ផ្ដើមចេញពីបច្ចេកទេសរៀនតាមយូធូប កសិករមួយរូប នៅក្នុងក្រុងសិរីសោភ័ណ បានក្លាយជាអ្នកចិញ្ចឹមបង្កងពីអាងដ៏តូច រហូតដល់ពង្រីផ្ទៃដី ជាង២ហិកតា
ភ្នំពេញ៖ ការព្យាយាមគង់តែបានសម្រេចដោយផ្ដើមចេញពីការស្រឡាញ់ផ្នែកកសិកម្ម កសិករមួយរូបមានវ័យជាង៣០ឆ្នាំ រស់នៅក្នុងសង្កាត់ភ្នៀត ក្រុងសិរីសោភ័ណ បានចាប់យកមុខរបរនៃការចិញ្ចឹមបង្កង អូស្រ្ដាលី ដោយទទួលបានបច្ចេកទេសពីការសិក្សាតាមប្រព័ន្ធ យូរធូប ទើបធ្វើឲ្យរូបលោក ក៏បានបែកគំនិតក្នុងការចិញ្ចឹមបង្កងពីផ្ទៃដីតូចហានបោះទុនរហូតដល់ មានការពង្រីកផ្ទៃដីដល់២ហិកតា បន្ថែមទៀត។
លោក លី រតនៈ ដែលជាម្ចាស់កសិដ្ឋានបង្កង កសិករកម្ពុជា មានទីតាំងនៅភូមិថ្មី សង្កាត់ភ្នៀត បានប្រាប់ឱ្យដឹងថា៖ លោកចាប់មុខរបចិញ្ចឹមបង្កងអូស្រ្តាលីនេះមានរយៈពេលជិត៥ឆ្នាំហើយ ដោយសារតែមានការចាប់អារម្មណ៍និងស្រឡាញ់ខាងផ្នែកកសិកម្ម ជាពិសេសការចិញ្ចឹមបង្កងនេះ មិនសូវមានអ្នកចិញ្ចឹម មួយវិញទៀត បង្កងនេះក៏មានតម្រូវការទីផ្សារ ច្រើនផងដែរ ទើបរូបលោកបានធ្វើការស្រាវជ្រាវ បច្ចេកទេស តាមយូធូប និងមើលអ្នកចិញ្ចឹមនៅខេត្តបាត់ដំបងប្រហែល២ម៉ោង ក៏ចាប់ផ្តើមរៀបចំអាងដំបូងតែ៥០ ទៅ៦០ការ៉េ តែប៉ុណ្ណោះ ដើម្បីសាកល្បងរយៈពេល៤ខែ ឃើញវាធំលឿន ក៏ចាប់ផ្តើមពង្រីកផ្ទៃដីជាង៣០០០ម៉ែត្រការ៉េ ឃើញថាទទួលបានផល ទើបបង្កើតទីតាំងមួយបន្ថែមទៀតដែលមានផ្ទៃដី២ម៉ឺន ម៉ែត្រ ការ៉េ (២ហិកតា) ដោយយកដើមទុនកម្ចីពីធនាគារ កសិកម្ម អភិវឌ្ឍន៍ជនបទ (ARDB) ដ់ម្បីពង្រីកការចិញ្ចឹមបន្ថែម។
លោកក៏បានបញ្ជាក់បន្ថែមថា៖ ចំពោះទីផ្សារវិញ គឺលោកយកទៅលក់តាមបណ្តាភោជនីយដ្ឋានធំៗ ដូចជានៅក្នុងក្រុងប៉ោយប៉ែត ជាដើម និងធ្វើការលក់តាមប្រព័ន្ធអនឡាញ ដូចជា ហ្វេសប៊ុក យូធូប តឹកតុកជាដើម ដោយលក់ចន្លោះតម្លៃចាប់ពី១៧ទៅ២៥ដុល្លារក្នុងមួយគីឡូក្រាម តាមប្រភេទលេខ១ និងលេខ២ ។
ជាមួយគ្នានោះលោក លី រតនៈ ក៏បានបង្ហាញអំពីគោលជំហររបស់លោកចង់ឱ្យបងប្អូនកសិករដែលមានបំណងចង់ចាប់យកមុខរបរចិញ្ចឹមបង្កងនេះ អាចធ្វើការទាក់ទងទៅរូបលោកបាន ដើម្បីធ្វើការបង្ហាត់បង្ហាញនូវបច្ចេកទេសមួយចំនួន ក្នុងនោះលោកក៏មានការបង្កាត់នូវពូជសម្រាប់លក់ជូនបងប្អូនកសិករដែលចង់សាកល្បងក្នុងការចិញ្ចឹមបង្កងអូស្ត្រាលីនេះផងដែរ៕
