គ្រួសារកូនភ្លោះស្រី ៣នាក់ នៅក្រុងសិរីសោភ័ណ ទទួលបានអំណោយ សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត
ភ្នំពេញ៖ គ្រួសារកើតបានកូនភ្លោះស្រី ៣នាក់ ដែលរស់នៅក្នុងភូមិ៤ សង្កាត់ព្រះពន្លា ក្រុងសិរីសោភ័ណ ខេត្តបន្ទាយមានជ័យ បានទទួលអំណោយរបស់សម្តេចតេជោ ហ៊ុន សែន នាយករដ្ឋមន្រ្តីកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន។
អំណោយដ៏ថ្លៃថ្លារបស់សម្តេច ត្រូវបានឯកឧត្តម សេង ទៀង ជំនួយការផ្ទាល់សម្ដេច តេជោ ហ៊ុន សែន និងលោកជំទាវ រួមនឹងក្រុមការងារបានអញ្ជើញចុះនាំយកទៅប្រគល់ជូន ដល់ផ្ទះគ្រួសារកើតបាន កូនភ្លោះស្រី ទាំង៣នាក់នេះ កាលពីថ្ងៃទី១៥ ខែសីហា ឆ្នាំ២០២២ ដែលអំណោយ រួមមាន៖ ទឹកដោះគោកូនក្មេង ២កេស អង្ករ៥០គីឡូក្រាម ថវិកា ៥លានរៀល ស្ករស៥គីឡូក្រាម សារុង ២ និងក្រមា២។
នៅក្នុងឱកាសនោះឯកឧត្តម សេង ទៀង បានពាំនាំយកការផ្តាំផ្ញើសួរសុខទុក្ខដោយក្តី នឹករលឹកពីសម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ជូនដល់ក្រុមគ្រួសារកូនភ្លោះ ស្រី៣ ដែលជានិច្ចកាលសម្តេចតែងតែយកចិត្តទុកដាក់ ជួយដោះស្រាយរាល់ការលំបាកជូន ដល់ប្រជាពលរដ្ឋ នៅគ្រប់ទីកន្លែងទាំងអស់។
ជាមួយនោះដែរឯកឧត្តមបានក្រើនរម្លឹកដល់ឪពុកម្តាយកូនភ្លោះ៣នេះសូមយកចិត្តទុកដាក់ចិញ្ចឹមថែទាំកូនភ្លោះទាំង៣នេះដែលជាចៅធម៌របស់សម្តេចឱ្យបានល្អដែលនេះជាកូនភ្លោះ៣ចៅសម្តេចលើកទី៣៨៩គ្រួសារផងដែរ។
ទន្ទឹមនោះដែរក្រុមគ្រួសារមានកូនភ្លោះ៣ និងប្រជាពលរដ្ឋដែលចូលរួមពិធីនេះ ក៏បាន បង្ហាញអំពីទឹកចិត្តរំភើបរីករាយ និងថ្លែងអំណរគុណយ៉ាងជ្រាលជ្រៅបំផុត ជូនសម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ដែលបានយកចិត្តទុកនឹងជីវភាពរស់នៅរបស់ប្រជា ពលរដ្ឋ ដែលជួបការខ្វះខាត ជាបន្តបន្ទាប់កន្លងមកនេះ។
សូមបញ្ជាក់ថាកូនភ្លោះស្រីទាំង៣នេះ កូនស្រីទី១- ឈ្មោះ ឡាង សុដាលី ទម្ងន់ ១,៦គីឡូក្រាម, កូនស្រីទី២- ឈ្មោះ ឡាង សុដាលីន ទម្ងន់ ១,៥គីឡូក្រាម, និងកូនស្រីទី៣- ឈ្មោះ ឡាង សុដាលីស ទម្ងន់ ១,៦គីឡូក្រាម ដែលមានឪពុកមានឈ្មោះ ចាន់ សុភាព សព្វថ្ងៃជាបុគ្គលិករបស់ក្រុមហ៊ុនឯកជនមួយ ម្តាយមានឈ្មោះ ឆៃ ស្រីរ័ត្ន មុខរបរសព្វថ្ងៃជា មេផ្ទះ។
តាមការ អះអាងរបស់ឪពុកម្តាយឱ្យដឹងថា កូនស្រីភ្លោះទាំង៣របស់គាត់ កើតនៅ ថ្ងៃអង្គារ ១៣រោច ខែអាសាឍ ឆ្នាំខាល ចត្វាស័ក ព.ស ២៥៦៦ ត្រូវនឹងថ្ងៃទី២៦ ខែកក្កដា ឆ្នាំ២០២២ វេលាម៉ោង១៥:៣០នាទី សម្រាលនៅក្នុងមន្ទីរពេទ្យគន្ធបុប្ផាខេត្តសៀមរាប៕
