នាយករដ្ឋមន្ត្រីជប៉ុន និងប្រធានាធិបតីកូរ៉េខាងត្បូង បញ្ជាក់ជាថ្មីពីសារសំខាន់នៃកិច្ចសហប្រតិបត្តិការប្រកបដោយនិរន្តរភាព
សេអ៊ូល៖ នាយករដ្ឋមន្ត្រីជប៉ុន លោក ហ្វូមីអូ គីហ្ស៊ីដា និងប្រធានាធិបតីកូរ៉េខាងត្បូង លោក យូន ស៊ុកយ៉ុល បានអំពាវនាវកាលពីថ្ងៃសុក្រទី ៦ ខែកញ្ញានៅឯកិច្ចប្រជុំកំពូលក្នុងរដ្ឋធានីសេអ៊ូល ដើម្បីរក្សាសន្ទុះក្នុងការធ្វើឱ្យប្រសើរឡើងនៃទំនាក់ទំនង ខណៈដែលរាជធានីតូក្យូ និងវ៉ាស៊ីនតោន នឹងផ្លាស់ប្ដូរមេដឹកនាំថ្មីនាពេលដ៏ខ្លីខាងមុខ។
ដំណើរទស្សនកិច្ចចុងក្រោយរបស់លោក គីហ្ស៊ីដា ទៅកាន់ប្រទេសជិតខាងរបស់លោកក្នុងនាមជានាយករដ្ឋមន្ត្រីបានកើតឡើងនៅពេលដែលមេដឹកនាំទាំងពីរស្វែងរកការផ្សារភ្ជាប់ភាពជាដៃគូថ្មី ដែលគាំទ្រដោយប្រធានាធិបតីសហរដ្ឋអាម៉េរិកលោក ចូ បៃឌិន។ ទំនាក់ទំនងរវាងសម្ព័ន្ធមិត្តក្នុងតំបន់ដ៏រឹងមាំទាំងពីររបស់សហរដ្ឋអាម៉េរិកប្រឈមភាពរកាំរកូសក្នុងរយៈពេលជាច្រើនទស្សវត្សរ៍ ចំពេលមានជម្លោះការទូត និងពាណិជ្ជកម្មដ៏អាក្រក់ជុំវិញការកាន់កាប់របស់ជប៉ុនលើឧបទ្វីបកូរ៉េឆ្នាំ ១៩១០ ដល់១៩៤៥។
លោក គីហ្ស៊ីដា បានសង្កត់ធ្ងន់លើភាពចាំបាច់ក្នុងការបន្តកិច្ចខិតខំប្រឹងប្រែងដើម្បីជំរុញទំនាក់ទំនងទ្វេភាគីជាថ្មីម្ដងទៀត ដោយសម្ដែងក្ដីអាណិតអាសូរចំពោះប្រជាជនកូរ៉េដែលបានរងទុក្ខក្នុងរបបអាណានិគមរបស់ជប៉ុន។ លោក គីហ្ស៊ីដា បានប្រាប់លោក យូន នៅឯកិច្ចប្រជុំថា ៖«មានប្រវត្តិសាស្ត្រជាច្រើន[…] ខ្ញុំក៏ធ្លាប់បាននិយាយនៅទីនេះដែរថា ខ្ញុំមានអារម្មណ៍ខូចចិត្តដែលមនុស្សជាច្រើនរងទុក្ខលំបាក និងសោកសៅក្នុងកាលៈទេសៈដ៏វេទនាបែបនេះ»។
ទន្ទឹមគ្នានេះ លោក យូន ក៏បានអំពាវនាវឱ្យមាននិរន្តរភាពនូវសន្ទុះវិជ្ជមាននៃកិច្ចសហប្រតិបត្តិការនូវចំណុចរបត់មួយសម្រាប់ទំនាក់ទំនងដើម្បីឈានទៅមុខក្នុងការរំលឹកខួបលើកទី៦០។ លោក យូន សង្កត់ធ្ងន់ថា ៖«នៅតែមានបញ្ហាលំបាកនៅសេសសល់ក្នុងទំនាក់ទំនងកូរ៉េ-ជប៉ុន។ ខ្ញុំសង្ឃឹមថាភាគីទាំងពីរនឹងបន្តធ្វើការរួមគ្នាជាមួយនឹងអាកប្បកិរិយាឆ្ពោះទៅមុខ ដើម្បីយើងអាចបន្តបោះជំហានឆ្ពោះទៅអនាគតដ៏ត្រចះត្រចង់»។
គួរបញ្ជាក់ថា មេដឹកនាំប្រទេសក្បែរខាងទាំងពីរបានស្វាគមន៍ចំពោះការចុះហត្ថលេខាលើកិច្ចព្រមព្រៀងមួយដើម្បីជួយសម្រួលដល់ការជម្លៀសពលរដ្ឋរបស់គ្នាទៅវិញទៅមកពីភាពអាសន្ននៅក្នុងប្រទេសទីបី ជាអ្វីដែលលោក គីហ្ស៊ីដា ហៅថាជានិមិត្តរូបនៃការបង្កើនទំនុកចិត្ត។។ ពួកគេក៏បានយល់ព្រមធ្វើការជាមួយគ្នាដើម្បីសម្រួលនីតិវិធីអន្តោប្រវេសន៍សម្រាប់អ្នកធ្វើដំណើរ និងធានាថាកូរ៉េខាងជើងមិនអាចប្រើប្រាស់ការគាំទ្ររបស់រុស្ស៊ីក្នុងការបង្កហេតុបន្ថែមទៀតនោះទេ៕
