ឯកឧត្តមបណ្ឌិត ថេង ច័ន្ទសង្វារ ជួបសំណេះសំណាលពិភាក្សាការងារជាមួយ អនុរដ្ឋមន្ត្រីក្រសួងទំនាក់ទំនងអន្តរជាតិ នៃគណៈមជ្ឈឹមបក្សកុម្មុយនីស្តចិន

ភ្នំពេញ៖ នៅរសៀលថ្ងៃពុធ ៥រោច ខែជេស្ឋ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី២៦ ខែមិថុនា ឆ្នាំ២០២៤ ឯកឧត្តមបណ្ឌិត ថេង ច័ន្ទសង្វារ សមាជិកគណៈកម្មាធិការកណ្តាលគណបក្សប្រជាជនកម្ពុជា និងជាអនុប្រធានយុវជនគណបក្សថ្នាក់កណ្តាល បានអញ្ជើញដឹកនាំគណៈប្រតិភូយុវជនគណបក្សប្រជាជនកម្ពុជាថ្នាក់កណ្តាល ជួបពិភាក្សាការងារជាមួយ លោកជំទាវ ស៊ុន ហាយយាន អនុរដ្ឋមន្ត្រីក្រសួងទំនាក់ទំនងអន្តរជាតិ នៃគណៈមជ្ឈឹមបក្សកុម្មុយនីស្តចិន (H.E. Sun Haiyan, Vice Minister of the International Department of the CPC Central Committee)។

ក្នុងឱកាសនោះ លោកជំទាវ បានធ្វើការស្វាគមន៍យ៉ាងកក់ក្តៅចំពោះគណៈប្រតិភូយុវជនគណបក្សប្រជាជនកម្ពុជាថ្នាក់កណ្តាល និងបានមានប្រសាសន៍លើកឡើងពីមិត្តភាពកម្ពុជា-ចិន ដែលមានចាប់តាំងពី សម្តេចព្រះនរោត្តម សីហនុ ព្រះបរមរតនកោដ្ឋ មកដល់សម្តេចអគ្គមហាសេនាបតីតេជោ ហ៊ុន សែន ប្រធានគណបក្សប្រជាជនកម្ពុជា និងប្រធានព្រឹទ្ធសភា រហូតមកដល់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា អនុប្រធានគណបក្សប្រជាជនកម្ពុជា និងជាប្រធានយុវជនគណបក្សថ្នាក់កណ្តាល។

លោកជំទាវ ក៏បានលើកឡើងពីចំណងសាមគ្គីភាពដ៏រឹងមាំ និងការជួយគាំទ្រគ្នាទៅវិញទាំងក្នុងក្របខ័ណ្ឌការងារគណបក្ស និងទាំងក្របខ័ណ្ឌរដ្ឋាភិបាលនៃប្រទេសទាំងពីរ។

ជាការឆ្លើយតប ឯកឧត្តមបណ្ឌិតប្រធានប្រតិភូ បានមានប្រសាសន៍អំពីការផ្តាំផ្ញើសាកសួរសុខទុក្ខពីសំណាក់ សម្តេចមហាបវរធិបតី ហ៊ុន ម៉ាណែត ជូនចំពោះថ្នាក់ដឹកនាំ និងប្រជាជនចិន។ ឯកឧត្តមបណ្ឌិត ក៏លើកឡើងពីទំនាក់ទំនងរវាងប្រទេសទាំងពីរចិន និងកម្ពុជា ដែលកើតមានឡើងអស់រយៈពេលប្រមាណ៦៦ឆ្នាំ មកហើយ។ មិត្តភាពនេះ បានវិវឌ្ឍកាន់ប្រសើរទៅៗពីមួយជំនាន់ទៅមួយជំនាន់ រហូតដល់ពេលនេះ ក្លាយជាមិត្តភាពដែកថែប ក្រោមក្របខណ្ឌនៃកិច្ចសហប្រតិបត្តិការគ្រប់ជ្រុងជ្រោយ ឈរលើគោលការណ៍ឯករាជ្យ ស្មើភាពគ្នា គោរពគ្នាទៅវិញទៅមក និងមិនជ្រៀតជ្រែកកិច្ចការ ផ្ទៃក្នុងគ្នា។ ក្នុងគោលដៅរក្សា ពង្រឹង និងពង្រីកមិត្តភាពដែកថែបនេះ កាន់តែរឹងមាំស្ថិតស្ថេរចីរកាល សម្តេចធិបតី ហ៊ុន ម៉ាណែត នាយករដ្ឋមន្រ្តី នៃកម្ពុជា ក៏បានផ្តួចផ្តើមរៀបចំផ្ទះយុវជនដើម្បីមិត្តភាពកម្ពុជា-ចិន ដើម្បីឱ្យយុវជនបន្តវេនជំនាន់ក្រោយនៃប្រទេសទាំងពីរបង្កើនទំនាក់ទំនងតាមរយៈការសិក្សាស្វែងយល់ និងអភិវឌ្ឍរួមគ្នាលើវិស័យសេដ្ឋកិច្ច សង្គម វប្បធម៌ ៕