នាយឧត្តមសេនីយ៍ វង្ស ពិសេន ដឹកនាំគណៈប្រតិភូគោរពវិញ្ញាណក្ខន្ធសព ឧត្តមសេនីយ៍ឯក ហ៊ុំ រដ្ឋា មេបញ្ជាការរងកងទ័ពជើងគោក
ភ្នំពេញ៖ ឯកឧត្តម នាយឧត្តមសេនីយ៍ វង្ស ពិសេន អគ្គមេបញ្ជាការ នៃកងយោធពលខេមរភូមិន្ទ នៅថ្ងៃទី១៩ ខែឧសភា ឆ្នាំ២០២៣ បានដឹកនាំគណៈប្រតិភូអគ្គបញ្ជាការដ្ឋានគោរពវិញ្ញាណក្ខន្ធសព ឯកឧត្តម ឧត្តមសេនីយ៍ឯក ហ៊ុំ រដ្ឋា មេបញ្ជាការរងកងទ័ពជើងគោក នៅគេហដ្ឋាននៃសពស្ថិតក្នុងខណ្ឌឬស្សីកែវ រាជធានីភ្នំពេញ។
សូមបញ្ជាក់ថា ឯកឧត្តម ឧត្តមសេនីយ៍ឯក ហ៊ុំ រដ្ឋា មេបញ្ជាការរងកងទ័ពជើងគោក បានទទួលមរណភាពកាលពីវេលាម៉ោង ១២,៥០នាទីថ្ងៃត្រង ថ្ងៃអង្គារ៍ ទី១៦ ខែឧសភា ឆ្នាំ២០២៣ ក្នុងជន្មាយុ៧០ឆ្នាំ ដោយរោគាពាធ។
ជំនួសមុខឱ្យថ្នាក់ដឹកនាំអគ្គបញ្ជាការដ្ឋាន ឯកឧត្តម នាយឧត្តមសេនីយ៍ វង្ស ពិសេន បានសំដែងនូវការចូលរួមរំលែកទុក្ខជាមួយក្រុមគ្រួសារនៃសព ចំពោះការបាត់បង់ឧត្តមស្វាមី ឪពុក ជាទីស្រឡាញ់នាពេលនេះ។
ឯកឧត្តម នាយឧត្ដមសេនីយ៍ អគ្គមេបញ្ជាការ បានចាត់ទុកការបាត់បង់ ឯកឧត្តម ឧត្តមសេនីយ៍ឯក ហ៊ុំ រដ្ឋា ជាការបាត់បង់នាយទាហានជាន់ខ្ពស់មួយរូបក្នុងជួរកងទ័ពជើងគោក ដែលកន្លងមកបានលះបង់ បូជាជីវិត ដើម្បីបុព្វហេតុជាតិមាតុភូមិ និងប្រជាជន។
ជាមួយគ្នានេះដែរ ឯកឧត្តម នាយឧត្តមសេនីយ៍ វង្ស ពិសេន បានឧទ្ទិសបួងសួងសូមឱ្យដួងវិញ្ញាណក្ខន្ធសព ឯកឧត្តម ឧត្តមសេនីយ៍ឯក ហ៊ុំ រដ្ឋា បានទៅកាន់សុគតិភព និងឋានបរមសុខកុំបីឃ្លៀងឃ្លាតឡើយ ៕
