ក្រសួងរ៉ែ សហការជាមួយធនាគារអភិវឌ្ឍន៍អាស៊ី ដឹកនាំកិច្ចប្រជុំពិភាក្សាគណៈកម្មាធិការ សម្របសម្រួលពាណិជ្ជកម្ម ថ្នាក់តំបន់លើកទី២៩

ភ្នំពេញ៖ ក្រសួងរ៉ែ និងថាមពល សហការជាមួយធនាគារអភិវឌ្ឍន៍អាស៊ី (ADB) បានរៀបចំទទួលធ្វើជាម្ចាស់ផ្ទះ នៃកិច្ចប្រជុំពិភាក្សាគណៈកម្មាធិការ សម្របសម្រួលពាណិជ្ជកម្ម ថ្នាក់តំបន់លើកទី២៩ “29th Regional Power Trade Coordination Committee-RPTCC” ក្រោមការដឹកនាំជាសហប្រធានរវាង ឯកឧត្តម Chansaveng Boungnong អគ្គនាយកនៃអគ្គនាយកដ្ឋាន គោលនយោបាយថាមពល និងផែនការ ក្រសួងថាមពលនិងរ៉ែ ប្រទេសឡាវ និងលោក ឈួន សម្បត្តិរតនៈ ប្រធាននាយកដ្ឋានបច្ចេកទេស និងគោលនយោបាយអាជីវកម្មថាមពល ដោយមានការចូលរួមពីបណ្តាប្រទេស ជាសមាជិកអនុតំបន់ទន្លេមេគង្គទាំងអស់ តំណាងធនាគារអភិវឌ្ឍន៍អាស៊ី និងអ្នកជំនាញការច្បាប់ គោលនយោបាយនិងបច្ចេកទេសពីបណ្តាប្រទេស និងស្ថាប័នជាដៃគូអភិវឌ្ឍន៍ជាច្រើននាក់ផងដែរ។

កិច្ចប្រជុំពិភាក្សានេះ បានផ្តោតលើរបៀបវារៈសំខាន់ៗ ដូចខាងក្រោម៖
១. កិច្ចពិភាក្សាអំពីវឌ្ឍនភាពនិងការអភិវឌ្ឍគម្រោងតភ្ជាប់បណ្តាញបញ្ជូនអគ្គិសនីរវាងកម្ពុជា ឡាវ មីយ៉ាន់ម៉ា ថៃ វៀតណាម និងចិន ដើម្បីការពង្រីកបណ្តាញតភ្ជាប់ក្នុងតំបន់អនុទន្លេមេគង្គ ក្នុងគោលបំណងបង្កើនពាណិជ្ជកម្មថាមពលពហុភាគី
២. ពិនិត្យលើសេចក្តីព្រាងផែនទី បង្ហាញផ្លូវស្តីពីការវាយតម្លៃថាមពល

៣. ពិនិត្យនិងពិភាក្សាអំពីគម្រោងហិរញ្ញប្បទានសម្រាប់កាបូន គម្រោងប្រសិទ្ធភាពថាមពល គម្រោងដំណើរការប្រព័ន្ធស្តុកទុកថាមពលកកើតឡើងវិញ គម្រោងជំនួយបច្ចេកទេសនិងកម្ចីហិរញ្ញប្បទានបៃតង ដើម្បីជំរុញអន្តរកាលថាមពលក្នុងតំបន់

៤. ការព្យាករណ៍តម្រូវការនិងការគ្រប់គ្រងថាមពលកកើតឡើងវិញ
៥. ការបង្កើនបរិយាកាសវិនិយោគ និងយន្តការពង្រឹងភាពជាដៃគូ រវាងវិស័យឯកជននិងសាធារណៈ ៕