លោកជំទាវ អុង សុភាវី ដឹកនាំកិច្ចប្រជុំបូកសរុបលទ្ធផលការងារប្រចាំឆ្នាំ២០២៥ និងលើកទិសដៅការងារឆ្នាំ២០២៦ របស់គណៈកម្មាធិការប្រយុទ្ធនឹងជំងឺអេដស៍/កាមរោគ ក្រសួងមហាផ្ទៃ

ភ្នំពេញ៖ នៅព្រឹកថ្ងៃអង្គារ ទី៦ ខែមករា ឆ្នាំ២០២៦ លោកជំទាវ អុង សុភាវី រដ្ឋលេខាធិការក្រសួងមហាផ្ទៃ និងជាប្រធានគណៈកម្មាធិការប្រយុទ្ធនឹងជំងឺអេដស៍/កាមរោគ ក្រសួងមហាផ្ទៃ បានអញ្ជើញដឹកនាំកិច្ចប្រជុំបូកសរុបលទ្ធផលការងារប្រចាំឆ្នាំ២០២៥ និងលើកទិសដៅការងារឆ្នាំ២០២៦ របស់គណៈកម្មាធិការប្រយុទ្ធនឹងជំងឺអេដស៍/កាមរោគ ក្រសួងមហាផ្ទៃ ដោយមានការអញ្ជើញចូលរួមពី ឯកឧត្តម លោកជំទាវ លោក លោកស្រី អនុប្រធានអចិន្រ្តៃយ៍ សមាជិក សមាជិកាគណៈកម្មាធិការប្រយុទ្ធនឹងជំងឺអេដស៍/កាមរោគ ក្រសួងមហាផ្ទៃ អគ្គនាយករង អគ្គលេខាធិការរង អភិបាលរងរាជធានី-ខេត្ត ស្នងការរងរាជធានី-ខេត្ត តំណាងអគ្គនាយកដ្ឋាន ចំណុះក្រសួងមហាផ្ទៃ ព្រមទាំងតាមប្រព័ន្ធZOOM ជាច្រើនរូបទៀតផងដែរ។

កិច្ចប្រជុំនេះដែរ មានគោលបំណងត្រួតពិនិត្យវឌ្ឍនភាពការងារបូកសរុបលទ្ធផលដែរបានសម្រេចបានក៏ដូចជាលើកទិសដៅបន្តលើការពិភាក្សាអំពីបញ្ញាប្រឈមចំណុចខ្វះខាតរៀនពីបទពិសោធន៍នានា ដើម្បីកំណត់សកម្មភាពអទិភាពនិងការលើកទិសដៅសម្រាប់ឆ្នាំ២០២៦ ដោយស្របតាមគោលនយោបាយជាតិ ផែនការយុទ្ធសាស្រ្តជាតិក្នុងការប្រយុទ្ធប្រឆាំងជំងឺអេដស៍ និងផែនការថវិកា២០២៦-២០២៨ របស់គណៈកម្មាធិការប្រយុទ្ធនឹងជំងឺអេដស៍/កាមរោគ ក្រសួងមហាផ្ទៃ។

លោកជំទាវ រដ្ឋលេខាធិការ ក៏បានកោតសរសើរនិងវាយតម្លៃខ្ពស់ចំពោះការចូលរួមប្រកបដោយស្មារតីទទួលខុសត្រូវរបស់ឯកឧត្តម លោកជំទាវ លោក លោកស្រី សមាជិក សមាជិកា ទាំងថ្នាក់ជាតិ និងថ្នាក់ក្រោមជាតិដែរបានខិតខំប្រឹងប្រែងអស់កម្លាំងកាយចិត្ត ប្រាជ្ញាស្មារតីប្រកបដោយឆន្ទៈមោះមុត ក្នុងការបំពេញតួនាទីភារកិច្ចរបស់ខ្លួនដែលសម្រេចបានឆ្លើយតមទៅនិងការឆ្លងរីករាលដាលមេរោគអេដស៍/កាមរោគ និងនិយាយជារួមទទួលបានលទ្ធផលជោគជ័យជូនជាតិមាតុភូមិ ជាបន្តបន្ទាប់ប្រកបដោយប្រសិទ្ធភាព ព្រមទាំងចូលរួមចូលរួមសហការគ្នា ក្នុងការប្រយុទ្ធប្រឆាំងនឹងជំងឺអេដស៍ ក្នុងដំណើរឆ្ពោះទៅសម្រេចបាននូវទិសដៅលុបបំបាត់ការឆ្លងនៃមេរោគអេដស៍ នាឆ្នាំ២០៣០​៕