លោក ឯក ឃុនដឿន ចុះសួរសុខទុក្ខ និងចែកអំណោយមនុស្សធម៌កាកបាទក្រហម ជូនចាស់ជរា ជនពិការ និងប្រជាពលរដ្ឋមានជីវភាពខ្វះខាត នៅសង្កាត់គីទ្បូម៉ែត្រលេខ៦

ភ្នំពេញ៖ នាល្ងាចថ្ងៃទី ៣ ខែ កញ្ញា ឆ្នាំ២០២២ នៅវត្តទួលសន្តិវ័ន ហៅវត្តទួលអស់លោក ក្រុមការងារអនុសាខាកាកបាទក្រហមកម្ពុជា ខណ្ឌឬស្សីកែវ ដឹកនាំដោយ លោក ឯក ឃុនដឿន ប្រធានកិត្តិយសអនុសាខា បានចុះសាកសួរសុខទុក្ខ និងចែកអំណោយមនុស្សធម៌របស់កាកបាទក្រហមកម្ពុជា ដែលមានសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន ជូនដល់ចាស់ជរា២៥គ្រួសារ ជនពិការ២គ្រួសារ និងប្រជាពលរដ្ឋដែលមានជីវភាពខ្វះខាត៣គ្រួសារ សរុបចំនួន៣០គ្រួសារ រស់នៅសង្កាត់គីទ្បូម៉ែត្រលេខ៦ ។

នាឱកាសនោះ លោកប្រធានកិត្តិអនុសាខា បានពាំនាំនូវការផ្តាំផ្ញើសាកសួរសុខទុក្ខពីឯកឧត្តម ឃួង ស្រេង ប្រធានគណៈកម្មាធិការសាខាកាកបាទក្រហមកម្ពុជា រាជធានីភ្នំពេញ ជាពិសេសពីសំណាក់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលតែងបានគិតគូរយកចិត្តទុកដាក់ជាប់ជានិច្ចចំពោះសុខទុក្ខប្រជាពលរដ្ឋ គ្រប់ក្រុមគ្រួសារ និងគ្រប់ទីកន្លែង ដោយមិនប្រកាន់ពីនិន្នាការនយោបាយ ជាតិ សាសន៍ សាសនា វណ្ណៈ ពណ៌សម្បុរអ្វីទាំងអស់ ពោល “កាកបាទក្រហមកម្ពុជាមានគ្រប់ទីកន្លែង សម្រាប់គ្រប់ៗគ្នា-មិនទុកនរណាម្នាក់ចោល“ ។

ជាមួយគ្នានេះ លោកក៏សូមឱ្យគ្រួសារទាំងអស់យកចិត្តទុកដាក់ថែរក្សាសុខភាពដោយប្រកាន់ភ្ជាប់នូវអនាម័យ រស់នៅស្អាត ហូបស្អាត ផឹកស្អាត និងបន្តអនុវត្តនូវវិធានការណ៍បង្ការ និងការពារខ្លួនពីជំងឺកូវីដ១៩ តាមការណែនាំរបស់ក្រសួងសុខាភិបាល ។

អំណោយមនុស្សធម៌ដែលផ្តល់ជូនក្នុង១គ្រួសារៗរួមមាន៖ អង្ករ២៥គីឡូក្រាម មី១កេស ត្រីខ៣កំប៉ុង ម៉ាស២៥សន្លឹក ជែលលាងដៃ២ដប ទឹកក្រូច៤កំប៉ុង និងថវិកាចំនួន២មុឺនរៀល ។ ដោយឡែកឯកឧត្តម ម៉ម ទ្បេងយ៉ានី បានជួយឧបត្ថម្ភបន្ថែមក្នុង១គ្រួសារៗថវិកាចំនួន៥មុឺនរៀលផងដែរ ៕