យោធាអាមេរិក វាយប្រហារលើទូកដឹកគ្រឿងញៀន១គ្រឿងទៀត នៅតំបន់សមុទ្រ Caribbean សម្លាប់មនុស្ស៣នាក់

វ៉ាស៉ីនតោន៖ បើតាមការចេញផ្សាយដោយ ទីភ្នាក់ងារព័ត៌មាន AFP នាថ្ងៃសុក្រ ទី៧ ខែវិច្ឆិកា ឆ្នាំ២០២៥ រដ្ឋមន្រ្តីការពារជាតិអាមេរិក លោក Pete Hegseth បានឱ្យដឹងថា កាលពីថ្ងៃព្រហស្បតិ៍សប្តាហ៍នេះ យោធាអាមេរិក បានវាយប្រហារលើទូកដឹកគ្រឿងញៀន១គ្រឿងទៀត នៅតំបន់សមុទ្រ Caribbean សម្លាប់មនុស្ស៣នាក់ នាំឱ្យតួលេខអ្នកបាត់បង់ជីវិតសរុប ដោយសារយុទ្ធនាការបង្រ្កាបគ្រឿងញៀនដ៏ចម្រូងចម្រាសរបស់ទីក្រុងវ៉ាស៉ីនតោន កើនដល់យ៉ាងហោច៧០នាក់ហើយ។

សហរដ្ឋអាមេរិក បានធ្វើសកម្មភាពវាយប្រហារដូចខាងលើ ចាប់តាំងពីដើមខែកញ្ញា លើទូកនៅតំបន់សមុទ្រ Caribbean និងភាគខាងកើតមហាសមុទ្រប៉ាស៉ីហ្វិក។ ក្រុមអ្នកជំនាញយល់ថា ទង្វើទាំងនេះស្មើនឹងការសម្លាប់មនុស្សក្រៅប្រព័ន្ធយុត្តិធម៌ បើទោះបីជាពួកគេកំណត់គោលដៅ លើជនរត់ពន្ធគ្រឿងញៀនពិតមែនក៏ដោយ។

មកទល់ពេលនេះ ការវាយប្រហាររបស់អាមេរិក បានកម្ទេចទូកយ៉ាងហោច១៨គ្រឿង ប៉ុន្តែទីក្រុងវ៉ាស៉ីនតោន មិនទាន់បង្ហាញភស្តុតាងរឹងមាំណាមួយជាសាធារណៈនៅឡើយទេ ថាគោលដៅរបស់ពួកគេ ពិតជាលួចដឹកជញ្ជូនគ្រឿងញៀនប្រាកដ ឬបង្កការគំរាមកំហែងចំពោះសហរដ្ឋអាមេរិក៕