ព្យុះស្ឃរា Yagi បានបោកបក់នៅភាគខាងត្បូងប្រទេសចិន បណ្តាលឱ្យសាលារៀនបិទទ្វារ ពីរថ្ងៃ ហើយជើងហោះហើរត្រូវបានលុបចោល
ហុងកុង៖ ព្យុះស្ឃរាយ៉ាកជី (Yagi) បានបោកបក់នៅភាគខាងត្បូងប្រទេសចិននៅថ្ងៃសុក្រទី ៦ ខែកញ្ញា បណ្តាលឱ្យសាលារៀនបានបិទទ្វាររយៈពេលពីរថ្ងៃ ហើយជើងហោះហើរត្រូវបានលុបចោល។ នេះជាព្យុះដ៏ខ្លាំងបំផុតមួយដែលបានវាយលុកតំបន់អាស៊ីក្នុងឆ្នាំនេះ ដោយបានធ្វើដំណើរឆ្ពោះទៅកាន់ដីគោកតាមបណ្តោយឆ្នេរសមុទ្រត្រូពិចរបស់ខេត្តហៃណាន។
ព្យុះស្ឃរាយ៉ាកជី ត្រូវបានចុះឈ្មោះជាព្យុះស៊ីក្លូនត្រូពិចខ្លាំងបំផុតទីពីររបស់ពិភពលោកក្នុងឆ្នាំ ២០២៤ មកទល់ពេលនេះ បន្ទាប់ពីព្យុះសង្ឃរាអាត្លង់ទិច ដែលមានកម្លាំងខ្យល់អតិបរមា ២៤៥ គីឡូម៉ែត្រក្នុងមួយម៉ោង។ កម្លាំងខ្លាំងជាងទ្វេដងចាប់តាំងពីការបំផ្លិចបំផ្លាញភាគខាងជើងប្រទេសហ្វីលីពីនកាលពីដើមសប្តាហ៍នេះ ព្យុះស្ឃរាយ៉ាកជីត្រូវបានគេរំពឹងថានឹងបោកបក់តាមបណ្តោយឆ្នេរសមុទ្ររបស់ប្រទេសចិនពីទីក្រុងវេនឆាង (Wenchang) ក្នុងខេត្តហៃណានដល់ទីក្រុងឡៃចូវ (Leizhou) ខេត្តក្វាងទុង (Guangdong) ចាប់ពីរសៀលថ្ងៃសុក្រ។ ខ្យល់និងភ្លៀងត្រូវបានអមដោយផ្គរលាន់ និងផ្គររន្ទះពេញតំបន់ពេញ។
ផ្លូវដឹកជញ្ជូនឆ្លងកាត់ភាគខាងត្បូងប្រទេសចិនភាគច្រើនត្រូវបានបិទនៅថ្ងៃសុក្រ ជាមួយនឹងជើងហោះហើរជាច្រើនត្រូវបានលុបចោលនៅក្នុងខេត្តហៃណាន ក្វាងទុង ហុងកុង និងម៉ាកាវ។ ការឆ្លងកាត់សមុទ្រវែងជាងគេលើពិភពលោក ដែលជាស្ពានសំខាន់ដែលតភ្ជាប់មជ្ឈមណ្ឌលហិរញ្ញវត្ថុហុងកុងជាមួយម៉ាកាវ និងជូហៃក្នុងខេត្តក្វាងទុង ក៏ត្រូវបានបិទផងដែរ។ ទីភ្នាក់ងារព័ត៌មានផ្លូវការ ស៊ីនហួ បានរាយការណ៍ថា រដ្ឋាភិបាលរបស់ប្រទេសចិន បានបញ្ជូនកងកម្លាំងការងារទៅកាន់ខេត្តក្វាងទុង និងហៃណាន ដើម្បីដឹកនាំការការពារទឹកជំនន់ និងព្យុះទីហ្វុង។ នៅក្នុងប្រទេសហ្វីលីពីន ព្យុះស្ឃរាយ៉ាកជីបាននាំមកនូវភ្លៀងធ្លាក់យ៉ាងខ្លាំងនៅទូទាំងប្រទេសកាលពីដើមសប្តាហ៍នេះ។ ទីភ្នាក់ងារសារព័ត៌មានរ៉យទ័របានរាយការណ៍ថាមនុស្សយ៉ាងហោចណាស់ ១៣ នាក់បានស្លាប់ ដោយសារព្យុះកំណាចនេះ។
ការបោកបក់របស់ព្យុះស្ឃរានៅខេត្តហៃណានគឺកម្រណាស់។ ចាប់ពីឆ្នាំ ១៩៤៩ ដល់ឆ្នាំ ២០២៣ ព្យុះទីហ្វុងចំនួន ១០៦ បានបោកបក់លើខេត្តហៃណាន ប៉ុន្តែមានតែប្រាំបួនប៉ុណ្ណោះដែលត្រូវបានចាត់ថ្នាក់ជាព្យុះស្ឃរា។ អ្នកវិទ្យាសាស្ត្របានអះអាងថា ព្យុះទីហ្វុងកាន់តែមានកម្លាំងខ្លាំងឡើង ដោយជំរុញដោយមហាសមុទ្រកាន់តែក្ដៅ ចំពេលមានការប្រែប្រួលអាកាសធាតុ។ កាលពីសប្តាហ៍មុន ព្យុះទីហ្វុងសានសាន បានបោកបក់ចូលភាគនិរតីប្រទេសជប៉ុន ដែលជាព្យុះដ៏ខ្លាំងបំផុតដែលបានវាយប្រហារប្រទេសនេះក្នុងរយៈពេលជាច្រើនទសវត្សរ៍៕
