃការគ្រប់គ្រង និងការផ្តល់សេវាសាធារណៈរបស់ជ័យលាភីអង្គភាពផ្តល់សេវាសាធារណៈគំរូ ក្នុងវិស័យសុខាភិបាល ឆ្នាំ២០២៣ សម្រាប់កម្រិតមណ្ឌលសុខភាព នេះ ត្រូវបានរៀបចំធ្វើឡើងជាលើកទី២ បន្ទាប់ពីសិក្ខាសាលាចែករំលែកបទពិសោធនៃការគ្រប់គ្រង និងការផ្តល់សេវាសាធារណៈរបស់ជ័យលាភីអង្គភាពផ្តល់សេវាសាធារណៈគំរូ ក្នុងវិស័យអប់រំ ឆ្នាំ២០២៣ សម្រាប់កម្រិតបឋមសិក្សា ត្រូវបានធ្វើឡើងកាលពីថ្ងៃទី១៦ ដល់ថ្ងៃទី១៧ ខែសីហា ឆ្នាំ២០២៤ នៅខេត្តស្វាយរៀង កន្លងទៅ ៕