កំពង់ស្ពឺ៖ នាព្រឹកថ្ងៃទី០៧ ខែសីហា ឆ្នាំ២០២៥ រដ្ឋបាលខេត្តកំពង់ស្ពឺ បានរៀបចំកិច្ចប្រជុំសាមញ្ញ លើកទី១៥ អាណត្តិទី៤ របស់ក្រុមប្រឹក្សាខេត្ត ក្រោមអធិបតីភាព ឯកឧត្ដម អ៊ិន ឃុន សមាជិកក្រុមប្រឹក្សាខេត្ត តំណាង ឯកឧត្តម យឹម សុខុម ប្រធានក្រុមប្រឹក្សាខេត្ត ឯកឧត្តមបណ្ឌិត ជាម ច័ន្ទសោភ័ណ អភិបាល នៃគណៈអភិបាលខេត្តកំពង់ស្ពឺ និងមានការអញ្ជើញចូលរួមពី ឯកឧត្តម លោកជំទាវ សមាជិក សមាជិកា ក្រុមប្រឹក្សាខេត្ត សាលាដំបូងខេត្ត ឯកឧត្តម អភិបាលរងខេត្ត លោកនាយករដ្ឋបាលសាលាខេត្ត លោកនាយក នាយករងទីចាត់ការសាលាខេត្ត លោក លោកស្រីប្រធាន មន្ទីរ អង្គភាព ជុំវិញខេត្ត លោក លោកស្រីប្រធានអង្គភាពចំណុះរដ្ឋបាលសាលាខេត្ត លោកអភិបាលក្រុង និងស្រុក និងមន្រ្តីពាក់ព័ន្ធមួយចំនួនទៀត។
នៅក្នុងកិច្ចប្រជុំសាមញ្ញលើកទី១៥ អាណត្តិទី៤ របស់ក្រុមប្រឹក្សាខេត្ត បានធ្វើការប្រជុំពិភាក្សា អនុម័តលើរបៀបវារៈ ចំនួន០៦ រួមមាន៖
១. ពិនិត្យ និងអនុម័តសេចក្តីព្រាងកំណត់ហេតុនៃកិច្ចប្រជុំសាមញ្ញលើកទី ១៤ របស់ក្រុមប្រឹក្សាខេត្ត
២. ពិនិត្យ និងអនុម័តរបាយការណ៍ស្តីពីលទ្ធផលនៃការអនុវត្តការងារប្រចាំខែ កក្កដា ឆ្នាំ ២០២៥ របស់រដ្ឋបាលខេត្ត
៣. ពិនិត្យ និងអនុម័តសេចក្តីសម្រេចស្តីពីការបង្កើតគណៈកម្មាធិការរៀបចំដែនដី និងនគរូបនីយកម្ម ខេត្ត និងលេខាធិការដ្ឋាននៃគណៈកម្មាធិការរៀបចំដែនដី និងនគរូបនីយកម្មខេត្ត
៤. ពិនិត្យ និងអនុម័តតារាងបែងចែកប្រាក់រង្វាន់លើកទឹកចិត្តសម្រាប់ឧបត្ថម្ភជូនមន្ត្រីរាជការ បុគ្គលិកនៃរដ្ឋបាលខេត្តសម្រាប់ខែ កក្កដា ឆ្នាំ ២០២៥
៥. បញ្ហាផ្សេងៗ
៦. មតិបូកសរុបបិទកិច្ចប្រជុំ។
បន្ទាប់ពីកិច្ចប្រជុំពិភាក្សា និងអនុម័តលើរបៀបវារៈខាងលើរួចមក ឯកឧត្តម អ៊ិន ឃុន សមាជិកក្រុមប្រឹក្សាខេត្ត បានលើកឡើងថា នៅក្នុងយន្តការដឹកនាំរបស់ ឯកឧត្តមបណ្ឌិត ជាម ច័ន្ទសោភ័ណ អភិបាល នៃគណៈអភិបាលខេត្ត បានធ្វើឱ្យខេត្តកំពង់ស្ពឺមានការប្រែមុខមាត់ថ្មីជាលំដាប់ និងបានកោតសរសើរចំពោះអាជ្ញាធរគ្រប់លំដាប់ថ្នាក់ មន្ត្រីរាជការ សមត្ថកិច្ច និងប្រជាពលរដ្ឋ ត្រូវអនុវត្តឱ្យបានសមស្រប តាមគោលនយោបាយបញ្ចកោណ របស់រាជរដ្ឋាភិបាល អាណត្តិទី៧ ដំណាក់កាលទី១។
ជាមួយគ្នានោះ ត្រូវបង្កើនការអប់រំដល់ប្រជាពលរដ្ឋ នូវច្បាប់ចរាចរណ៍ផ្លូវគោកថ្មី ដើម្បីរួមគ្នាកាត់បន្ថយអត្រាស្លាប់ និងរបួស ដោយគ្រោះថ្នាក់ចរាចរណ៍ សមត្ថកិច្ចគ្រប់លំដាប់ថ្នាក់ ត្រូវបន្តរឹតបន្តឹង និងចាត់វិធានការឱ្យបានម៉ឺងម៉ាត់ ចំពោះសកម្មភាពក្រុមក្មេងទំនើង ដែលកាប់ចាក់គ្នា និងបង្កការអុកឡុកនៅតាមកម្មវិធីផ្សេងៗ។ ត្រូវទប់ស្កាត់ និងបង្ក្រាបឱ្យខានតែបាន ចំពោះល្បែងស៊ីសងគ្រប់ប្រភេទ គ្រឿងញៀន ចោរកម្ម បទល្មើសដីធ្លី បទល្មើសព្រៃឈើ និងបទល្មើសជលផលជាដើម។ មន្ទីរសុខាភិបាល មន្ទីរពេទ្យបង្អែក មណ្ឌលសុខភាព ត្រូវបង្កើនការអប់រំ ផ្សព្វផ្សាយដល់ប្រជាពលរដ្ឋ អំពីអនាម័យសុខភាព ដើម្បីការពារជំងឺឆ្លងគ្រប់ប្រភេទផងដែរ៕
