អភិបាលខេត្តព្រះវិហារ ដឹកនាំក្រុមការងារ និងកម្លាំងចម្រុះចុះសម្អាត និងរៀបចំអនាម័យបរិស្ថានឡើងវិញ នៅមណ្ឌលសុវត្ថិភាពវត្តពោធិ៍៥០០០ដើម បន្ទាប់ពីប្រជាពលរដ្ឋភៀសសឹក បានវិលត្រឡប់ទៅលំនៅដ្ឋានវិញ

ព្រះវិហារ៖ នៅព្រឹកថ្ងៃទី១០ ខែវិច្ឆិកា ឆ្នាំ២០២៥ ឯកឧត្ដម គីម រិទ្ធី អភិបាលខេត្តព្រះវិហារ បានដឹកនាំក្រុមការងារ និងកម្លាំងចម្រុះជាច្រើនរូប ចុះសម្អាត និងរៀបចំអនាម័យ បរិស្ថានឡើងវិញ នៅមណ្ឌលសុវត្ថិភាពវត្តពោធិ៍៥០០០ដើម ក្នុងភូមិគូលែនត្បូង ឃុំគូលែនត្បូង ស្រុកគូលែន បន្ទាប់ពីប្រជាពលរដ្ឋភៀសសឹក បានវិលត្រឡប់ទៅលំនៅដ្ឋានវិញ ក្រោយកិច្ចព្រមព្រៀងសន្តិភាព កម្ពុជា-ថៃ នៅប្រទេសម៉ាឡេស៊ី កាលពីថ្ងៃទី២៦ ខែតុលា ឆ្នាំ២០២៥។

ឯកឧត្ដម គីម រិទ្ធី បានថ្លែងរំលឹកពីព្រឹត្តិការណ៍ផ្ទុះអាវុធនៅតាមព្រំដែនកម្ពុជា-ថៃ ដែលកងទ័ពថៃ បានធ្វើការបាញ់មកលើកងទ័ពកម្ពុជាយើងមុន ធ្វើឱ្យបងប្អូនប្រជាពលរដ្ឋ ពិសេសប្រជាពលរដ្ឋដែលរស់នៅក្បែតំបន់ប្រឈមខ្លាំង មានការភ៏យខ្លាច រហួតបង្ខំចិត្តត្រូវភៀសខ្លួនមកកាន់តំបន់សុវត្ថិភាពនានា ឆ្ងាយពីសម្លេងគ្រាប់កាំភ្លើងផ្លោងរបស់កងទ័ពថៃ។

ឯកឧត្ដមអភិបាលខេត្តព្រះវិហារ បានថ្លែងទៀតថា ដោយសារស្ថានភាពប្រជាពលរដ្ឋភៀសសឹកច្រើន អាជ្ញាធរខេត្តបានរៀបចំមណ្ឌលសុវត្ថិភាពជាច្រើនកន្លែង ដើម្បីទទួលបងប្អូនបានស្នាក់នៅបណ្តោះអាសន្ន ដែលមណ្ឌលសុវត្ថិភាពទាំងនោះរួមមាន៖ មណ្ឌលសុវត្ថិភាពវត្តពោធិ៍៥០០០ដើម មណ្ឌលសុវត្ថិភាពវត្តទួលអណ្តែត មណ្ឌលសុវត្ថិភាពវត្តត្រាវគៀត មណ្ឌលសុវត្ថិភាពវត្តបាក់កាំ មណ្ឌលសុវត្ថិភាពវត្តសង្កែ និងនៅតាមទីអារ៉ាមមួយចំនួនទៀត និងតាមផ្ទះប្រជាពលរដ្ឋផងដែរ។

ឯកឧត្ដម គីម រិទ្ធី បានថ្លែងអំណរគុណយ៉ាងជ្រាលជ្រៅដល់ថ្នាក់ដឹកនាំខេត្ត មន្ត្រីរាជការ កម្លាំងប្រដាប់អាវុធ អាជ្ញាធរដែនដី និងអ្នកពាក់ពន្ធ័ទាំងអស់ក្នុងខេត្តព្រះវិហារ ដែលបានយកចិត្តទុកដាក់ ជួយរៀបចំ មើលការខុសត្រូវប្រជាពលរដភៀសសឹក នៅតាមមណ្ឌលសុវត្ថិភាពផ្សេងៗក្នុងខេត្តព្រះវិហារ បានយ៉ាងល្អ ប្រកបដោយភាពកក់ក្តៅ។

ជាមួយគ្នានេះឯកឧត្ដមក៏គោរពថ្លែងអំណរគុណសម្តេចតេជោ ហ៊ុន សែន សម្តេចកិត្តិព្រឹទ្ធបណ្ឌិត ប៊ុន រ៉ានីហ៊ុនសែន និងសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា និងលោកជំទាវបណ្ឌិត ព្រមទាំងថ្នាក់ដឹកនាំ មន្ត្រីរាជការ សប្បុរសជននានា ដែលបានផ្តល់ស្បៀងអាហារ សម្ភារ ជួយដល់ប្រជាពលរដ្ឋភៀសសឹក ចាប់តាំងពីថ្ងៃចូលស្នាក់នៅមណ្ឌលសុវត្ថិភាពដំបូង រហូតដល់ថ្ងៃវិលត្រឡប់ទៅលំនៅដ្ឋានវិញ។

អភិបាលខេត្តព្រះវិហារ ក៏បានថ្លែងបញ្ជាក់ពីការចុះរៀបចំសម្អាត អនាម័យ បរិស្ថាន នៅមណ្ឌលសុវត្ថិភាពពោធិ៍៥០០០ដើមនេះ គឺដើម្បីឱ្យមានសណ្តាប់ធ្នាប់ និងសោភ័ណភាព ឡើងវិញ បន្ទាប់ពីបងប្អូនប្រជាពលរដ្ឋភៀសខ្លួន បានស្ម័គ្រចិត្តវិលត្រឡប់ទៅលំនៅឋានដើមវិញដោយសុវត្ថិភាព ក្រោយការចុះហត្ថលេខាលើកិច្ចព្រមព្រៀងសន្តិភាពរវាងកម្ពុជា-ថៃ៕