ក្រសួងសុខាភិបាលបានអោយដឹងថាមនុស្សជាង ៩,០០០ នាក់ត្រូវបានសម្លាប់នៅហ្គាហ្សាចាប់តាំងពីការចាប់ផ្តើមជម្លោះអ៊ីស្រាអែលនិងក្រុមហាម៉ាស
ហ្គាហ្សា៖ ក្រសួងសុខាភិបាលដែលមានមូលដ្ឋាននៅហ្គាហ្សាបាននិយាយកាលពីថ្ងៃព្រហស្បតិ៍ថា ចំនួនអ្នកស្លាប់ក្នុងចំណោមប្រជាជនប៉ាឡេស្ទីនដែលត្រូវបានសម្លាប់ដោយការវាយប្រហាររបស់អ៊ីស្រាអែលទៅលើតំបន់ហ្គាហ្សាឥឡូវនេះបានកើនឡើងលើសពី ៩,០០០ នាក់ចាប់តាំងពីការចាប់ផ្តើមនៃជម្លោះអ៊ីស្រាអែល និងក្រុមហាម៉ាស់នាពេលបច្ចុប្បន្ន។
អ្នកនាំពាក្យក្រសួងលោក Ashraf al-Qedra បាននិយាយនៅក្នុងសន្និសីទសារព័ត៌មានមួយថា ចំនួនអ្នកស្លាប់បានកើនឡើងដល់ ៩.០៦១ នាក់ ក្នុងនោះមានកុមារ ៣.៧៦០ នាក់ និងស្ត្រី ២.៣២៦ នាក់ ខណៈចំនួនអ្នករបួសមានលើសពី ៣២.០០០ នាក់។លោកបាននិយាយថា កងកម្លាំងអ៊ីស្រាអែលបានធ្វើការវាយប្រហារចំនួន ១៥ ក្នុងរយៈពេល ២៤ ម៉ោងកន្លងមក ដោយបានសម្លាប់មនុស្ស ២៥៦ នាក់ និងរាប់រយនាក់រងរបួស។
ការិយាល័យប្រព័ន្ធផ្សព្វផ្សាយរបស់រដ្ឋាភិបាលនៅហ្គាហ្សាបាននិយាយថា អ៊ីស្រាអែលបានទម្លាក់គ្រាប់បែកជាង ១០,០០០ គ្រាប់នៅលើតំបន់ហ្គាហ្សាស្ទ្រីបចាប់តាំងពីការចាប់ផ្តើមនៃការវាយលុករបស់ខ្លួន ហើយបានប៉ាន់ប្រមាណថាបរិមាណគ្រឿងផ្ទុះដែលអ៊ីស្រាអែលប្រើប្រាស់មានលើសពី ២៥,០០០ តោន ឬឈានដល់ជិត ៧០ តោនក្នុងមួយគីឡូម៉ែត្រការ៉េ។កាលពីថ្ងៃទី ៧ ខែតុលា ក្រុមហាម៉ាស់បានបើកការវាយប្រហារដ៏គួរឱ្យភ្ញាក់ផ្អើលមួយទៅលើអ៊ីស្រាអែល ដោយបានបាញ់រ៉ុក្កែតរាប់ពាន់គ្រាប់ និងជ្រៀតចូលទឹកដីអ៊ីស្រាអែល ដោយបានសម្លាប់មនុស្សយ៉ាងហោចណាស់ ១,៤០០ នាក់នៅក្នុងប្រទេសអ៊ីស្រាអែល។ជាការឆ្លើយតប កងទ័ពអ៊ីស្រាអែលបានបើកការវាយប្រហារតាមអាកាស និងប្រតិបត្តិការជើងគោកប្រឆាំងនឹងតំបន់ហ្គាហ្សាស្ទ្រីប និងបានដាក់ការបិទផ្លូវលើតំបន់ប៉ាឡេស្ទីន។
