ឧត្តមសេនីយ៍ទោ ផង់ យ៉ុត អញ្ជើញបិទវគ្គហ្វឹកហ្វឺនបំប៉ននាយទាហាន ពលទាហាន ប្រចាំឆ្នាំ២០២១ និងបើកវគ្គហ្វឹកហ្វឺនបំប៉ននាយទាហាន ពលទាហានកងពលតូចថ្មើរជើងលេខ៣១

ភ្នំពេញ៖ ឧត្តមសេនីយ៍ទោ ផង់ យ៉ុត មេបញ្ជាការកងពលតូចថ្មើរជើងលេខ៣១ កាលពីថ្ងៃទី៣០ ខែមិថុនា បានអញ្ជើញបិទវគ្គហ្វឹកហ្វឺនបំប៉ននាយទាហាន និងពលទាហាន ប្រចាំឆ្នាំ ២០២១ និងបើកវគ្គហ្វឹកហ្វឺនបំប៉ននាយទាហាន ពលទាហាន របស់កងពលតូចថ្មើរជើងលេខ៣១ របស់ យោធភូមិភាគទី៣ ។

របាយការណ៍វគ្គហ្វឹកហ្វឺន
បានបញ្ជាក់ឲ្យដឹងថា៖ បំប៉ននាយទាហាន ពលទាហានប្រចាំឆ្នាំ ២០២១ មានចំនួន ០២វគ្គ ដែលមានសេក្ខាកាមចូលរួមចំនួន ១៧៦នាក់ គ្រូចំនួន ២២នាក់ គឺវគ្គពង្រឹង ១ វរសេនាតូច ៣១២ ដែលមានសិក្ខាកាម ចំនួន ១២៨នាក់ គ្រូ១២នាក់ សរុប ១៤០នាក់ រយៈពេល ៣ខែ។ វគ្គបំប៉នការពារអាកាស មានសិក្ខាកាម ៥០នាក់ គ្រូ១០នាក់ សរុប ៦០នាក់រយៈពេល៣ខែ និងបើកវគ្គហ្វឹកហ្វឺបំប៉ននាយទាហាន ពលទាហាន ប្រចាំឆ្នាំ ២០២២ របស់កងពលតូចថ្មើរជើងលេខ ៣១ មានចំនួន ០២វគ្គ និងបែងចែកទៅតាមបណ្ដាអង្គភាពដែលពាក់ព័ន្ធអនុវត្ត។

មេបញ្ជាការកងពលតូចថ្មើរជើងលេខ៣១ បានមានប្រសាសន៍ថា ការហ្វឹកហ្វឺនកងទ័ព ជាវិស័យអាទិភាពមួយ នៃការកែទម្រង់ របស់កងយោធពលខេមរភូមិន្ទ សំដៅធ្វើទំនើបកម្ម និងបង្កើនសមត្ថភាព ដើម្បីការពារបូរណភាពទឹកដី ការពារសន្តិភាព ការពាររាជរដ្ឋាភិបាលស្របច្បាប់ ការពារសន្តិសុខ និងសណ្ដាប់ធ្នាប់សាធារណៈ ក៏ដូចជាការអភិវឌ្ឍលើគ្រប់វិស័យនៅកម្ពុជា។ បច្ចុប្បន្នការងារហ្វឹកហ្វឺនបានដើរតួនាទីជាយុទ្ធសាស្ត្រយ៉ាងសំខាន់ ក្នុងការពង្រឹងខឿនការពារជាតិ តាមរយៈការផ្ដល់នូវចំណេះដឹង និងចំណេះធ្វើ ពិតប្រាកដឱ្យដល់កងទ័ព ជាពិសេសយោធិនដែលមានវ័យក្មេង ដែលជាប្រភពបន្តវេនជំនាន់ក្រោយ។

ជាមួយគ្នានេះលោកបញ្ជាការ បានផ្ដាំផ្ញើដល់នាយទាហាន នាយទាហានរង និងពលទាហាន កងពលតូចថ្មើរជើងលេខ ៣១ ត្រូវរក្សាភាពស្មោះត្រង់ដាច់ខាតជាមួយជាតិ សាសនា ព្រះមហាក្សត្រ គោរពអនុវត្តឱ្យបានម៉ឺងម៉ាត់ នូវរដ្ឋធម្មនុញ្ញ ច្បាប់លក្ខន្តិកៈយោធា ច្បាប់រដ្ឋផ្សេងៗ និងបទបញ្ជារបស់រាជរដ្ឋាភិបាល អគ្គមេបញ្ជាការ មេបញ្ជាការ កងទ័ពជើងគោក មេបញ្ជាការយោធភូមិភាគទី៣ និងកងពល ដែលបានដាក់ចុះ។ ជាមួយគ្នាផងដែរត្រូវចូលរួមអនុវត្ត ៣កុំ ៣ ការពារអោយបានទាំងអស់គ្នា ៕