លោក ដូណាល់ ត្រាំ បាននិយាយវាយប្រហារទៅលើសម្តេចប៉ាប Leo បន្ទាប់ពីប្រមុខសង្ឃកាតូលិកអង្គនេះ បានរិះគន់ការធ្វើសង្រ្គាមរបស់អាមេរិក
បរទេស៖ នាថ្ងៃអាទិត្យ ទី១២ ខែមេសា ប្រធានាធិបតីសហរដ្ឋអាមេរិក លោក ដូណាល់ ត្រាំ បាននិយាយវាយប្រហារទៅលើសម្តេចប៉ាប Leo បន្ទាប់ពីប្រមុខសង្ឃកាតូលិកអង្គនេះ បានរិះគន់ការធ្វើសង្រ្គាមរបស់អាមេរិកនិងអ៉ីស្រាអែល ប្រឆាំងប្រទេសអ៉ីរ៉ង់។
សម្តេចប៉ាប Leo កាលពីឆ្នាំមុន បានក្លាយជាប្រមុខសង្ឃកាតូលិកដំបូងបំផុត ដែលមានដើមកំណើតពីអាមេរិក។ ព្រះអង្គត្រូវគេសង្កេតឃើញថា បានបញ្ចេញមតិរិះគន់ត្រង់ៗ ចំពោះសង្រ្គាមអាមេរិក-អ៉ីស្រាអែល ជាមួយអ៉ីរ៉ង់ ចាប់តាំងពីវាបានផ្ទុះឡើង កាលពីថ្ងៃទី២៨ ខែកុម្ភៈ។ កាលពីមុន សម្តេចប៉ាប Leo ក៏បានរិះគន់គោលនយោបាយអន្តោប្រវេសន៍របស់រដ្ឋបាល លោក ត្រាំ ផងដែរ។
ក្នុងសារបង្ហោះលើបណ្តាញសង្គម Truth Social កាលពីថ្ងៃអាទិត្យ លោក ត្រាំ បាននិយាយថា សម្តេចប៉ាប Leo ប្រកាន់ជំហរទន់ខ្សោយចំពោះឧក្រិដ្ឋកម្ម ហើយមិនចេះចាត់ចែងឡើយរឿងកិច្ចការអន្តរជាតិ។ លោក ត្រាំ បានបន្តថា សម្តេចប៉ាប Leo គួរបំពេញតួនាទីឱ្យប្រសើរក្នុងនាមជាប្រមុខសង្ឃកាតូលិក ហើយក្រោយមកទៀត លោកប្រធានាធិបតីអាមេរិក បានប្រាប់ក្រុមអ្នកសារព័ត៌មានថា រូបលោកមិនសូវចូលចិត្តសម្តេចប៉ាបប៉ុន្មានទេ។ មិនតែប៉ុណ្ណោះ លោក ត្រាំ ថែមទាំងបានលើកឡើងថា សម្តេចប៉ាប Leo ត្រូវបានជ្រើសរើសឱ្យក្លាយជា មេដឹកនាំថ្មីរបស់ព្រះវិហារគ្រិស្តកាតូលិក កាលពីឆ្នាំ២០២៥ គឺដោយសារតែព្រះអង្គជាជនជាតិអាមេរិកប៉ុណ្ណោះ ព្រោះបុរីវ៉ាទីកង់គិតថា វាគឺជាជម្រើសប្រសើរជាងគេ ដើម្បីទប់ទល់ជាមួយលោក បន្ទាប់ពីរូបលោកបានត្រឡប់មកកាន់អំណាចសាជាថ្មី។
កន្លងមកនេះ ថ្លែងចេញពីទីលាន St Peter’s Square នៅបុរីវ៉ាទីកង់ សម្តេចប៉ាប Leo បានមានព្រះបន្ទូលថា ព្រះជាម្ចាស់ មិនទទួលយកឡើយ នូវការបន់ស្រន់របស់មេដឹកនាំទាំងឡាយណា ដែលបង្កសង្រ្គាម ហើយមានដៃប្រឡាក់ទៅដោយឈាម ហើយនាពេលនោះ ព្រះអង្គបានហៅសង្រ្គាមអ៉ីរ៉ង់ថា ជាទង្វើដ៏សាហាវយង់ឃ្នង។ សម្តេចប៉ាប Leo បានអំពាវនាវឱ្យលោក ត្រាំ ស្វែងរកច្រកចេញដើម្បីបិទបញ្ចប់ជម្លោះវិញ ហើយកាត់បន្ថយបរិមាណនៃអំពើហិង្សា។ កាលពីថ្ងៃអាទិត្យ អាជ្ញាធរនៅអ៉ីរ៉ង់ បានអះអាងថា សង្រ្គាមរបស់អាមេរិកនិងអ៉ីស្រាអែល បានផ្តាច់ជីវិតមនុស្សយ៉ាងហោច ៣ ៣៧៥នាក់។
កាលពីឆ្នាំមុន សម្តេចប៉ាប Leo ក៏បានរិះគន់គោលនយោបាយអន្តោប្រវេសន៍របស់លោក ត្រាំ ផងដែរ ដោយសម្តេចជឿជាក់អំពីការប្រកាន់ជំហរយោគយល់និងអត់ឱន ក្នុងការដោះស្រាយបញ្ហាអន្តោប្រវេសន៍ ផ្ទុយពីជំហររបស់លោក ត្រាំ ដែលបាននិយាយថា សហរដ្ឋអាមេរិក ចាំបាច់ត្រូវតែបង្រ្កាបការធ្វើអន្តោប្រវេសន៍ពីប្រទេសកំពុងអភិវឌ្ឍន៍ ដើម្បីកាត់បន្ថយឧក្រិដ្ឋកម្ម។ កាលពីថ្ងៃអាទិត្យ លោក ត្រាំ បានប្រាប់ក្រុមអ្នកសារព័ត៌មានថា សម្តេចប៉ាប Leo គឺជាបុគ្គលដែលមិនជឿក្នុងការទប់ស្កាត់ឧក្រិដ្ឋកម្ម។
គួរបញ្ជាក់ថា លោក ដូណាល់ ត្រាំ ក៏ធ្លាប់មានទំនាក់ទំនងមិនល្អជាមួយសម្តេចប៉ាបមុនផងដែរ គឺសម្តេចប៉ាប Francis ដែលបានរិះគន់សំណើគោលនយោបាយអន្តោប្រវេសន៍របស់លោក នៅពេលលោកឈរឈ្មោះលើកដំបូងជាប្រធានាធិបតី ហើយនិយាយថា លោក ត្រាំ មិនមែនជាគ្រិស្តសាសនា។ កាលពីអំឡុងដើមឆ្នាំ២០១៦ លោក ត្រាំ បានហៅសម្តេចប៉ាប Francis ថា ជាបុគ្គលដ៏គួរឱ្យអាម៉ាស់៕
