តូក្យូ៖ បើយោងតាមការចេញផ្សាយដោយទីភ្នាក់ងារសារព័ត៌មាន AFP នៅថ្ងៃអង្គារ ទី២២ ខែកក្កដា ឆ្នាំ២០២៥ ជប៉ុន កំពុង ជួប បញ្ហា ខ្វះខាត អង្ករ និង ការ ឡើង ថ្លៃ ដោយ បង្ខំ ឱ្យ ប្រទេស នេះ ត្រូវបង្កើន ការ នាំ ចូល ខណៈដែលកូរ៉េខាងត្បូងវិញ កំពុងប្រឈមមុខនឹងបញ្ហាលើសតម្រូវការផ្គត់ផ្គង់ ដែលបានជំរុញឱ្យតម្លៃចុះថោក ហើយមានតំបន់ខ្លះចែកអង្ករមិនយកលុយ។
កសិករនៅ Haenam ដែលជា ទីក្រុង កសិកម្ម នៃ ខេត្ត Jeolla ភាគខាង ត្បូង ចម្ងាយ ប្រហែល ៣៣០គីឡូម៉ែត្រ នៃទីក្រុង សេអ៊ូល បានឱ្យដឹងថា នៅពេលមានម៉ាស៉ីនទំនើប និងពូជស្រូវដែលផ្តល់ទិន្នផលខ្ពស់ កូរ៉េខាងត្បូងអាចបំពេញតម្រូវការគ្រប់គ្រាន់ សម្រាប់ការផ្គត់ផ្គង់ក្នុងស្រុក។
ទន្ទឹមនេះ ជារៀងរាល់ឆ្នាំ រដ្ឋាភិបាលកូរ៉េខាងត្បូង ក៏បាននាំចូល និងទិញអង្ករពីកសិករផងដែរ ដើម្បីធានាសន្តិសុខស្បៀង។ រដ្ឋាភិបាលកូរ៉េខាងត្បូង បានទិញអង្ករចំនួន ១.២លានតោនពីឆ្នាំ ២០២១ ដល់ឆ្នាំ ២០២៤។ មន្ត្រីផ្នែកកសិកម្មកូរ៉េខាងត្បូងនិយាយថា ទុនបម្រុងចាស់ជាធម្មតាបានលក់ទៅឱ្យក្រុមហ៊ុនផលិតអាហារកែច្នៃ ហើយការប្រមូលផលថ្មីៗនឹងលក់ទៅឱ្យគ្រួសារដែលមានចំណូលទាប ក្នុងតម្លៃត្រឹមតែ ២ដុល្លារអាមេរិកប៉ុណ្ណោះ សម្រាប់កញ្ចប់ទម្ងន់ ១០គីឡូក្រាម។
កាល ពី ខែ មេសា ជប៉ុន បាន ទិញ អង្ករពី កូរ៉េខាងត្បូង ជា លើក ដំបូង គិត ចាប់ តាំង ពី ឆ្នាំ ១៩៩៩។ ជាប្រពៃណី ជនជាតិជប៉ុនរស់នៅជនបទ ទិញអង្ករក្នុងតម្លៃចរចារពីឈ្មួញក្នុងស្រុក ឬទិញផ្ទាល់ពីកសិករ។ នៅឯផ្សារទំនើបទូទាំងប្រទេសជប៉ុន អង្ករត្រូវបានលក់ក្នុងតម្លៃថ្លៃ ឬគ្មានអង្ករលក់។ តម្លៃ អង្ករ បាន កើន ឡើង ទ្វេ ដងនៅក្នុងខែឧសភា បើប្រើធៀប នឹង រយៈពេលដូចគ្នាកាលពីឆ្នាំ មុន ។ នៅក្នុងខែកក្កដា អង្ករមានតម្លៃជាមធ្យមប្រហែល ២៧ដុល្លារអាមេរិកសម្រាប់មួយកញ្ចប់ទម្ងន់ ៥គីឡូក្រាម ដែលជំរុញឱ្យរដ្ឋាភិបាលបញ្ចេញទុនបម្រុងគ្រាអាសន្ន។ ប៉ុន្តែ ស្តុកអង្ករសម្រាប់ដាក់លក់ នាពេលនេះ នៅ សល់ តែប្រមាណ ១០ ម៉ឺន តោន ប៉ុណ្ណោះ។
គួរបញ្ជាក់ថា តាមក្រុមអ្នកសង្កេតការណ៍ នៅពេលមានកង្វះខាត ឬលើសតម្រូវការ វាបានប៉ះពាល់ដល់ជីវភាពរស់នៅ ហើយអស្ថិរភាពនៃការផ្គត់ផ្គង់អង្ករ អាចជះឥទ្ធិពលលើសពីការបរិភោគ៕
