កិច្ចប្រជុំរដ្ឋមន្រ្តីអាស៊ាន-ចិន បានបោះជំហានទៅមុខជាមួយនឹង ភាពជាដៃគូយុទ្ធសាស្ត្រគ្រប់ជ្រុងជ្រោយ

ភ្នំពេញ៖ កិច្ចប្រជុំរដ្ឋមន្រ្តី អាស៊ាន-ចិន បានបោះជំហានទៅមុខជាមួយនឹង ភាពជាដៃគូយុទ្ធសាស្ត្រគ្រប់ជ្រុងជ្រោយ ។ កិច្ចប្រជុំថ្នាក់រដ្ឋមន្ត្រីអាស៊ាន-ចិន ធ្វេីឡេីងនាព្រឹកថ្ងៃទី៤ ខែសីហា ឆ្នាំ២០២២ មានឯកឧត្តមឧបនាយករដ្ឋមន្ត្រី ប្រាក់ សុខុន រដ្ឋមន្រ្តីក្រសួងការបរទេសកម្ពុជា ជាប្រធានដឹកនាំកិច្ចប្រជុំ និងក្នុងនាមតំណាងឱ្យប្រទេសមីយ៉ាន់ម៉ាជាសហប្រធាន និងចិន បានចាប់ផ្ដើមដំណើរការកិច្ចសហប្រតិបត្តិការវែងឆ្ងាយមកហើយដោយភាពជាមិត្ត និងកិច្ចសហប្រតិបត្តិការទៅវិញទៅមក បានក្លាយជាគំរូនៃកិច្ចសហប្រតិបត្តិការឈ្នះ-ឈ្នះប្រកបដោយថាមពលដែលមានលទ្ធផលវិជ្ជមានក្នុងវិស័យជាច្រើន។

ឯកឧត្តមឧបនាយករដ្ឋមន្រ្តីថ្លែងថា កិច្ចប្រជុំកំពូលពិសេសអាស៊ាន-ចិនកាលពីឆ្នាំមុន បានធ្វើការផ្លាស់ប្តូរថ្មីមួយ ដើម្បីបោះជំហានទៅមុខជាមួយនឹងការប្រកាសនៃភាពជាដៃគូយុទ្ធសាស្ត្រគ្រប់ជ្រុងជ្រោយ ហើយ ជឿជាក់ថា នេះជាការឆ្លុះបញ្ចាំងពីទំនុកចិត្តដ៏រឹងមាំរវាងអាស៊ាន។ ឯកឧត្តមបន្តថា ខណៈពេលដែលយើងគ្រប់គ្រងបានជាបណ្តើរៗ ពីជំងឺរាតត្បាតកូវីដ១៩ យើងក៏នៅមានកិច្ចការជាច្រើនដែលត្រូវស្តារឡើងវិញ។

ក្នុងនោះកំណើនសេដ្ឋកិច្ចអាស៊ានត្រូវបានគេរំពឹងថា នឹងក្លាយជាគំរូជាមួយនឹងវិស័យដឹកជញ្ជូន និងវិស័យទេសចរណ៍ ដែលរងផលប៉ះពាល់ដោយសារការធ្វើដំណើរនិងការឆ្លងដែន មានការរឹតបន្តឹង។ សម្រាប់បញ្ហាប្រឈមជាសកលនិងតំបន់ដ៏ស្មុគស្មាញ អាស៊ានក៏កំពុងជំរុញឱ្យពួកយើងសហការគ្នាយ៉ាងជិតស្និទ្ធ ដើម្បីដោះស្រាយបញ្ហាទាំងនោះផងដែរ។ ឯកឧត្តមឧបនាយករដ្ឋមន្រ្តីបានជឿថា កិច្ចប្រជុំរដ្ឋមន្រ្តីអាស៊ាន ចិននាថ្ងៃនេះនឹងផ្តល់ឱ្យយើងនូវឱកាសល្អដើម្បីចូលរួមក្នុងការពិភាក្សា និងបើកចំហដើម្បីស្វែងរកវិធានការជាក់ស្តែងដោះស្រាយលើបញ្ហាប្រឈមនេះជាមួយគ្នា។

សូមបញ្ជាក់ថា ទំនាក់ទំនងកិច្ចសន្ទនាអាស៊ាន-ចិនបានចាប់ផ្ដើមនៅពេលឯកឧត្តម ឈៀន គីឈិន (H.E. Qian Qichen)រដ្ឋមន្ត្រីការបរទេស នៃសាធារណរដ្ឋប្រជាមានិតចិន បានចូលរួមសម័យប្រជុំរបស់កិច្ចប្រជុំថ្នាក់រដ្ឋមន្ត្រីអាស៊ានលើកទី ២៤ នៅខែកក្កដា ឆ្នាំ ១៩៩១ នៅទីក្រុងគូឡាឡាំពួ ក្នុងនាមជាភ្ញៀវនៃរដ្ឋាភិបាលម៉ាឡេស៊ី ដែលឯកឧត្តមបានបង្ហាញពីចំណាប់អារម្មណ៍របស់ចិន ក្នុងការសហការជាមួយអាស៊ាន ដើម្បីផលប្រយោជន៍ទៅវិញទៅមក។ ចិនត្រូវបានទទួលស្គាល់ជាដៃគូសន្ទនាពេញលេញ របស់អាស៊ាននៅ ក្នុងកិច្ចប្រជុំរដ្ឋមន្រ្តីការបរទេសអាស៊ានកាលពីថ្ងៃទី ២៩ ក្នុងខែកក្កដាឆ្នាំ ១៩៩៦ នៅទីក្រុងហ្សាការតា។

ទំនាក់ទំនងរវាងអាស៊ាននិងចិន ត្រូវបានលើកឡើងកាន់តែខ្ពស់ជាងមុន ជាមួយនឹងការចុះហត្ថលេខាលើសេចក្តីប្រកាសរួម របស់ប្រមុខរដ្ឋ/រដ្ឋាភិបាល ស្តីពីយុទ្ធសាស្ត្រភាពជាដៃគូដើម្បីសន្តិភាព និងវិបុលភាពក្នុងកិច្ចប្រជុំកំពូលអាស៊ាន-ចិនលើកទី៧ កាលពីខែតុលា ឆ្នាំ២០០៣ នៅកោះបាលី ប្រទេសឥណ្ឌូនេស៊ី។ ចាប់តាំងពីពេលនោះមក អាស៊ាន និងចិនបានបញ្ចប់ផែនការសកម្មភាពចំនួនបីសម្រាប់រយៈពេល ២០០៥-២០១០, ២០១១-២០១៥ និង ២០១៦-២០២០។ ផែនការសកម្មភាពថ្មី (២០២១-២០២៥) ត្រូវបានអនុម័តក្នុងខែវិច្ឆិកា ឆ្នាំ ២០២០ ដោយរដ្ឋមន្ត្រីការបរទេសអាស៊ាន និងចិន៕