ភ្នំភ្លើងមួយនៅក្នុងប្រទេសអេត្យូពីនៃទ្វីបអាហ្វ្រិក បានផ្ទុះឡើងជាលើកដំបូងក្នុងរយៈពេល១ម៉ឺនឆ្នាំ
ភ្នំភ្លើង Hayli Gubbi នៅក្នុងតំបន់ Afar ភាគឦសាននៃប្រទេសអេត្យូពី បានផ្ទុះឡើងកាលពីថ្ងៃអាទិត្យទី២៣វិច្ឆិកា ដោយបញ្ចេញធូលីទៅលើភូមិជិតខាង និងបង្កើតបញ្ហាប្រឈមសម្រាប់កសិករ ប៉ុន្តែមិនមានអ្នកស្លាប់ និងរបួសត្រូវបានរាយការណ៍ឡើយ។ ការផ្ទុះនេះបង្កការគំរាមកំហែងដល់សហគមន៍អ្នកចិញ្ចឹមបសុសត្វក្នុងតំបន់ ដោយការបំផ្លាញដីស្មៅសំខាន់ៗ។
ការផ្ទុះនេះក៏អាចមើលឃើញពីផ្កាយរណប ជាមួយនឹងរូបភាពរបស់ណាសា បង្ហាញពីដុំធូលីដ៏ក្រាស់ដែលផ្ទុះឡើងទៅលើមេឃ និងបក់បោកពាសពេញសមុទ្ទក្រហម។ យោងតាមមជ្ឈមណ្ឌលប្រឹក្សាផេះភ្នំភ្លើង Toulouse ពពកដុំធូលីពីការផ្ទុះបានរសាត់លើប្រទេសយេម៉ែន អូម៉ង់ និងចូលទៅក្នុងប្រទេសប៉ាគីស្ថាន និងឥណ្ឌា។
នាយកដ្ឋានឧតុនិយមរបស់ប្រទេសប៉ាគីស្ថានបានចេញការព្រមានមួយបន្ទាប់ពីផេះបានចូលទៅក្នុងដែនអាកាសរបស់ខ្លួន កាលពីល្ងាចថ្ងៃចន្ទទី២៤វិច្ឆិកាម្សិលមិញ។
នៅក្នុងប្រទេសឥណ្ឌា ក្រុមហ៊ុនអាកាសចរណ៍ Air India បានលុបចោលជើងហោះហើរក្នុងស្រុក និងអន្តរជាតិជាច្រើន ដើម្បីត្រួតពិនិត្យការប្រុងប្រយ័ត្នលើយន្តហោះទាំងនោះ។
នាយកដ្ឋានឧតុនិយមឥណ្ឌាបានបញ្ជាក់ថា រដ្ឋធានីញូវដេលី ដែលកំពុងតែជួបប្រទះរលកនៃការបំពុលបរិយាកាសយ៉ាងធ្ងន់ធ្ងរ មិនត្រូវបានរំពឹងថា នឹងរងផលប៉ះពាល់ខ្លាំងនោះទេ ដោយសារតែផេះកំពុងរសាត់នៅកម្ពស់ខ្ពស់៕ 
