អូស្ត្រាលីនឹងចំណាយលុយជាង១ ពាន់លានដុល្លារអូស្ត្រាលីលើលើវិស័យការពារជាតិ ដើម្បីបង្កើនសមត្ថភាពយោធារបស់ខ្លួន
កង់ប៉េរ៉ា៖ បើតាមរដ្ឋមន្ត្រីការពារជាតិអូស្ត្រាលីលោក រីឆាដ ម៉ាឡេស អះអាងនៅថ្ងៃចន្ទទី២៤ ខែមីនាថា អូស្ត្រាលីនឹងចំណាយលុយជាង១ ពាន់លានដុល្លារអូស្ត្រាលី ឬស្មើនឹង៦២៧ លានដុល្លារអាម៉េរិកលើលើវិស័យការពារជាតិ ដើម្បីបង្កើនសមត្ថភាពយោធារបស់ខ្លួន រួមទាំងការផលិតសព្វាវុធ ការអភិវឌ្ឍមូលដ្ឋាននាវាមុជទឹក AUKUS និងកម្មវិធីនាវាចម្បាំង។
អូស្ត្រាលី និងសម្ព័ន្ធមិត្តសន្តិសុខរបស់សហរដ្ឋអាម៉េរិកផ្សេងទៀតកំពុងក្រពុលមុខក្រោមសម្ពាធរបស់លោក ដូណាល់ ត្រាំ ក្នុងការបង្កើនការចំណាយលើវិស័យការពារជាតិ។
លោក ម៉ាឡេស បានលើកឡើងថា កញ្ចប់ថវិកានឹងកើនឡើងចំនួន ១០,៦ពាន់លានដុល្លារអូស្ត្រាលី ឬស្មើនឹង៦,៦៦ ពាន់លានដុល្លារអាម៉េរិកសម្រាប់វិស័យការពារជាតិក្នុងរយៈពេល ៤ឆ្នាំខាងមុខ ខណៈការចំណាយនេះគឺជាការកើនឡើងដ៏ខ្ពស់បំផុតនៅក្នុងការចំណាយលើវិស័យការពារជាតិចាប់តាំងពីការបញ្ចប់សង្គ្រាមលោកលើកទី២។
ជាក់ស្តែង លោក ម៉ាឡេស បានអះអាងនៅឯកម្មវិធី Avalon Air Show នៅរដ្ឋវិចតូរៀថា ៖«ការចំណាយ ១០,៦ពាន់លានដុល្លារអូស្ត្រាលី នឹងពន្លឿនសមត្ថភាព និងការអភិវឌ្ឍប្រព័ន្ធការពារជាតិរបស់ប្រទេសអូស្ត្រាលីបន្ថែមទៀត»។ លោកម៉ាឡេសបានបន្ថែមថា ៖«ការណ៍នេះនឹងបង្ហាញឱ្យឃើញថា ពួកយើងបានត្រៀមខ្លួនរួចជាស្រេច[…]សម្រាប់ការបង្កើតសមត្ថភាពនាវាមុជទឹក។ នេះនឹងនាំពួកយើងឆ្ពោះទៅមុខកាន់តែលឿនក្នុងការបង្កើតសហគ្រាសផលិតអាវុធ និងគ្រឿងផ្ទុះ»។ នៅថ្ងៃចន្ទនេះ អូស្ត្រាលីទទួលបានប្រព័ន្ធការពារដែនអាកាស HIMARS ចំនួន២ គ្រឿងក្នុងចំណោម៤២ គ្រឿង ដែលបញ្ជាទិញពីក្រុមហ៊ុន Lockheed Martin៕
