ឧត្តមសេនីយ៍ទោ សោម ស៊ុន ចុះត្រួតពិនិត្យសកម្មភាព អនុវត្តតួនាទីភារកិច្ច របស់កងយោធពលខេមរភូមិន្ទ នៅផ្នែកសឹករងស្ទឹងសែន នៃបញ្ជាការដ្ឋានតំបន់ប្រតិបត្តិការសឹករងកំពង់ធំ
ភ្នំពេញ៖ ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ នៅព្រឹកថ្ងៃទី១២ ខែសីហា ឆ្នាំ២០២២ បានដឹកនាំសហការីចុះត្រួតពិនិត្យសកម្មភាពទូទៅក្នុងការតួនាទីភារកិច្ច របស់កងយោធពលខេមរភូមិន្ទ នៅផ្នែកសឹក រងស្ទឹងសែន នៃបញ្ជាការដ្ឋានតំបន់ប្រតិបត្តិការសឹករងកំពង់ធំ ដែលមានទីតាំងស្ថិតនៅភូមិក្រចាប់ សង្កាត់អាចារ្យលាក់ ក្រុងស្ទឹងសែន ខេត្តកំពង់ធំ ។
លោកវរសេនីយ៍ទោ សៀង ហុកឃាន់ មេបញ្ជាការផ្នែកសឹករងស្ទឹងសែន បានរាយការណ៍អំពីការអនុវត្ត សកម្មភាពទូទៅក្នុងតួនាទីភារកិច្ច របស់កងយោធពលខេមរភូមិន្ទ នៅក្នុងផ្នែកសឹករងស្ទឹងសែន ដែលមានជាអាទិ៍ ការ ងារគ្រប់គ្រងកងកម្លាំងគ្រឿងពាក់ ។ ការងារហ្វឹកហ្វឺនរៀនសូត្រ ការកសាងអង្គភាពរឹងមាំ។ ការងារបង្កបង្កើនផល ចិញ្ចឹមសត្វ លើកស្ទួយជីវភាពរស់នៅរបស់កងទ័ព និងការងារត្រៀមបម្រុងកម្លាំងសម្រាប់អន្តរាគមន៍ជួយសង្គ្រោះ ប្រជាពលរដ្ឋជួបគ្រោះមហន្តរាយផ្សេងៗ បានទាន់ពេលវេលា ។
ជាមួយនោះដែរលោកវរសេនីយ៍ទោ សៀង ហុកឃាន់ ក៏បានរាយការណ៍សង្កត់ធ្ងន់អំពីការកសាងអង្គភាព និង ការបង្កបង្កើនផលចិញ្ចឹមសត្វ ដោយបានចិញ្ចឹមត្រីជាង៦០.០០០ក្បាល គោ២២ក្បាល មាន់ ទា ក្ងាន ជាច្រើនក្បាល ទៀត ដើម្បីដោះស្រាយជីវភាពជូនបងប្អូននៅក្នុងផ្ទះបាយ នៃផ្នែកសឹករងស្ទឹងសែន និងដោះស្រាយមេគោពូជជូនបងប្អូនយោធិន ដែលត្រូវចូលនិវត្តន៍ក្លាយជាអតីតយុទ្ធជនទៅរស់នៅតាមមូលដ្ឋាន ផងដែរ ។
ឧត្តមសេនីយ៍ទោ សោម ស៊ុន បន្ទាប់ពីបានចុះធ្វើការត្រួតពិនិត្យលទ្ឋផលជាក់ស្តែង តាមទីកន្លែងនីមួយៗ ដែល ផ្នែកសឹករងស្ទឹងសែន អនុវត្តបាន ។ បានថ្លែងនូវការកោតសរសើរចំពោះការខិតខំប្រឹងប្រែង របស់នាយទាហាន នាយ ទាហានរង ពលទាហានទាំងអស់ ក្នុងទីបញ្ជាការផ្នែកសឹករងស្ទឹងសែន ដែលបានខិតខំបំពេញតួនាទីភារកិច្ច របស់កង យោធពលខេមរភូមិន្ទ សម្រេចបានជោគជ័យគួរជាទីមោទនៈ ទន្ទឹមនិងការងារកសាងការគ្រប់គ្រងអង្គភាពរឹងមាំលើគ្រប់ វិស័យ អង្គភាពក៏បានយកចិត្តទុកដាក់ដល់ការងារ កែលម្អសោភ័ណ្ឌភាពផ្នូរសពកម្មាភិបាល យុទ្ធជនកម្ពុជា ដែល បានពលីជីវិតក្នុងសម័យសង្គ្រាម ក្នុងបុព្វហេតុជាតិ និងប្រជាជននៅក្នុងវិមានរំលឹកគុណយុទ្ឋជនពលី នៃបញ្ជាការដ្ឋាន តំបន់ប្រតិប្តិការសឹករងកំពង់ធំ បានល្អប្រសើរផងដែរ ។
ឧត្តមសេនីយ៍ទោ សោម ស៊ុន បានប្រគល់ភារកិច្ចជូនថ្នាក់ដឹកនាំនិងយោធិនទាំងអស់ នៅផ្នែកសឹករងស្ទឹង សែន ត្រូវបន្តសកម្មភាពក្នុងការអនុវត្តនូវខ្លឹមសារចលនាប្រឡងប្រណាំងទាំងប្រាំ របស់កងយោធពលខេមរភូមិន្ទ ដែលបានដាក់ចេញឱ្យបន្តទទួលបានលទ្ឋផលល្អថែមទៀត និងត្រូវអនុវត្តន៍ឲ្យបានត្រឹមត្រូវតាមតួនាទីភារកិច្ចរបស់ កងយោធពលខេមរភូមិន្ទដែលបានប្រគល់ឲ្យទទួលបានជោគជ័យ ៕
