ចំនួនអ្នកស្លាប់ដោយសារគ្រោះទឹកជំនន់ និងបាក់ដីថ្មីៗនេះនៅខេត្តចំនួនបីនៅលើកោះស៊ូម៉ាត្រា បានកើនឡើងដល់ ៧១២នាក់ និង ៥០៧នាក់ទៀតកំពុងបាត់ខ្លួន

ហ្សាការតា៖ បើតាមការចេញផ្សាយដោយទីភ្នាក់ងារសារព័ត៌មាន Xinhua ទីភ្នាក់ងារជាតិគ្រប់គ្រងគ្រោះមហន្តរាយ (BNPB) បានប្រកាសនៅថ្ងៃអង្គារនេះថា ចំនួនអ្នកស្លាប់ដោយសារគ្រោះទឹកជំនន់ និងបាក់ដីថ្មីៗនេះនៅខេត្តចំនួនបីនៅលើកោះស៊ូម៉ាត្រា បានកើនឡើងដល់ ៧១២នាក់ និង ៥០៧នាក់ទៀតកំពុងបាត់ខ្លួន។

គ្រោះមហន្តរាយនេះបានបង្ខំឱ្យប្រជាជនប្រហែល ១.១លាននាក់នៅខេត្តស៊ូម៉ាត្រាខាងជើង ស៊ូម៉ាត្រាខាងលិច និងអាសេ (Aceh) ត្រូវផ្លាស់ទីលំនៅ។

ក្រុមសង្គ្រោះបានជួបការលំបាកយ៉ាងខ្លាំងក្នុងការចូលទៅដល់តំបន់ដាច់ស្រយាល ដោយសារផ្លូវ និងស្ពានត្រូវបានទឹកកាត់ផ្តាច់។ ទោះបីជាមានការដាក់ពង្រាយឧទ្ធម្ភាគចក្រ និងទូកក៏ដោយ ក៏អាកាសធាតុអាក្រក់នៅតែបន្តរារាំងកិច្ចខិតខំប្រឹងប្រែងនេះ។

ទន្ទឹមនឹងនេះ ក្រសួងទំនាក់ទំនងបានបញ្ជាក់ថា ប៉មបញ្ជូនសេវាទូរគមនាគមន៍ជាង ៩០% នៅក្នុងតំបន់រងគ្រោះបានដំណើរការឡើងវិញហើយ ដើម្បីធានាឱ្យពលរដ្ឋអាចទទួលបានព័ត៌មានចាំបាច់។

ប្រធានាធិបតីឥណ្ឌូណេស៊ី លោក ប្រាបូវ៉ូ ស៊ូប៊ីយ៉ាន់តូ បានសង្កត់ធ្ងន់ថា កិច្ចខិតខំប្រឹងប្រែងសង្គ្រោះកំពុងធ្វើឡើងយ៉ាងពេញទំហឹង។ លោកក៏បានដាស់តឿនថា ឥណ្ឌូណេស៊ីត្រូវតែឆ្លើយតបឱ្យមានប្រសិទ្ធភាពចំពោះការប្រែប្រួលអាកាសធាតុ ហើយរដ្ឋាភិបាលមូលដ្ឋានគួរតែដើរតួនាទីធំជាងនេះក្នុងការការពារបរិស្ថាន៕