សម្តេចតេជោ៖ អំពើល្អ និងការតស៊ូបង្ហាញឆន្ទៈដ៏មុតមាំដល់នាទីចុងក្រោយរបស់លោក ឌី ណៃ នឹងនៅតែស្ថិតក្នុងការចងចាំសម្រាប់ជនរួមជាតិខ្មែរទាំងអស់គ្នា
ភ្នំពេញ៖ សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភានៃកម្ពុជា បានផ្ញើសារលិខិតរំលែកមរណទុក្ខផ្ញើជូនក្រុមគ្រួសារនៃសព លោក ឌី ណៃ ហៅ (សល់) ដែលបានទទួលមរណភាពក្នុងហេតុការណ៍បាញ់ប្រហារយ៉ាងសាហាវឃោរឃៅ អមនុស្សធម៌ និងរំលោភបំពានកិច្ចព្រមព្រៀងសន្តិភាព ពីសំណាក់យោធាថៃ។
នៅក្នុងសារលិខិតរំលែកមរណទុក្ខជូនក្រុមគ្រួសារនៃសពលោក ឌី ណៃ,សម្តេចតេជោ ហ៊ុន សែន បានបញ្ជាក់ឱ្យដឹងថា “ក្នុងនាមថ្នាក់ដឹកនាំ សមាជិក សមាជិកាព្រឹទ្ធសភា ព្រមទាំងថ្នាក់ដឹកនាំ និងមន្ត្រីរាជការនៃអគ្គ លេខាធិការដ្ឋានព្រឹទ្ធសភា និងក្នុងនាមខ្លួនខ្ញុំផ្ទាល់ ខ្ញុំមានសេចក្ដីក្ដុកក្ដួល និងសោកស្តាយជាពន់ពេក នៅពេលបានទទួលដំណឹងថាលោក ឌី ណៃ ហៅ (សល់) បានទទួលមរណភាពក្នុងហេតុការណ៍បាញ់ប្រហារយ៉ាងសាហាវឃោរឃៅ អមនុស្សធម៌ និងរំលោភបំពានកិច្ចព្រមព្រៀងសន្តិភាព ពីសំណាក់យោធាថៃ នៅថ្ងៃពុធ ៧រោច ខែកត្តិក ឆ្នាំម្សាញ់ សប្តស័ក ព.ស.២៥៦៩ ត្រូវនឹងថ្ងៃទី១២ ខែវិច្ឆិកា ឆ្នាំ២០២៥ ក្នុងជន្មាយុ ៣៦ឆ្នាំ ស្ថិតនៅភូមិព្រៃចាន់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ។
ក្នុងវេលាពោរពេញដោយសមានទុក្ខដ៏ក្រៀមក្រំនេះ ខ្ញុំសូមចូលរួមរំលែកទុក្ខជាមួយក្រុមគ្រួសារសពលោក ឌី ណៃ ចំពោះការបាត់បង់សមាជិកគ្រួសារជាទីគោរពស្រឡាញ់ និងកក់ក្តៅសម្រាប់ក្រុម គ្រួសារ និងជាមួយជនរួមជាតិខ្មែរទាំងមូល ចំពោះការបាត់បង់ប្រជាពលរដ្ឋខ្មែរដ៏ល្អមួយរូបប្រកបដោយ មនសិកាស្នេហាជាតិមាតុភូមិរហូតដល់ថ្ងៃអវសាននៃជីវិត។ អំពើល្អ និងការតស៊ូបង្ហាញឆន្ទៈដ៏មុតមាំដល់នាទីចុងក្រោយរបស់លោក ឌី ណៃ នឹងនៅតែស្ថិតក្នុងការចងចាំសម្រាប់ក្រុមគ្រួសារ និងជនរួមជាតិខ្មែរ ទាំងអស់គ្នា។
ខ្ញុំសូមឧទ្ទិសកុសលបួងសួង ឱ្យដួងវិញ្ញាណក្ខន្ធរបស់លោក ឌី ណៃ ទទួលបានភាពត្រជាក់ត្រជុំ នៃតេជះ ព្រះពុទ្ធ ព្រះធម៌ ព្រះសង្ឃ និងឆាប់បានទៅកាន់សុគតិភពកុំបីឃ្លៀងឃ្លាតឡើយ”៕
