សម្តេចប្រធានរដ្ឋសភាកម្ពុជា ថ្លែងអំណរគុណ ថ្នាក់ដឹកនាំ សមាជិក សមាជិការដ្ឋសភា និងសប្បុរសជន ដែលបានបរិច្ចាគថវិកា សម្ភារៈជាមួយរដ្ឋសភា សម្រាប់ឧបត្ថម្ភគាំទ្រដល់វីរយុទ្ធជននិងពលរដ្ឋភៀសសឹក

ភ្នំពេញ៖ នៅថ្ងៃទី១៣ ខែធ្នូ ឆ្នាំ២០២៥នេះ សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភានៃព្រះរាជាណាចក្រកម្ពុជា បានថ្លែងអំណរគុណជ្រាលជ្រៅ ជូនថ្នាក់ដឹកនាំ សមាជិកសមាជិការដ្ឋសភា ថ្នាក់ដឹកនាំនិងមន្រ្តីរាជការនៃអគ្គលេខាធិការដ្ឋានរដ្ឋសភា ក្រុមទីប្រឹក្សា ជំនួយការសម្តេចប្រធានរដ្ឋសភា និងសប្បុរសជននានា ដែលបានចូលរួមបរិច្ចាគថវិកា សម្ភារៈប្រើប្រាស់ គ្រឿងឧបភោគ បរិភោគនានា ជាមួយរដ្ឋសភា ដើម្បីឧបត្ថម្ភគំាទ្រដល់វីរយុទ្ធជនជួរមុខ ដែលកំពុងតតំាងប្រឆំាងការឈ្លានពានរបស់ប្រទេសថៃមកលើបូរណភាពទឹកដីកម្ពុជា និងឧបត្ថម្ភដល់យុទ្ធជននិងពលរដ្ឋទទួលមរណៈ និងរងរបួស និងជនភៀសសឹក។

អំណោយដែលរដ្ឋសភាទទួលបានមានថវិកា សម្ភារប្រើប្រាស់ និងគ្រឿងឧបភោគបរិភោគដូចជា ភួយ ម៉ាស ក្រម៉ា អាវរងារ ខោអាវ ថ្នាំពេទ្យ មី ទឹកបរិសុទ្ធ អង្ករ មួក កន្ទេល នំក្រៀម មី ត្រីងៀត ទឹកត្រី ទឹកស៊ីអ៊ីវ ស្ពៃក្តោប ប្រែងឆា ឆ្នាំង អំបុក ទឹកផ្លែឈើ និងទឹកក្រូច ជាដើម ដែលក្នុងនោះថវិកាទទទួលបានមួយចំនួន រួមមាន ថវិកាចំនួន ១០០,០០០ ដុល្លារ ពី ឯកឧត្តម សេង ញ៉ក់ និងលោកជំទាវ, ថវិកាចំនួន ៣០,០០០ ដុល្លារ ពីអ្នកឧកញ៉ា ឡុច សារ៉េត និងលោកជំទាវ, ថវិកាចំនួន ១០,០០០ ដុល្លារ ពីសាលាអន្តរជាតិ អាយស៊ីអេស (ICS) ម៉ាស់ ២ ០០០ និងភួយចំនួន ១ ០០០ ពីឯកឧត្តម កែប ជុតិមា និងលោកជំទាវ។

ត្រឹមថ្ងៃសៅរ៍ទី១៣ ខែធ្នូ ឆ្នាំ២០២៥ រដ្ឋសភាបានធ្វើការបែងចែកថវិកា សម្ភារទំាងអស់ សម្រាប់ចូលបុណ្យសពយុទ្ធជន និងពលរដ្ឋដែលបានពលីជីវិត ជួយទំនុកបម្រុងជូនយុទ្ធជននិងពលរដ្ឋរងរបួស និងជនភៀសសឹក តាមខេត្តជាប់ព្រំដែន រួមមានខេត្តឧត្តរមានជ័យ ខេត្តបន្ទាយមានជ័យ ខេត្តព្រះវិហារ ខេត្តបាត់ដំបង និងខេត្តពោធិ៍សាត់។

ថ្នាក់ដឹកនាំរដ្ឋសភា និងអគ្គលេខាធិការដ្ឋានរដ្ឋសភា នៅបន្តទទួលបានជំនួយឧបត្ថម្ភបន្តបន្ទាប់ និងធ្វើការបែងចែកអំណោយទំាងអស់នោះ ជូនសមរភូមិជួរមុខបន្តទៀត ឆ្លើយតបការអំពាវនាវនិងការយកចិត្តទុកដាក់ជាខ្លំាងបំផុត ចំពោះវីរកងទ័ពនិងពលរដ្ឋ ពីសំណាក់ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី និងសម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភាប្រឆាំងនឹងសត្រូវឈ្លានពាន ប្រកបដោយស្មារតី ស្នេហាជាតិមាតុភូមិ៕