កាកបាទក្រហមកម្ពុជាខេត្តរតនគិរី ប្រជុំបូកសរុបលទ្ធផលការងារប្រចាំត្រីមាសទី២ និងលើកទិសដៅការងារអនុវត្តបន្តត្រីមាសទី៣

ភ្នំពេញ៖ គណៈកម្មាធិការសាខាកាកបាទក្រហមកម្ពុជាខេត្តរតនគិរី នៅរសៀលថ្ងៃទី៤ ខែកក្កដា ឆ្នាំ២០២២ បានរៀបចំកិច្ចប្រជុំបូកសរុបលទ្ធផលការងារប្រចាំត្រីមាសទី២ ឆ្នាំ២០២២ និងលើកទិសដៅការងារអនុវត្តបន្តត្រីមាសទី៣ របស់ខ្លួន។

កិច្ចប្រជុំប្រព្រឹត្តិទៅក្រោមអធិបតីភាព ឯកឧត្តម ញ៉ែម សំអឿន ប្រធានគណៈកម្មាធិការសាខាកាកបាទក្រហមកម្ពុជាខេត្ត និងមានការអញ្ជើញចូលរួមពីឯកឧត្តម លោកជំទាវ លោក លោកស្រី ជាសមាជិក សមាជិកា នៃគណៈកម្មាធិការសាខា ក្រុមប្រតិបត្តិសាខា ព្រមទាំង លោក លោកស្រី ប្រធាន/តំណាងមន្ទីរអង្គភាពជុំវិញខេត្ត និងក្រុង ស្រុក ទាំង ៩ផងដែរ។

របៀបវារៈនៃកិច្ចប្រជុំរួមមាន៖
១- មតិសំណេះសំណាល និង បើកកិច្ចប្រជុំ ដោយ ឯកឧត្តម ញ៉ែម សំអឿន ប្រធានគណៈកម្មាធិការសាខា។
២- បទបង្ហាញរបាយការណ៍សកម្មភាពទាំងពីរដោយនាយកសាខា។
៣- បទបង្ហាញ សេចក្តីសម្រេចនិងការប្រព្រឹត្តិទៅរបស់សាខា។
៤- ផ្សេងៗ។
៥- ការបូកសរុប និង បិទកិច្ចប្រជុំ ដោយ ឯកឧត្តម ញ៉ុម សំអឿន ប្រធានគណៈកម្មាធិការសាខា។

បន្ទាប់ពីអង្គប្រជុំបានតាមដានស្តាប់នូវអានរបាយការណ៍បូកសរុប លទ្ធផលសកម្មភាពការងារ និងរបាយការណ៍ហិរញ្ញវត្ថុដែលលើកឡើង ដោយ លោក ឌឹម ណាត នាយកប្រតិបត្តិសាខា រួចមក ឯកឧត្តម ញ៉ែម សំអឿន ប្រធានគណៈកម្មាធិការសាខា បានពាំនាំនូវប្រសាសន៍របស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលកោតសរសើរ និងថ្លែងអំណរគុណដល់គណៈកម្មាធិការសាខា ក្រុមប្រតិបត្តិសាខា អនុសាខាទាំងអស់ ដែលបានខិតខំបំពេញភារកិច្ចយ៉ាងសកម្ម ធ្វើជាសេនាធិការអោយគណៈ កម្មាធិការសាខា ក្នុងការដឹកនាំជំរុញធ្វើឲ្យវិស័យអាទិភាពការងារទាំង ៤ របស់កាកបាទក្រហមកម្ពុជារយៈពេល ៣ខែ (មេសា-មិថុនា) កន្លងមក នេះ រហូតសម្រេចបានលទ្ធផលគួរជាទីមោទនភាព ក្នុងការឆ្លើយតបផ្តល់អំណោយមនុស្សធម៌ ជូនជនរងគ្រោះ ដោយមហន្តរាយផ្សេងៗនិងជនងាយរងគ្រោះ ដែលខ្វះខាតជីវភាព បានទាន់ពេលវេលាស្របតាមទិសស្លោក” ទីណាមានទុក្ខលំបាក ទីនោះ មានកាកបាទក្រហមកម្ពុជា “។

ជាមួយនេះ សាខាក៏បានរួមចំណែកជាមួយរដ្ឋាភិបាលកម្ពុជា ក្មងកិច្ចសហការដឹកនាំកម្លាំងយុវជនកាកបាទក្រហមកម្ពុជា និងអ្នកស្ម័គ្រចិត្ត បញ្ជ្រាបការអប់រំផ្សព្វផ្សាយអំពីសុវត្ថិភាព ចរាចរណ៍ ផ្លូវគោក អប់រំអំពី ងវិធានការ កាត់បន្ថយហានិភ័យនៃការឆ្លងជំងឺកូវីដ១៩ទូទាំងខេត្ត ។

ឯកឧត្តមប្រធានគណៈកម្មាធិការសាខា បានសំណូមពរដល់អនុសាខា ទាំង ៩ក្រុង ស្រុក ត្រូវចុះពិនិត្យជាក់ស្តែងពីស្ថានភាពរបស់ប្រជាពលរដ្ឋដែលងាយរងគ្រោះ និងគ្រួសារដែលរងគ្រោះដោយសារគ្រោះមហន្តរាយផ្សេងៗ ដើម្បីឆ្លើយតបឲ្យបានទាន់ពេលវេលា និង អំពាវនាវ ដល់មន្ទីរអង្គភាព និងក្រុងស្រុក ពង្រឹងបន្ថែមលើការងារស្វែងរកមូលនិធិ ត្រូវជួយកៀរគរបន្ថែម ការងារសមាជិកភាពប្រចាំឆ្នាំ ដើម្បីបន្តទ្រទ្រង់សកម្មភាពការងារមនុស្សធម៌ តាមវិស័យអាទិភាពទាំង៤ ឲ្យមានដំណើរការល្អស្របតាមអាណត្តិការងារ៕