រដ្ឋមន្ត្រីការបរទេសថៃ៖ ភាព តានតឹង នៅ តាម បណ្តោយ ព្រំដែន កម្ពុជា – ថៃ ចាប់ផ្តើម ធូរស្រាលហើយ
បាងកក៖ លោករដ្ឋមន្ត្រីការបរទេសថៃ ម៉ារីស ស្ងៀមពង្ស ថ្លែងប្រាប់កាសែតបាងកកប៉ុស្តិ៍ កាលពីថ្ងៃព្រហស្បតិ៍ទី៣កក្កដាថា ភាព តានតឹង នៅ តាម បណ្តោយ ព្រំដែន កម្ពុជា – ថៃ ចាប់ផ្តើម ធូរស្រាល ហើយ ដូច្នេះកម្ពុជាគួរវិលត្រឡប់ ទៅតុ ពិភាក្សា ទ្វេភាគី វិញ និងដកកម្លាំងចេញពីព្រំដែន។
លោក ម៉ារីស បាននិយាយកាលពីថ្ងៃទី៣កក្កដាថា ភាពតានតឹងបានធ្លាក់ចុះដល់កម្រិតជាក់លាក់មួយ ដោយសារតែមិនមានការប៉ះទង្គិចគ្នាទេ ទោះបីទាហាន និងអាវុធនៅតែឈរជើងជិតព្រំដែនក៏ដោយ។ លោកបន្ត ថា ភាគី ថៃ ចង់ ឃើញ ការ ដក កងកម្លាំង ទៅ កាន់ ទីតាំង ធម្មតា ដែល ពួកគេ កាន់កាប់ កាលពី ឆ្នាំ មុន ដោយសារ តែរាជ រដ្ឋាភិបាល ថៃ មាន ការ ព្រួយ បារម្ភ អំពី សុវត្ថិភាព របស់ ប្រជាជន ក្នុង តំបន់។ ប្រមុខការទូតថៃរូបនេះឆ្លៀតទាំងបោះសម្តីឌឺដងតាមអ្នកកាសែតបន្ថែមទៀតថា៖« ថៃ នឹង ព្យាយាម ដោះស្រាយ បញ្ហា ជាមួយ កម្ពុជា ទ្វេភាគី តាម រយៈ បណ្តាញ ការទូត ផ្លូវការ ។ រាជរដ្ឋាភិបាល ថៃ នឹង មិន ចរចា តាម ប្រព័ន្ធ ផ្សព្វផ្សាយ សង្គម ទេ»។
លោក រដ្ឋមន្ត្រី ការបរទេស បញ្ជាក់ ថា ការអភិវឌ្ឍដ៏សំខាន់មួយ គឺកិច្ចប្រជុំប្រកបដោយជោគជ័យ នៃគណៈកម្មការចម្រុះព្រំដែនកម្ពុជា-ថៃ (JBC) នៅក្នុងខែមិថុនា ដែលបានបង្កើនក្របខ័ណ្ឌបច្ចេកទេសសម្រាប់ការបោះបង្គោលព្រំដែន។ ថៃ នៅតែ ប្តេជ្ញា ដោះស្រាយ បញ្ហា តាមរយៈ យន្តការ ទ្វេភាគី ដែល គ្រប់គ្រង ដោយ អនុស្សរណៈ នៃ ការយោគយល់ គ្នា ឆ្នាំ២០០០។ លោក ម៉ារីស បញ្ជាក់ជាថ្មីថា ប្រទេសថៃមិនបានទទួលយកយុត្តាធិការបង្ខំរបស់តុលាការយុត្តិធម៌អន្តរជាតិលើបញ្ហានេះទេ ចាប់តាំងពីឆ្នាំ១៩៦០មក។
លោកក៏បានលើកឡើងនូវមតិយោបល់តាមប្រព័ន្ធផ្សព្វផ្សាយសង្គមថ្មីៗរបស់ភាគីកម្ពុជា ដោយចាត់ទុកការលើកឡើងនោះថា ជាការជ្រៀតជ្រែកក្នុងកិច្ចការផ្ទៃក្នុងរបស់ប្រទេសថៃ និងជាការរំលោភលើធម្មនុញ្ញអាស៊ាន និងអង្គការសហប្រជាជាតិ។
នៅក្នុងសភា អនុរដ្ឋមន្ត្រីការពារជាតិ លោក ណាត់តៈពល ណាក់ពាណិជ្ជ បាននិយាយថា វិធានការដែលថៃបានអនុម័តនៅព្រំដែន មិនបានដាក់សម្ពាធហួសហេតុដល់ប្រជាជននោះទេ។ លោក បន្ត ថា ព្រំដែន មិន ត្រូវ បាន បិទ ទេ ប៉ុន្តែ ការ ឆ្លង កាត់ ដោយ មនុស្ស និង យានជំនិះ ត្រូវ បាន កំណត់ ចំពោះ អ្នក មាន កាតព្វកិច្ច ទៀងទាត់ ទាក់ទង នឹង ការងារ សាលារៀន ឬ ពាណិជ្ជកម្ម។
លោក ណាត់តៈពល ក៏បានអះអាងថា សមាជិកនៃគណៈកម្មាធិការចម្រុះព្រំដែន (JBC) របស់កម្ពុជា បានបន្តកិច្ចពិភាក្សាជាមួយសមភាគីថៃ ហើយនោះជាសញ្ញាវិជ្ជមាន។ លោក ណាត់តៈពល ដែលកំពុងធ្វើជារដ្ឋមន្ត្រីក្រសួងការពារជាតិ បាននិយាយថា មន្ត្រីគណៈកម្មាធិការចម្រុះព្រំដែន (JBC) ឥឡូវនេះ កំពុងពិចារណាលក្ខខណ្ឌសម្រាប់ការចរចាបន្ថែមទៀត។
លោកបន្តថា ប្រសិនបើគណៈកម្មាធិការចម្រុះព្រំដែនបន្តកិច្ចប្រជុំ ថៃនឹងស្នើឱ្យកងកម្លាំងត្រឡប់ទៅទីតាំងធម្មតាវិញ ដើម្បីទប់ស្កាត់ឧប្បត្តិហេតុ ហើយការគ្រប់គ្រងព្រំដែនដ៏តឹងរឹងនឹងត្រូវដកចេញ។
សូមជម្រាបជូនថា ភាព តានតឹង រវាង ថៃ និង កម្ពុជា បាន លេច ឡើង សាជាថ្មីបន្ទាប់ ពី ទាហាន ថៃ បានផ្ទុះអាវុធ មកលើយោធាកម្ពុជាប្រមាណ១០នាទីនៅ តំបន់ព្រំដែនមុំបី-ឆងបក ស្ថិតក្នុងខេត្ត ព្រះវិហារខាងកម្ពុជា និង ខេត្តឧប្បលរាជធានីខាង ថៃ។ ទាហានថៃ បានលបលួចឆ្មក់សម្រុកចូលទៅកាន់លេណដ្ឋានទាហានកម្ពុជា ហើយបើកការបាញ់ប្រហារ បណ្ដាលឱ្យទាហានកម្ពុជាម្នាក់ទទួលមរណភាព។ ហេតុការណ៍នេះ កើតឡើងកាល ពី ថ្ងៃ ទី២៨ ខែ ឧសភា។ ឧបទ្ទវហេតុនេះ ជំរុញឱ្យប្រទេសទាំង២ ចាប់ផ្តើមទាស់គ្នាជាបន្តបន្ទាប់ និងពីមួយថ្ងៃទៅមួយថ្ងៃ រហូតដល់ភាគីថៃចាប់ផ្តើមបិទច្រកព្រំដែនជាឯកតោភាគី៕
