លោកជំទាវ សុវណ្ណ វណ្ណារតន៍ អនុញ្ញាតឱ្យលោកស្រី ភាណ សោភ័ណ នាយិកាអង្គការអុកស្វាម (OXFAM) ប្រចាំកម្ពុជា និងសហការីចូលជួបសម្ដែងការគួរសម និងពិភាក្សាការងារ
ភ្នំពេញ៖លោកជំទាវ សុវណ្ណ វណ្ណារតន៍ រដ្ឋលេខាធិការប្រចាំការ តំណាងដ៏ខ្ពង់ខ្ពស់ ឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានអនុញ្ញាតឱ្យលោកស្រី ភាណ សោភ័ណ នាយិកាអង្គការអុកស្វាម (OXFAM) ប្រចាំកម្ពុជា និងសហការីចូលជួបសម្ដែងការគួរសម និងពិភាក្សាការងារ ទាក់ទងនឹងបេឡាជាតិសន្តិសុខសង្គម (ប.ស.ស.) នៅថ្ងៃទី៣០ ខែមិថុនា ឆ្នាំ២០២៥ នៅទីស្ដីការក្រសួងការងារ និងបណ្ដុះបណ្ដាលវិជ្ជាជីវៈ។
ជាកិច្ចស្វាគមន៍ លោកជំទាវ សុវណ្ណ វណ្ណារតន៍ បានសម្ដែងក្ដីរីករាយចំពោះកិច្ចសហការក្នុងការអភិវឌ្ឍន៍វិស័យការងារ ប្រកបដោយបរិយាបន្នរួមគ្នាជាមួយអង្គការ OXFAM នាពេលកន្លងមក ក៏ដូចជាពេលខាងមុខ។ លោកជំទាវមានប្រសាសន៍បន្តដោយបង្ហាញដល់ភាគីអង្គការ ស្វែងយល់បន្ថែមពីយុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋាភិបាល នីតិកាលទី ៧ នៃរដ្ឋសភា សម្រាប់ទិសដៅអភិវឌ្ឍន៍នានារបស់ OXFAM ជាបន្តបន្ទាប់។
នៅក្នុងជំនួបនេះដែរ លោកស្រី ភាណ សោភ័ណ នាយិកាអង្គការ OXFAM ប្រចាំកម្ពុជា បានបញ្ជាក់ថា គោលបំណងនៃសំណើសុំជួបសម្ដែងការគួរសម និងសុំកិច្ចសហការរវាងក្រសួងការងារ និងបណ្ដុះបណ្ដាលវិជ្ជាជីវៈ ទាក់ទងនឹងបេឡាជាតិសន្តិសុខសង្គម (ប.ស.ស.) លើសកម្មភាពសំខាន់ៗ ដូចខាងក្រោម៖ ទស្សនកិច្ចសិក្សារបស់ប្រតិភូមកពីប្រទេសឡាវ មកកម្ពុជានាពេលខាងមុខដើម្បីស្វែងយល់ពីភាពជោគជ័យរបស់កម្ពុជាក្នុងកិច្ចសហការគ្នារវាងសង្គមស៊ីវិល និងរដ្ឋាភិបាល, វេទិកាប្រចាំឆ្នាំ ថ្នាក់តំបន់ (ខេត្តសៀមរាប ខេត្តកំពង់ស្ពឺ ខេត្តរតនគិរី) និងថ្នាក់ជាតិរវាងបេឡាជាតិសន្តិសុខសង្គមជាមួយថ្នាក់ដឹកនាំសហគមន៍ និងតំណាងកម្មករនិយោជិត ក្រោមប្រធានបទ « គាំពារសង្គមសម្រាប់ទាំងអស់គ្នា ដើម្បីអន្តរកាលប្រកបដោយយុត្តិធម៌កម្ពុជា », ការប្រកួតប្រជែងវីដេអូ លើប្រធានបទ « ជើងឯក ប.ស.ស. » ដើម្បីចូលរួមគ្នាផ្សព្វផ្សាយឱ្យកាន់តែទូលំទូលាយ, ការរៀបចំរត់កម្សាន្តលើប្រធានបទ « រត់ដើម្បីសមភាព និងគាំពារសង្គមប្រកបដោយបរិយាបន្ន », ទស្សនកិច្ចសិក្សារបស់បណ្ដាញគាំពារសង្គមសម្រាប់ទាំងអស់គ្នា (SP4ALL) ក្នុងការស្វែងយល់ពីបេឡាជាតិសន្តិសុខសង្គម។
ជាការឆ្លើយតប លោកជំទាវ សុវណ្ណ វណ្ណារតន៍ រដ្ឋលេខាធិការប្រចាំការ សូមស្វាគមន៍យ៉ាងកក់ក្ដៅចំពោះកិច្ចសហប្រតិបត្តិការដែលភាគីអង្គការបានលើកឡើង ដោយបានឯកភាព និងពិភាក្សាគ្នាជាជំហានទៅតាមចំណុចនីមួយៗ បន្ថែមទៀត ដើម្បីឈានទៅដល់មានកិច្ចព្រមព្រៀងជាផ្លូវការមួយក្នុងការអនុវត្តគម្រោងរួមគ្នាឱ្យបានទាន់ពេលវេលាកំណត់តាមផែនការរបស់ភាគីទាំងពីរ។
បន្ថែមលើនេះ លោកជំទាវសូមកោតសរសើរខ្ពស់ចំពោះការសហការនានា ថ្វីត្បិតភាគីទាំងពីរឈរនៅទីតាំងផ្សេងគ្នា តែភាគីទាំងពីរមានបេសកកម្មរួមគ្នាចូលរួមចំណែកក្នុងការអភិវឌ្ឍន៍សង្គមកម្ពុជា៕
