សម្តេចធិបតី អំពាវនាវដល់ម្ចាស់សហគ្រាស គ្រឹះស្ថាន កម្មករនិយោជិតនិងអង្គការវិជ្ជាជីវៈទាំងអស់បន្តចូលរួមក្នុងយុទ្ធនាការប្រែក្លាយ «សហគ្រាសមួយ ជាសហគមន៍សុខសាន្ដមួយ»

ភ្នំពេញ៖ សម្តេចមហាប វរ ធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានអំពាវនាវដល់ម្ចាស់សហគ្រាស គ្រឹះស្ថាន កម្មករនិយោជិតនិងអង្គការវិជ្ជាជីវៈទាំងអស់បន្តចូលរួមក្នុងយុទ្ធនាការ ក្នុងការប្រែក្លាយ «សហគ្រាសមួយ ជាសហគមន៍សុខ- សាន្ដមួយ» ឱ្យបានទូលំទូលាយដើម្បីបង្កើតនូវវប្បធម៌អនុលោមភាពតាមច្បាប់ និងរក្សាឱ្យបាននូវសុខដុមនីយកម្មនៃទំនាក់ទំនងវិជ្ជាជីវៈ។

សម្ដេចធិបតីបានលើកឡើងបែបនេះ ក្នុងឳកាសអញ្ជើញជួបសំណេះ សំណាល សំណាលជាមួយសហជីព សេដ្ឋកិច្ចក្រៅប្រព័ន្ធ និងសមា គម បុគ្គលិកសិក្សា ដើម្បីអបអរសាទរខួបអនុស្សាវរីយ៍លើក ទី១៣៩ នៃទិវាពលកម្មអន្តរជាតិ ១ ឧសភា ឆ្នាំ២០២៥ នៅមជ្ឈមណ្ឌលសន្និបាត និងពិព័រណ៍អន្តរជាតិជ្រោយចង្វារ នាថ្ងៃទី២៧ ខែមេសានេះ។

សម្តេចធិបតី បានអំពាវនាវដល់ម្ចាស់សហគ្រាស គ្រឹះស្ថាន កម្មករនិយោជិតនិងអង្គការវិជ្ជាជីវៈទាំងអស់ ជំរុញការអនុវត្តលក្ខខណ្ឌសុវត្ថិភាពនិងសុខភាពការងាររបស់កម្មករនិយោជិតនៅ កន្លែងធ្វើការ ដើម្បីធ្វើឱ្យកាន់តែប្រសើរឡើងនូវបរិយាកាសការងារ និងសុវត្ថិភាពធ្វើដំណើររបស់ កម្មករនិយោជិត។

ជាមួយគ្នានេះសម្តេចធិបតី នាយករដ្ឋមន្ត្រីក៏បានអំពាវនាវដល់ម្ចាស់សហគ្រាស គ្រឹះស្ថាន កម្មករនិយោជិតនិងអង្គការវិជ្ជាជីវៈទាំងអស់ បន្តចូលរួមអនុវត្តច្បាប់ និងលិខិតបទដ្ឋានគតិយុត្តជាធរមាន ព្រមទាំងរក្សាឱ្យបាន នូវវប្បធម៌អនុលោមភាពតាមច្បាប់ ដើម្បីធានាបាននូវភាពប្រកួតប្រជែង បង្កើនការទាក់ទាញទុន វិនិយោគ និងបង្កើតឱកាសការងារសមរម្យជូនបងប្អូនកម្មករនិយោជិត និងប្រជាពលរដ្ឋ៕