នាយករដ្ឋមន្រ្តីស្ដីទីថៃ អះអាងថា វិធានការតឹងរ៉ឹងនៅតាមបណ្តោយព្រំដែនកម្ពុជា-ថៃ នៅតែដដែល ដោយមិនមានការបន្ធូរបន្ថយនៃការឆ្លងកាត់ព្រំដែនឡើយ
បាងកក៖ នាយករដ្ឋមន្រ្តីស្ដីទី និងជារដ្ឋមន្ត្រីក្រសួងមហាផ្ទៃថៃ លោក ភូមិធម្ម វិជ្យៈឆ័យ បានអះអាងកាលពីថ្ងៃសុក្រទី៤ ខែកក្កដាថា វិធានការតឹងរ៉ឹងនៅតាមបណ្តោយព្រំដែនកម្ពុជា-ថៃ នៅតែដដែល ដោយមិនមានការបន្ធូរបន្ថយនៃការឆ្លងកាត់ព្រំដែនឡើយ។ នេះបើតាមការចុះផ្សាយដោយកាសែតថៃ The Nation។
សេចក្តីថ្លែងការណ៍របស់លោក ភូមិធម្ម នេះធ្វើឡើង បន្ទាប់ពីកិច្ចប្រជុំក្រុមប្រឹក្សាសន្តិសុខជាតិ (NSC) ដែលអនុរដ្ឋមន្ត្រីក្រសួងការពារជាតិ លោក ណាត់ថៈផុន ណាក់ផៈនិច្ច បានរាយការណ៍អំពីស្ថានភាពនៅព្រំដែនកម្ពុជា-ថៃ។
លោក ភូមិធម្ម បានលើកឡើង ថា ភាព តានតឹង នៅព្រំដែនកម្ពុជា -ថៃ នៅតែ មានកម្រិត ខ្ពស់ ហើយ ជា លទ្ធផល វិធានការ ដែល មាន ស្រាប់ នឹង នៅ ដដែល ខណៈលោក ណាត់ថៈផុន ត្រូវបានតែងតាំងដើម្បីស្វែងរកដំណោះស្រាយចំពោះបញ្ហានេះ។
នៅពេលសួរថា តើកិច្ចពិភាក្សាអាចមានលទ្ធភាពនៃការបន្ធូរបន្ថយវិធានការព្រំដែនដែរឬទេ? លោក ភូមិធម្ម បានឆ្លើយថា មិនមានការពិភាក្សាបែបនេះទេ ដោយលោកបានបញ្ជាក់ជាថ្មីថា គ្មានសេចក្តីសម្រេចណាមួយត្រូវបានធ្វើឡើង អំពីការបើកច្រកទ្វារព្រំដែនជាមួយកម្ពុជាឡើយ។
លោក ភូមិធម្ម បានសង្កត់ធ្ងន់ថា ៖«លោក ណាត់ថៈផុន[អនុរដ្ឋមន្រ្តីក្រសួងការពារជាតិថៃ] គឺជាអ្នកតំណាងរបស់រាជរដ្ឋាភិបាលនៅក្នុងប្រទេសថៃរួចហើយ ដូច្នេះចាប់ពីពេលនេះតទៅ កិច្ចពិភាក្សាលើការស្វែងរកដំណោះស្រាយនឹងបន្តរហូតដល់យើងសម្រេចបាននូវរបៀបថ្មីបន្ត»។
កាសែតថៃដដែលក៏បានចុះផ្សាយទៀតថា លោក ភូមិធម្ម បានលើកឡើងលើវីដេអូជុំវិញការប្រកែកគ្នាមួយប្រាវ ហើយប៊ិះឈានដល់ការបាញ់គ្នានៅតំបន់ភ្នំខ្មោច ខេត្តព្រះវិហារ កាលពីពេលថ្មីៗនេះផងដែរ។ យ៉ាងណា លោក ភូមិធម្ម បានបញ្ជាក់ថា លោកមិនបានមើលវីដេអូ និងមិនដឹងពីស្ថានភាពនេះទេ ព្រោះមិនមានរបាយការណ៍ផ្លូវការណាមួយត្រូវបានដាក់ជូនលោកទាក់ទងនឹងឧបទ្ទវហេតុនេះ។
គួររំឭកថា កាលពីព្រឹក ថ្ងៃទី៤ ខែកក្កដា ឆ្នាំ២០២៥ ទ័ពកម្ពុជា-ថៃ ប៊ិះផ្ទុះអាវុធដាក់គ្នាលើតំបន់ភ្នំខ្មោច ដោយកងទ័ពទាំងសងខាង ដែលប្រដាប់ដោយអាវុធរៀងខ្លួន បានឈរប្រកែកគ្នាមួយភ្លែត ស្ទើរតែប្រុងផ្ទុះអាវុធទៅហើយ។ តែចុងក្រោយ កងទ័ពថៃ ក៏ព្រមចាកចេញពីតំបន់ភ្នំខ្មោចត្រឡប់ទៅវិញ តាមការទាមទាររបស់កងទ័ពកម្ពុជា។ គេនៅចាំបាន សម្តេចនាយករដ្ឋមន្រ្តី ហ៊ុន ម៉ាណែត បានលើកឡើងនាពេលថ្មីៗនេះថាកន្លងមក កងទ័ពកម្ពុជា ក៏ធ្លាប់ទៅដេញកងទ័ពថៃឱ្យចេញពីតំបន់ភ្នំខ្មោចនេះដែរ ហើយមានម្ដងនោះ កងទ័ពថៃរត់ដល់ថ្នាក់ភ្លេចកាំភ្លើង តែកងទ័ពកម្ពុជាចិត្តល្អក៏ហៅមកយកវិញ៕
