សម្ដេចតេជោ ហ៊ុន សែន៖ ការជួញដូរមនុស្ស មិនមែនមានតែនៅកម្ពុជាទេ គឺមាននៅគ្រប់ប្រទេសទូទាំងពិភពលោក
ភ្នំពេញ៖ សម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា បានមានប្រសាសន៍ថា ការជួញដូរមនុស្ស មិនមែនកើតឡើងតែនៅកម្ពុជាមួយទេ គឺមាននៅគ្រប់ប្រទេសនៅទូទាំងពិភពលោក ដែលបាននិងកំពុងកើតឡើង។
នៅឱកាសអញ្ជើញជាអធិបតីក្នុង «វេទិកាជាតិអន្តរសាសនាប្រឆាំងការជួញដូរមនុស្សលើកទី៦» ក្រោមប្រធានបទ «សូមកុំយកកម្ពុជា ធ្វើជាគោលដៅប្រព្រឹត្តអំពើជួញដូរមនុស្ស» នាថ្ងៃទី២៩ ខែកញ្ញា ឆ្នាំ២០២២ សម្ដេចតេជោ មានប្រសាសន៍ថា កម្ពុជាមិនល្អឥតខ្ចោះនោះទេ តែក៏មិនអាក្រក់ ដូចជនអគតិ ឬបរទេសខ្លះចោទប្រកាន់ និងវាយតម្លៃនោះដែរ លើបញ្ហាទាំងឡាយដែលកម្ពុជាមានឆន្ទៈ ក្នុងកិច្ចខិតខំប្រឹងប្រែងដើម្បីដោះស្រាយបញ្ហាជួញដូរមនុស្ស។
សម្ដេចបញ្ជាក់ថា “ខ្ញុំ វាយតម្លៃស្ថានភាពរួមលើពិភពលោក ទាក់ទងទៅនឹងបញ្ហាការជួញដូរមនុស្ស ឬក៏ឧក្រិដ្ឋដែលបានកើត ការធ្វើចំណាត់ស្រុក មិនមែនមានប្រទេសកម្ពុជាមួយទេ ដែលបាននិងកំពុងកើតឡើងបញ្ហាទាំងនេះ។ យើងក្រឡេកមើលសហរដ្ឋអាមេរិក និងតំបន់អាមេរិក រហូតដល់អតីតប្រធានាធិបតី ដូណា ត្រាំ ចង់ធ្វើរបបរវាងសហរដ្ឋអាមេរិក និងម៉ិចស៊ិក សំដៅដោះស្រាយអ្វី? គឺដោះស្រាយកុំឲ្យមានមនុស្សរត់ពីបណ្ដាប្រទេសអាមេរិកខាងជើង និងប្រទេសដ៏ទៃទៀតនៅតំបន់នោះទៅកាន់សហរដ្ឋអាមេរិក”។
សម្ដេចបន្ដថា ការរត់ពន្ធមនុស្សពីប្រទេសមួយ ទៅប្រទេសមួយ ក្លាយជារឿងអកុសលសម្រាប់ប្រជាជនក្រីក្រ ក៏ប៉ុន្ដែក៏ជាឱកាសនៃពួកទុច្ចរិតដែលធ្វើការងារនេះ សំដៅបម្រើផលប្រយោជន៍របស់ពួកគេ។
សម្ដេចបន្ថែមថា ការរត់ពន្ធមនុស្សនៅកម្ពុជា បើប្រៀបធៀបជាមួយបណ្ដាប្រទេសមួយចំនួន មិនទាន់ធំហួសឡើយ ប៉ុន្ដែបើមិនទប់ស្កាត់ទេ នឹងក្លាយជាគោលដៅសុវត្ថិភាពពួកឧក្រិដ្ឋជន រត់ពន្ធមនុស្សចូលមកកម្ពុជា ឬរត់ពន្ធមនុស្សពីកម្ពុជា ទៅអាមេរិក ដូច្នេះរួមគ្នាបន្ដប្រយុទ្ធប្រឆាំងអំពើជួញដូរមនុស្ស៕
